由合格邊緣升上到9X分?— 我讀數學嘅經歷

由合格邊緣升上到9X分?— 我讀數學嘅經歷

由合格邊緣升上到9X分?— 我讀數學嘅經歷
Shirley
Shirley 2019年01月22日

其實我數學並唔係一向都好叻,都經歷過好差嘅時候。小學嘅時候數學經常唔合格,對數學都冇咩興趣。係中學嘅時候亦都試過由好叻之後突然變得好差,係可以半年內由90幾分跌到啱啱合格


記得小學五年級比過一個要求自己,就係要努力讀書,升上好中學,就搵自己有興趣嘅科黎專心聽書,因為我之前係經常心不在焉、無心向學同埋上堂瞓覺嘅人。結果,我專心聽數學而且肯做數學功課,就進步咗30幾分。自此之後,我都鍾意咗數學,不過我當時對數學嘅認識都係好少,以我懶嘅程度都冇咩自學。


去到中學,中一同中二嘅時候都係可以保持到好嘅成績,但係到中三就退步咗好多。果陣遇到一個好差嘅老師(係真係連其他老師都話佢差,睇落都似幾憎佢),佢堂堂都戴口罩,尼個都唔係最大問題,最大問題係佢要關曬所有燈黎教書,仲要好多時候數學堂都係下午,食完野飯氣攻心,再加上係尼個環境係一定會瞓曬。聽其他老師講,話佢有一次教書嘅時候咁啱比校長見到全班同學瞓曬,校長走咗入去叫醒啲同學,有個同學係叫咗好耐先醒,仲同校長講:「我真係好攰」,最後校長要求佢上堂至少要開一盞燈。其實果陣中三有兩班都比佢教,個個成績都變得勁差。


非常好彩嘅係,中四嘅時候可以遇番一個比佢正常嘅老師,我都同自己講要努力讀番數學,而且學校亦都比機會我修M2,我數學即刻由啱啱合格升番到90分以上。雖然果個老師都好一般,70分鐘嘅堂中間比我哋休息10-15分鐘,令到啲同學瞓咗。而且M2原來果堂1個鐘,但係佢會遲開始上堂提早落堂,亦都甚少比功課我哋做,搞到有50%人drop M2。


學數學嘅小tips


要學好數學,我呢個過來人都可以同大家分享幾個小tips:


1.學數學,最緊要係明咗個概念而唔係死記,依家有唔少老師都好鍾意叫我哋背咗條公式同定理,其實咁樣係真係極之唔好,因為你會好容易記錯同搞亂曬,而且有時轉一轉題型會唔識用番。假如你都搞唔明個概念,做多100題都未必會識,同埋都唔知點解咁做,做黎都係白廢時間。


2.我覺得要搵一樣數學嘅野係你自己有興趣嘅,然後去睇書同上網學,例如我咁,我鍾意斐波那契數列,跟住原來同黃金分割比例、同自然界有關......一直去搵一樣野同另一樣野嘅關鍵,就會覺得數學好奇妙,會想繼續研究落去。


3.我建議大家學數學係要設定目標比自己,你係要有個目標先會諗實踐嘅方法,例如我想熟圓嘅性質,咁我會去做多啲題目,睇書嘅證明同例題,等我要明咗點樣做,咁就會越做越熟。同埋,切記不要放棄目標!


總括而言,學好數學唔可以一日千里,除咗要明咗個概念,仲要搵一樣數學嘅野你係有興趣同埋設定目標。以上呢啲都係我個人意見,如果有啲咩不足之處,歡迎同學補充!


80