學霸必備神器!方格筆記!究竟又係乜嘢黎?

AfterSchool
AfterSchool 2019年09月20日
筆記個個都會抄,但係方格筆記你又抄過未?面對海量嘅知識,點運用就成為你DSE可唔可以成為狀元嘅致命點!要運用首先就要整理!所以我地一齊學習點樣用一本筆記,造就一位學霸!

寫筆記嘅方法有N咁多種,而其中一種大熱嘅寫筆記方法就叫做「方格筆記」,係由日本人高橋政史發明嘅~(有行開書局嘅同學相信周不時到會見到「方格筆記」嘅書)


點解學霸都用方格筆記? 究竟方格筆記係啲乜?

簡單嚟講,方格筆記就係沿著啲方格去劃分為唔同區域,每一格都寫唔同方面嘅野。例如係之前上堂抄低嘅筆記,之後再做推理同整理,以及相關內容嘅總結等等,呢個方法可以有效幫你理清思維,令到成個邏輯變得更加清晰!


而「方格筆記」其實都有有分好多類型~今日要講嘅就係「黃金三分割」啦!


黃金三分割—四步曲

STEP 1 標題

喺標題明確咁寫上自己嘅論點,用最簡單嘅字去寫你想記低嘅概念。 


STEP 2  板書空間(板書=老師寫喺黑板上嘅字)

用箭咀+邏輯連結詞(因為、所以⋯⋯)推展筆記內容,將唔同概念連接埋一齊

喺抄寫板書嘅同時,多啲就着老師寫低嘅野去問自己問題,就好似「點解會發生?」,從而再推展並加深自己嘅理解! 

 

STEP 3 掌握中央空間

簡單嚟講就係將自己所諗到嘅野、係老師講解過程令自己「叮」一聲、將自己突然喺嗰一刻所諗到、理解到嘅嘢抄底,咁樣可以幫助自己掌握到一啲學習嘅關鍵!

 

STEP 4 歸納空間

最後就係要將你前面寫低嘅野做一個歸納,好簡潔明確咁將重點整理,同時亦都可以利用圖解,加速理解同埋強化記憶。最後喺筆記嘅右上角,寫低三個重點,彙整筆記嘅內容!

 

破解迷思——越多顏色越入腦?

有人抄筆記會用好多隻顏色,但其實顏色愈多原來會令自己更加混亂

「方格筆記」既始創者高橋政史就建議同學用三種顏色嘅筆去抄筆記就足夠~用黑色寫低事實、用藍色寫低自己意見/看法,最後用紅色去加強結論!


其實點樣做筆記都係按自己個人需求~只要自己明白自己寫緊啲咩,又可以令到自己記到入腦就可以啦!但係畢竟抄筆記嘅方法有咁多,唔知從何入手都可以試下呢個咁熱門嘅「方格筆記」嘅~


Reference

https://bit.ly/2qaluMi 

https://bit.ly/2zT9Oai