【DSE計數機全攻略】計算機選購懶人包!

AfterSchool
AfterSchool 2020年04月22日
計數機應該點樣買?邊一個型號可以符合考評局嘅要求之餘,仲可以輸入外置公式?AfterSchool向你推薦唔同價錢嘅DSE 計數機!

工欲善其事,必先利其器🛠。想DSE數學考到好成績,就一定唔少得一部好嘅計數機同埋一堆可以幫你秒殺唔同數學題型嘅外置Formula🔥。咁買計數機應該要注意啲咩?唔同型號嘅程式計數機喺功能上又有啲咩唔同?AfterSchool一文帶你睇曬買DSE 計數機嘅注意事項!

點解HKDSE數學考試一定要準備計數機? 

操過Pastpaper嘅你都知道,時間管理對DSE嚟講係極之重要。而數學、物理、會計科等等嘅科目都會涉獵唔同嘅算式,諗得切點寫條式出嚟,都唔夠時間再用直式計答案。唯有用計數機呢個可以直接得到答案嘅方法。而大家所熟悉嘅Casio Fx-3650P、Fx-50FH等等都係程式計算機,特別在於除咗一般計算功能以外,你亦可以加入唔同嘅外置公式,令你考試嘅時候,一輸入Valuables就可以得到答案。

考評局對於計數機有啲咩要求?

根據考評局嘅指引,只有考評局指定嘅專用計數機先可以喺DSE考試期間使用。而呢一類考評局指定專用計數機會印有「h.k.e.a.a. approved」或者係「h.k.e.a. approved」嘅標籤,通常會出現喺計數機嘅頂部位置

至於點解考評局要限制某類計數機?呢度就要追溯翻90年代考試嘅作弊問題。當時有位好熱衷於ICT嘅同學仔就發現計數機原來係可以顯示到文字,之後利用計數機作弊嘅問題愈嚟愈嚴重。當時嘅考試局(即係依家嘅考評局)逼不得已,決定統一計數機嘅使用,慢慢就變成咗依家嘅「考評局指定專用計算機」。

 

考評局准用計算機型號名單

咁多同學仔睇完個故仔,可能以為所謂嘅「考評局指定專用計算機」就係得Casio fx-3650p、fx-50fh、fx-50fx、fx-50fh II呢幾個型號。其實唔係,好多款計數機都可以帶入試場,最重要係呢啲計數機一定要印有「h.k.e.a.a. approved 」「h.k.e.a. approved」嘅標籤。以下就係考評局嘅「准用計算機型號名單」:2020DSE考評局准用計算機型號名單

 

文憑試計算機型號推薦

咁多計數機入面,小編會推介Casio品牌嘅程式計數機。Casio作為一個歷史悠久嘅電子產品公司,電子技術已經係非常成熟。由大家常用嘅Casio fx-3650p、fx-50fh II等等嘅型號都可以感受到Casio計數機輕便、個人化嘅設計。電池壽命以及價錢定位亦都係Casio計數機成功突圍而出嘅原因,喺太陽能及電池雙重供電底下,大家常用嘅Casio型號計數機都可以用到最少3年或以上,而價錢大多都係維持喺二百五十港幣左右,性價比非常高。

除此之外,Casio程式計數機比其他品牌優勝嘅地方仲在於公式呢一個功能,同學仔可以按照自己嘅科目(例如係唔同嘅數學選修科、會計等等)輸入翻相關嘅程式,方便自己考試嘅時候以最快嘅速度得到答案。Casio計數機絕對係「功能完備、簡潔耐用」嘅代名詞。

 

Casio不同型號計算機比較 

同學仔喺中一嗰買Cal機嘅時候可能都比較倉猝,好隨意咁喺以下呢4款Casio計數機度簡一款就以為可以用到畢業:fx-3650pfx-3650p IIfx-50fhfx-50fh II。但原來簡計數機都係一個學問,最大嘅分別就在於功能同埋容量上,例如某個型號係計唔到微積分,咁對將來想讀數學M2嘅同學仔就會有影響;而低容量就會限制咗你輸入外置公式嘅數目。以下就係唔同Casio計數機嘅比較!

同系列新舊型號比較 Casio fx-50fh vs fx-50fh II:

我哋先從fx-50FH系列開始,比較一吓新舊型號有啲咩唔同。兩部計數機喺功能同埋用法上可以話係完全一樣,只係以下呢幾個地方有唔同:

  • (一)隱乘計算次序
    • 新版fx-50fh II更新咗隱乘計算嘅先後順序(隱乘計算大多會出現喺有括號出現嘅算式入面),當計數機遇到除數算式嘅時候,會自動產生括號預防誤解順序嘅情況,最簡單嘅例子就係:Fx-50fh II計算 5÷5(5+5),唔會好似舊版fx-50fh當咗做 5÷(5(5+5)) 咁去計。
  • (二)速度
    • 新版fx-50fh II嘅速度比舊版更快。
  • (三)電池壽命
    • 新版fx-50fh II更新咗光能電源,一般室內光線都足以應付正常運作。

 

同系列新舊型號比較 Casio fx-3650p vs fx-3650p II:

  • (一)程度容量
    • Casio fx-3650p:360bytes
    • Casio fx-3650p II:390bytes
  • (二)微積分計算方法
    • 微分:Fx-3650p II使用較好嘅Gauss-kronrod方法去計算
    • 積分:同以上一樣,新版會用到較好嘅中央差分方法計算

喺運用Gauss-kronord同中央差分方法去計算微積分嘅情況底下,新版Fx-3650p II喺速度同埋準確度上都會打嬴舊版

 

比較完同型號新舊版本之後,依家就嚟到較新型號之間嘅比較:

  • (一)常設科學常數及內置程式
    • Casio fx-3650p II:沒有 
    • Casio fx-50fh II:40個科學常數及23個內置公式
  • (二)微積分計算功能
    • Casio fx-3650p II:
    • Casio fx-50fh II:沒有 
  • (三)程式容量
    • Casio fx-3650p II:390bytes
    • Casio fx-50fh II:680bytes

簡單總結一吓,Casio Fx-50FH II會係最全面嘅計數機,準確度以及速度都係非常可觀,而擁有內置科學常數呢一個設定亦都非常適合將來會或者係修讀緊Phy、Chem、Bio嘅同學仔。

 

點樣保養你部計數機

一般嚟講,你部計數機會跟足你成個中學生涯,所以學識去保養計數機都係一門學問。經常遇到嘅問題就係計數機嘅數字甩油,要避免呢個情況,同學仔一定要用保護蓋。咁如果真係甩咗油可唔可以自己用Marker/貼紙補翻?呢度小編就唔建議喇,任何有貼紙或係符號嘅計數機都有可能禁止帶入試場。如果真係甩油甩得好西利,或者買過部新嘅計數機就更加好!