【2020升中派位】一文睇哂自行分配學位、統一派位、叩門策略

AfterSchool
AfterSchool 2020年06月19日
AfterSchool 為大家整理最新嘅升中派位介紹,羅列咗自行分配學位、統一派位,甚至係叩門嘅重點同策略,以及升中派位日期同一啲常見問題,輕鬆解決升中放榜嘅煩惱。立即查閱更多詳情!

升中一派位係所有香港小學生升中學必經嘅過程,當中又有分自行分配學位、統一派位同叩門,究竟呢三種中學派位方法點樣分配學位同有咩準則?學生選擇唔同中學學位分配辦法時,又有咩升中派位策略可以成功順利升讀心儀嘅中學?AfterSchool 就為大家整理咗呢篇最新嘅升中派位介紹,羅列咗自行分配學位、統一派位,甚至係叩門嘅重點同策略,同埋升中派位日期,希望幫到大家輕鬆解決升中放榜種種煩惱。

 

升中自行分配學位

自行分配學位係中學派位嘅第一階段,學生可以自行選擇係咪參加呢個階段。

喺呢個部分,同學可以自行選擇不多於兩間中學,並要根據入讀意願排名,可以選擇任何學校,唔受校網限制。

喺中一自行分配學位階段,學校可以自訂收生準則,如果學校認為同學嘅成績符合學校嘅要求,就會邀請同學去面試,如果面試表現理想,同學就會被取錄㗎喇。

家長當然想為子女揀最好嘅中學,咁一定要睇呢篇《全港中學排名》,列明頭100名Band one 嘅中學,同埋唔同區嘅Top10中學,睇下你心水嘅學校有無榜上有名啦!

 

統一派位

統一派位係中學派位嘅第二階段,除非已經俾直資學校或者私立學校收咗,如果唔係嘅話就必須要參加統一嘅升中一派位。

統一派位分為甲部同埋乙部,兩部份都需要根據入讀意願排名:

甲部:不分校網,可以揀任何3間中學,會首先獲處理

乙部:受校網限制,最多揀30間中學

喺統一派位嘅部分,運氣比較重要,因為統一派位其實係一次大抽獎:

  1. 根據成績,將同學分為3個 banding,Band 1 係最好,其次係 Band 2,跟住係 Band 3。
  2. Band 1、Band 2、Band 3 嘅同學係分開派位
  3. 同學喺自己所屬嘅 banding入面隨機分派到一個數字,最大嘅數字係果個banding 嘅總人數,最細嘅數字係1。
  4. Band 1 嘅同學會首先獲派位,由1號同學開始,跟住到2號、3號,如此類推。當派哂所有 Band 1嘅學生之後,就會開始派 Band 2 嘅同學,跟住就係 Band 3嘅同學。
  5. 派位嘅原則就係,由 Band 1 嘅1號同學開始,盡量派第一志願嘅學校,如果第一志願嘅學校嘅學位派哂嘅話,就會將你派去第二志願嘅中學;如果第二志願嘅學校嘅學位都派哂嘅話,就會將你派去第三志願嘅中學,如此類推。

 

叩門

升中放榜後,如果同學對升中派位結果唔係太滿意,覺得可以入讀更好嘅學校,就可以去心儀學校申請叩門。大多數學校嘅叩門程序都包括面試,但係亦有少數同學唔洗面試,學校都會錄取。

 

申請時間表及升中派位日期

12/2019 - 1/2020

小六上學期考試 (第2次呈分試)

2/1/2020 - 16/1/2020

中學接受自行分配學位申請

2/2020 - 3/2020

各中學嘅自行分配學位面試開始

7/4/2020

自行分配學位結果公佈

5/2020

同學要遞交統一派位嘅選校表格

6/2020

小六下學期考試 (第3次呈分試)

7/7/2020

教育局公佈升中派位結果,同學可以因情況向各中學申請叩門

8-9/7/2020

辦理中一註冊

 

升中派位學額分佈

  1. 官立、資助同按位津貼中學可預留唔多過 30%嘅中一學位作為自行分配學位。
  2. 一般喺統一派位階段,直屬中學會為佢嘅直屬小學保留餘額85%嘅學位,而聯繫中學就為佢嘅聯繫小學保留餘額25%嘅學位。
  3. 「一條龍」中學原則上會預留不少過15%嘅中一總學額,畀其他小學嘅學生循自行分配學位或統一派位嘅途徑申請入讀。

如果想了解更多,可以上返教育局相關網頁,睇返你心水嘅中學預留咗幾多中一學額。

 

升中派位策略

自行分配學位

一定要將自己最想讀嘅學校放喺第一、二志願,即使佢哋唔係你嘅所屬校網!

因為喺呢個部分,學校係根據你嘅能力同埋面試表現決定收唔收你,而唔係靠統一派位嘅運氣。而如果呢啲學校喺呢個階段收咗你嘅話,你就唔會經統一派位階段分派學校,所以唔好將心儀學校放喺後面。

 

統一派位

雖然統一派位係講運分,但排志願個陣都要考慮返自己嘅成績,盡量爭取更好嘅中學。

首先必須要清楚知道自己嘅 banding,如果唔係好清楚嘅話可以問老師,Banding一般係由1A、1B、1C,如此類推到3A、3B、3C;A、B、C嘅分別就係喺果個Banding入面成績最好、成績中等、成績普通。

Band 1 同學

  1. 成績唔錯,覺得可以應付到 Band 1A 中學 ,可以進取啲第一志願填 Band 1A 中學,第二志願就唔建議填 Band 1A 中學,要隱陣啲揀返啲無咁大競爭嘅學校。
  2. 屬於 Band 1 但係覺得自己成績普通嘅同學,可以直接填 Band 1B 中學。
  3. 覺得自己成績真係麻麻哋,未必應付到學業競爭,第一志願就可以直接填 Band 1C 中學。

但係無論如何,只要覺得自己可以應付 Band 1 競爭嘅同學,記住要排哂 Band 1 嘅學校,先開始排 Band 2 嘅學校,費事無咗入讀 Band 1 中學嘅機會。

Band 2 同學

  1. 如果覺得自己成績都唔係太差,可以應付到 Band 1C 中學,可以試下第一志願填 Band 1C 中學,因為呢啲中學可能仲有學位剩,但係第二志願就唔建議再填 Band 1C 中學咁搏!
  2. 覺得自己成績一般就可以直接填 Band 2A 中學;
  3. 成績真係麻麻哋,第一志願就可以直接填 Band 2B 或者 Band 2C 嘅中學。

Band 3 同學一樣道理,

  1. 可以考慮搏一搏第一志願填 Band 2C 中學
  2. 成績唔算好,唔想搏就可以直接填 Band 3A 中學;
  3. 成績真係麻麻哋,第一志願就可以填 Band 3B 或者 Band 3C 嘅中學。

 

叩門

一收到升中派位結果後就可以即刻去叩門,所以當日可以準備定成績表等資料,同諗定有咩學校可以同想叩門。

  1. 申請返喺自行分配學位階段申請過嘅學校,以表誠意
  2. 揀一啲比原本期望低少少嘅中學,增加成功叩門機會。
  3. 大膽啲嘗試去直資或者私立學校叩門,因為呢啲學校可能會有學位剩。

今年疫情,好多學校取消咗面試,變相可能多咗好多人會叩面,所以更加要留意自己升中放榜後有冇需要申請一啲競爭冇咁勁嘅中學,或者降低對叩門學校嘅要求。


常見問題

1.如果有直資中學、私立中學,或者喺自行分配學位階段已經有中學取錄嘅話,係咪無需參加統一派位?
係,如果有直資中學或者私立中學收咗你,或者喺自行分配學位階段已經有中學取錄,你就唔需要參加統一派位,只需要喺選校表格上簽名同劃去選校部份,表示唔需要填寫選校表格,並將有關表格交返去就讀嘅小學。
 

2.同學係咪可以同時參與自行分配學位,同埋報讀直資中學、私立中學?

係,同學可以同時進行呢兩種選校程序。
 

3.如果兩間喺自行分配學位階段申請嘅中學都收咗我嘅話,我最後會獲派邊間學校?

如果喺自行分配學位階段申請嘅中學都收咗你,你會獲派你第一志願。
 

4.參加派位嘅直資中學同官立、資助或按位津貼中學喺學位分配安排方面有咩唔同?

派位安排大致相同,主要分別係參加派位嘅直資中學可預留多過 30%嘅中一學位作為自行分配學位,同埋喺統一派位階段乙部「按校網」會用「不選不派」嘅原則嚟分配中一學位,即係除非學生以某間直資中學為其中一個選擇,否則佢哋唔會獲派果間士資中學。

 

睇完以上嘅中學派位方法介紹同埋策略,希望各位都清楚點樣揀中學,可以成功入讀一間啱自己心水嘅好中學。