【英文SBA】DSE English SBA 技巧、推薦書籍+電影清單

Mr. J English
Mr. J English 2020年09月17日
對DSE英文SBA完全無頭緒? 英文名師 Mr. J 幫你整理咗English SBA攻略。入面唔單止有SBA應試技巧,仲有推介書籍+電影清單Recommended Book+Film List!

提起 HKDSE 英文科,除咗 Paper 1- 4 四張分卷令同學擔憂,仲有變化極大嘅一環:「校本評核」SBA!每年我都收到唔少同學嘅問題,不外乎「我應該揀咩書好?」、「SBA 究竟有咩要注意嘅地方?」所以我就決定寫篇英文 SBA 應試攻略比大家,以懶人包方式為同學仔深入淺出咁拆解 SBA,教你獨家 English SBA skills 之餘,仲附送埋推薦書單、電影清單,等大家放假時慢慢煲。無論係 print fiction, print non-fiction, non-print fiction 定係 non-print non-fiction, 個 recommended list 都有好多選擇比你揀!邊個話操 DSE English 就一定悶到出汁?即刻碌落下面睇下點樣有效備戰 SBA 啦!

 

 

DSE 英文 SBA 2021年特別安排 (9月更新版)

考評局啱啱喺九月公佈出年 (2021) HKDSE English Language 英國語文科最新安排,其中 School-based Assessment 「校本評核」一環變化相當大,所以想喺度同大家特別講解下啲 Special Arrangement。

由於卷四 Paper 4 Speaking 英文口試被取消,Paper 1, 2 & 3 佔分亦相應提升,但 SBA 嘅比重仍然係全科嘅 15%

根據考評局,2021 年 SBA 嘅計分方式會出現少少變化。同以往唔一樣,2021 年考生只需選擇完成 Part A 或 Part B (either Part A or Part B),唔需要做曬兩 Part。無論同學揀做 Part A 定 B,兩 Part 都會佔全科 15%。由於 Part A 嘅考核範圍圍繞同學喺高中三年讀過嘅書、睇過嘅戲,所以較多學校會選擇 Part A 作評核。

兩 Part 各自有「個人報告」同「小組討論」兩個選項。由於學校最後只需上繳一個分數,所以一般做法都係叫學生做曬兩項評核,然後學校選擇兩者中表現較佳嘅項目上繳考評局,成為你 SBA 嘅分數。

 

English SBA Part A 考核模式

 

由中四開始,同學應該就會有英文科指定讀物。正常嚟講,每年指定讀物嘅種類都唔同,分別喺以下四類:

  • Print fiction 小說
  • Print non-fiction 非小說
  • Non-print fiction 電影 / 電視劇
  • Non-print non-fiction 紀錄片

Part A 會要求同學就指定讀物發表「個人報告」或參與「小組討論」。學校通常都會安排全班或全級同學同時做某一類媒體、書本或電影。

考核嘅形式變化較多,每間學校都會有唔同嘅指引。大原則係「個人報告」維持喺 3 - 5 分鐘,可以超過 5 分鐘;「小組討論」維持喺 10 - 12 分鐘 (視乎每組人數)。

題型方面,同大家平時做 book sharing / film review 有啲相似。一般而言,老師會列出幾條指引題目/處境 (prompts / situations) 俾同學選擇。呢啲題目大多涉及指定讀物入面嘅各種元素,要求同學加以論述、發表意見

以下係一啲題目例子/思考角度:

  • 人物特色 (characterisation)

A某嘅性格特點點樣影響到本書嘅情節推動?/作者點解會用呢種手法刻劃A某?你覺得有冇效?

  • 中心思想 (main idea or symbol)

本書嘅中心思想係咩?唔同嘅人物點樣通過唔同嘅方式呈現呢個主題?

  • 創意論述題 (較argumentative,要求學生提供立場及證據)

試評論A某喺呢個章節嘅行動。/你同唔同意呢個反派人物嘅行為?

值得留意嘅係,SBA 考核嘅係英文口語能力,所以並唔會計算同學寫稿嘅分數。與其花太多時間撰稿,大家不如鍛鍊下自己嘅口語論述能力啦!

另外,任何形式嘅個人報告都會有觀眾 (即同班同學),而老師同觀眾都有機會喺報告結束後,向考生提出問題 (follow-up questions),但呢個問答環節係非必要嘅

**Part A 校本評核會喺中五下學期或中六舉行,中六學期完結前提交分數予考評局。

 

DSE Eng SBA Part B 考核模式

Part B 圍繞住選修部分 (Elective Modules)。正常情況下,學校每年都會教一個選修,所以高中三年就會學咗有三個選修。喺 SBA Part B 入面,老師可以就一個或多於一個選修設題,所以中六同學要有心理準備,重溫返中四五學過嘅選修單元。

八個英文選修 recap:

Learning English Through

  • Poems and Songs
  • Short Stories
  • Drama
  • Popular Culture
  • Debating
  • Social Issues
  • Sports Communication
  • Workplace Communication

同 Part A 一樣,老師可以要求同學進行「個人報告」或「小組討論」。

**Part B 校本評核會喺中五下學期或中六舉行,中六學期完結前提交分數予考評局。

 

SBA 考試小備註:所有嘅考核過程,都可能會被錄影,同學無需過分緊張。另外,其實大家可以帶一張 4” X 6” (四分一張A4紙) 嘅 cue card,但 cue card 內容並唔會計分。所以都係個句啦,與其花太多時間撰稿,大家不如鍛鍊下自己嘅口語論述能力啦!

 

Recommended List 推薦清單

雖然前面提到一般學校會為學生揀好指定讀物,但亦有唔少同學需要自己揀書或者揀電影做SBA。望住個圖書櫃揀唔落手?唔使驚,我已經為大家整合咗四類媒體嘅必讀/睇清單,懶人包大放送

 

小說 Print Fiction

 

13 Reasons Why 《漢娜的遺言》

呢本小說圍繞住女主角 Hannah Baker 離奇自殺一事。Hannah 死前兩周錄低咗十三個令自己自殺嘅原因,後來呢批錄音輾轉去到男主角 Clay Jensen 手上。喺睇書嘅過程入面,讀者會由男主角嘅角度認識 Hannah,揭露事情真相。

本書 2007 年推出至今仍然擁有超高人氣,入面有大量素材可以討論,例如欺凌、焦慮症、壓力及精神健康等等,全部都同校園生活適適相關。本書約288頁,英文程度中間偏易,間唔中查下字典應該就無問題。同名電視劇亦都已經係串流平台 Netflix 上架,同學可以一邊追劇一邊追書,咁就唔怕悶啦!

 

The Little Prince 《小王子》

呢本經典法國兒童文學,大家就算無讀過都必定有聽過。故事講述作者有一次駕駛私人飛機墜落喺沙漠,巧遇來自 B612 星球嘅小王子。

本書嘅故事內容同哲學有少少關聯,同學可以透過小王子馴養狐狸一段,反思人際關係嘅起點、人與人之間點樣建立信任;小王子講述其他星球上嘅奇怪現象,則可以理解為作者對大人們攻利、自私嘅諷刺。另外,同學亦可以討論下小朋友嘅童真點解喺大個咗之後就會消失,又或者點樣喺現實社會入面保持好似小王子咁真摯嘅情感。

本書喺 1943 年出版,約 116 頁,英文程度以小說嚟講屬非常容易,有興趣嘅同學不妨一試。

 

Harry Potter  the series 《哈利波特》系列

呢個完全唔使介紹,經典中嘅經典!想當年我中學 lunchtime 無嘢做嘅時候,就走去圖書館睇《哈利波特》!一揭就係一個鐘,本本都超精彩,係我有史以嚟最快睇完嘅一套書!考評局官方推薦清單上淨係列出咗第二本《消失的密室》,但如果同學無讀過呢套書,由第一本《神秘的魔法石》開始睇就最好。第一、二本頁數較之後嗰幾本少,容易啲消化;而且語言生動有趣,同學可以就住本書討論關於勇氣、友情、愛等呢幾個歷久不衰嘅議題。

《哈利波特:神秘的魔法石》初版喺 1997 年面世,約 223 頁,英文程度中上

 

非小說 Print Non-fiction

 

In Order To Live 《為了活下去》

北韓文化感興趣嘅同學應該唔會對呢本書陌生,佢長期喺各國書店排行榜名列前茅。

女主角 Yeonmi Park 將自己細細個喺北韓長大,遙遙望住鴨綠江對面嘅中國小孩,後來輾轉落入人口販子、非法偷渡蛇頭之手等經歷娓娓道來。雖然本書係「非小說」,但佢就好似小說般咁緊湊,想了解脫北者人生嘅同學可以考慮睇睇。

另外,書內頁附有作者喺不同時期影低嘅照片。我幾鍾意呢樣嘢,因為我覺得啲相可以幫同學思考成本書嘅中心思想,例如自由嘅代價、堅毅不屈嘅品格等。所以呢本書有好多嘢值得大家思考同討論。

本書喺 2016 年出版,大約 288 頁,英文唔算太難。大家可以每日睇一兩個 chapter,用一個月時間就應該會睇完本書。

 

When Breath Becomes Air 《當呼吸化為空氣》

呢本自傳適合對從醫或心理學有興趣嘅同學睇。故事主人翁 Paul Kalanithi 係一位神經外科醫生,佢喺三十六歲嘅人生巔峰期迎來第四期肺癌呢個噩耗,本書就係佢離世前嘅遺作。同學睇呢本書嘅同時可以思考下生命嘅價值,學習 Paul 面對命運時奮鬥嘅意志。

本書出版於 2016 年,約 228 頁,英文程度中等

 

Popular: A Memoir (How a geek in pearls discovered the secret to confidence) 

《美少女秘密成長日記》

呢本自傳係三本推薦書入面,題材最輕鬆嘅一本。本書講述女主角 Maya Van Wagenen 為咗提升自己嘅人氣,喺中三嘅伺候,決定做一個特別嘅社會實驗。Maya 每日都會根據一本  1950 年代出版嘅時尚手帳打扮自己,睇下其他同學有咩反應。

由於本書嘅故事情節非常有趣,好容易引起同學共鳴。中心思想方面,同學可以從青少年渴望關注呢點出發,研究下自信心嘅來源同時尚之間嘅關係,又或者比較上世紀 50 年代同而家審美觀嘅異同。

本書出版於 2014 年,約 259 頁,英文程度偏易

 

電影 / 電視劇 Non-print Fiction

 

Sherlock (BBC Series)

鍾意偵探題材嘅同學絕對唔可以錯過呢套膾炙人口嘅英國電視劇!電視劇大概就係講下福爾摩斯同好朋友華生點樣拍住上,遊遍倫敦查案。

煲劇嘅時候,大家不妨一邊學英文生字,一邊練習下純正嘅英式口音。喺考核嘅時候,同學可以探討現實社會中私家偵探同警察崗位嘅不同,又或者討論刑事司法 (criminal justice) 呢個概念。

Sherlock 全四季十三集都已經係 Netflix 上架,每集長約 80 分鐘。但各位要注意,雖然套劇非常生動有趣,但佢嘅英文比較難,同學睇嘅時候,可以考慮開埋字幕,方便了解劇情。

 

Little Women (2019)

呢套文藝電影係改編自 1868-69 年出版嘅同名小說《小婦人》。

故事透過穿插倒敘法,以過去、現在兩條時間線交代 March 一家四位千金 Meg March,Jo March,Amy March 同 Beth March 嘅成長經歷。本書講述十九世紀美國女性喺職場、婚姻、藝術等各方面嘅掙扎同奮鬥史,當中夾雜住唔少家庭離別嘅場面,賺人熱淚,係近年難得一見唔算沉悶嘅文藝大作。

同學可以往性別不平等呢個方向構思自己嘅 SBA,例如思考下點解社會對女性嘅期待就淨係得結婚同生兒育女?電影中女主角 Jo March 為咗爭取自己本書嘅版權嘅情節,又可以反映出現今社會嘅咩問題?

本電影亦可以係 Netflix 收看,片長約 134 分鐘,英文程度偏易

 

Green Book (2018)

《綠簿旅友》講述咗 1962 年嘅美國,當時種族歧視問題仍然相當嚴重,黑人需要依靠一本「綠簿子」尋找會接納黑人嘅社區、食肆及旅館等,故事就環繞住一位黑人鋼琴家同佢嘅隨行白人司機開展。同學可以往黑人在美歷史呢點拓展,配合近期 #BlackLivesMatter 運動一併析述,討論種族歧視情況有冇得到改善,或者現今社會點樣先可以做到真正嘅種族共融。

本電影長約 130 分鐘,對白雖然唔算難,但因為劇情牽涉來自美國唔同州分的角色,所以同學可能要花時間理解唔同美國口音。另外本片暫時無係串流平台上映,同學可以考慮問英文老師或者去英語閣/圖書館尋找資源!

 

紀錄片 Non-print Non-fiction

 

Period. End of Sentence. (2018)

呢套紀錄片係「第九十一屆奧斯卡獲頒最佳紀錄片」,國際認受性頗高,絕對值得一睇。

喺保守嘅印度社會,女性生理期仍然係一個禁忌話題,唔單止有男性唔知道生理期呢個概念,貧困村落嘅女性亦長期買唔到質素好嘅衛生巾。直至有個社會企業家發明咗一部容易操作嘅衛生巾製造機,令村莊女性可以自己製造衛生用品,先改寫咗印度女性嘅命運。

同學可以就住女性權益呢個方向拓展,討論女性喺打破封建社會規條所面對嘅困難,同埋其他持分者可以點樣幫助女性爭取權益等。

呢個紀錄片亦可以係 Netflix 收睇,片長大約 26 分鐘,英文程度偏易

 

Winter On Fire: Ukraine’s Fight For Freedom (2015)

熟悉民運史嘅同學應該對呢套紀錄片唔陌生,喺香港反逃犯條例運動時,佢亦喺各大社區電影院上映。紀錄片透過訪問參與咗 2013 年烏克蘭革命嘅群眾、記者同軍人,詳細記述抗爭嘅導火線、發展同國際迴響,非常值得同學觀看。大家可就住公民意識 (civic awareness)、參與集會自由 (freedom of assembly) 及警暴 (police brutality) 等多個議題展開討論。

呢條紀錄片亦可以喺 Netflix 睇到,片長約 98 分鐘,英文程度偏易

 

英文 SBA 技巧

RECAP :SBA 評核準測「四大範疇」

  • Pronunciation & Delivery 基本發音、語速、停頓等
  • ***Communication Strategies 溝通技巧如眼神接觸、肢體語言、促成共識、帶動討論等 (***香港中學生普遍最弱!)
  • Vocabulary & Language Patterns 詞彙及句式組合與變化
  • Ideas and & Organisation 內容結構及組織

 

個人報告 Individual Presentation

技巧一:唔好照卡讀

有唔少同學平時牙尖嘴利,但一到 individual presentation 就秒變低頭族,全程望住張 cue card,連張紙都就嚟比佢熾熱嘅目光燒穿!唔好望穿張紙嘅同時,亦唔好變成背稿機器人,將成份稿一字不漏咁背曬出嚟,咁樣只會俾人一種生硬嘅感覺。最好呢,就記熟自己講稿嘅幾個 main point。喺真正考核嘅時候,cue card 可以攞喺手,但目的只係俾啲安全感自己,同以防萬一。

記住!演講時要雙眼望住同學,佢哋先係你嘅觀眾!良好嘅溝通技巧唔單止可以令人覺得你有自信,仲可以提升你喺 Commmunication Strategies 嘅分數㗎!

技巧二:勿濫用論據

另一個 SBA 普遍嘅失分位就係「結構」!有好多同學怕自己唔夠 content 分,往往會採用大包圍嘅策略,將與題目無關嘅各種細節都寫落講稿,甚至連預設答案都係千篇一律嘅百搭萬能 key,老師無論問你 Character Development 定 Moral of the Story 定 Do you think that ... 你都係答返你講稿入面嘅 existing points。呢種散漫無章、遊花園式嘅演講方法絕不可取!

Ideas & Organisation 嘅重點係 ‘Relevance’,即係「扣題」。老師最想要嘅係符合題目字眼要求,而且重點與重點之間有關連性嘅演講內容,並非說你講中越多 points  越好。如果整篇演講內容極詳盡,但極不扣題 (Irrelevance) 又不連貫 (Incoherence),咁你 Ideas & Organisation 一環就會受重創喇。

想知點樣提升自己嘅結構分,就要把握機會報讀 5** MASTERCLASS

 

小組討論 Group Discussion 

技巧一:Be a Gentleman 彬彬有禮

唔知大家有無試過個 timer 一開,就有五把聲出現,好似開籠雀咁百鳥爭鳴,疊聲疊到懷疑人生?其實比起氣焰,小組討論嘅時候,老師更著重同學嘅禮貌、風度。唔係叫你被動地等所有人發言完先開口,而係要注意唔好爭住講,甚至壟斷發言,應該適當時邀請其他同學回應你剛才提出嘅問題。“Be a gentleman”,有風度嘅表現不單止可以令討論氣氛更輕鬆,亦可以為你 Communication Strategies 一欄增添唔少分數。

技巧二:做 Leader!

「Mr. J 你頭先叫我唔好搶嘢講,而家又叫我做 leader,咁即係想我點?」

邊個話做第一個發言就一定係領袖?領袖除咗拋出問題引組員討論之餘,更重要嘅係確保討論嘅節奏,例如見組員突然語塞,你可以幫下佢 summarise 佢想表達嘅重點,又或者見大家都無咩嘢講就提出過渡到下一個重點等,都可以展現出你領袖風範。

想學更多有效嘅 communication strategies?唔好猶疑喇,記得報讀 5** MASTERCLASS

 

閱讀反思 Book Comment/ Report/ Review/ Personal Reflection

 

技巧一:立意定高下

所謂立意,即係喺反思中將書或者電影嘅內容扣連到現實生活中;立意越高、層次越深嘅發言往往較受老師喜愛。例如13 Reasons Why 《漢娜的遺言》講述到原來冷眼旁觀亦係一種罪嘅時候,你可以將呢個 point 套用喺現實生活入面:見到不公義嘅事情,或係大是大非面前,究竟仲存唔存在所謂嘅中立呢?如果你係故事入面嘅高中生,你會選擇沉默、冷眼旁觀,定勇敢發聲呢?“Inaction is also a form of action” (選擇唔行動本身就係一個行動)。呢個立意如果講得好,會加唔少分。

立意並唔係一樣容易做到嘅事,我會係 5** MASTERCLASS 示範點樣提升你演講同文章嘅立意,教幾個常見嘅技巧,有心嘅同學記得唔好錯過喇!

技巧二:Literary Present

有 follow 開我 Instagram 嘅同學應該見過呢個 term!Literary Present 喺書評、影評中常見嘅一種時態。我哋係介紹書 / 電影情節時 (寫 summary 嘅時候) 都會用 simple present,背後原理係故事無論係一天後、一百年後,佢都理論上唔會改變,所以 story plot 某程度上就等於 universal truth,所以要用上 Literary Present 呢種時態。

相反,同學寫 reflection 嘅時候,由於一個人嘅閱後感 / 觀後感可能隨住時間而改變,所以描述觀影當刻嘅感受就要用 simple past,強調該感受係屬於過去

例子Sample:

Elsa discovers her true identity as the bridge that connects all four elements. (literary present)

 I was amazed by Elsa’s courage to find her true identity. (simple past)

 

****** 想知更多獨門 SBA skills?記得唔好錯過 5** MASTERCLASS!See you in...Masterclass!

 

 

P.S. 嚟緊我會每個月都會開放「免費課堂」俾大家!等我用 75 分鐘,教你點樣考好 Listening Paper 3,仲會送一本《5** Paper 3 精讀秘笈》(內含大量sample essay、必學connectives、頂級vocab)。

立即報讀《「一分不失」Paper 3 精讀班》