攰嘅時候就個個都有㗎啦，溫左咁多個鐘，都會覺得悶。咁但係點樣先可以令到自己繼續捱落去呢？今次 AfterSchool 就搵嚟 @dsefreegiveaway 話你知一啲小貼士同埋有咩可以變成你嘅溫書嘅動力，令你繼續努力備戰！ 三大迫自己溫書嘅貼士 Credit: unsplash @XPS 1️) 減少Distractions 溫書嘅時候唔好望電話，知你班人唔會做到，一定會忍唔住偷睇電話。所以最直接嘅解決方法就係唔好帶電話去自修室！即使帶咗都一定要熄機然後擺落袋最入嗰格。 2️) 去遠啲溫書 最好可以去啲遠少少嘅自修室溫書，雖然車程會長啲，但係你唔會時時刻刻都諗住返屋企或者出去食野。個人推薦洪水橋圖書館嘅自修室、調景嶺圖書館自修室，呢啲自修室全部嘅設備都好靚同好新淨。 但係盡量唔好去啲旺區嘅自修室，例如旺角花園街圖書館自修室，因為你溫溫下書就會想落去行；屋企附近嘅自修室都唔好成日去，因為我自己就成日覺得不如返屋企溫，但係返到屋企就唔會溫。 仲有咩好地方溫書？可以睇下《【溫書好地方】一文睇哂全港邊度溫書好！》～ 3️) 用電話溫書 有時候我哋都無可避免地要用電話，例如係搭車嘅時候，你唔會咁得閒攞晒成本書出嚟慢慢溫，又或者攞份pastpaper出嚟做，因為咁樣好唔方便。所以最好嘅方法就係用電話溫書，例如事先將一啲練習影低佢，係搭車嘅時候睇。 又或者同同學或者朋友喺WhatsApp入邊互相問問題，例如互相問吓字訓、出吓MC咁樣。咁樣你一打開WhatsApp想同人傾計嘅時候，你就會見到朋友問你嘅學術問題，而唔係同人吹水嘅記錄。 （各位都可以考慮喺AfterSchool嘅問答社區問下同學仔唔同嘅問題架～） 製造動力 • 繼續備戰 Credit: unsplash @craftedbygc 講到點迫自己溫書，其實我覺得每個人溫書嘅動力都唔同。但係我都想同大家分享下究竟係我準備公開試嘅時候，有啲乜嘢動力去迫使我溫書。 對科目有興趣 我覺得第一就係興趣，雖然呢個原因真係好廢，但係如果你鍾意嗰一科嘅話，你真係會為咗個科仆心仆命，付出好多好多嘅時間去溫。 就例如我真係好鍾意經濟科，所以我除咗去做past paper之外，我更加會自己出卷，亦都會睇一啲A-Level嘅教科書，因為我知道我學DSE嘅嘢已經唔夠，同埋DSE嘅嘢好多都係錯嘅，所以為咗追求更正確嘅知識，我就會去睇更深嘅教科書，從而去加深我對唔同概念的理解。 知多啲就好了 當然有啲科目我自己冇咁大興趣，例如我自己對Bio同埋Chem本身係冇咁大嘅興趣，因為我其實鍾意歷史啊、中史呢啲文史類嘅課，但中三嗰時就揀咗Science讀，所以我本身Science嘅成績同埋對science嘅興趣都唔大高。 所以，其實我依兩科真係冇乜興趣去逼我讀，所以其實係中四五嘅時候，我呢兩科嘅成績都唔係特別好。去到中六，我就成日都抱住一個心態，就係其實我讀Chem同埋讀Bio都係最近去到中六嘅啫，我人生之後就唔會再接觸atoms啊、循環系統之類嘅嘢，所以何不喺一刻讀好啲，盡量增廣自己見聞呢？ 即使我對呢啲科目冇乜興趣都好，我本着一個知多啲就好嘅心態呢讀，盡量希望係自己唔再想掂呢兩科嘅之前學多少少，當俾個機會自己去學多少少野。可以，去到最後，我覺得唔好抗拒某一個科目先係最重要嘅，如果你一抗拒嘅話，你見到佢都唔想讀嘅話，你根本就唔會有心機讀書。所以每次讀書嘅時候，可以抱住一個心態，就係讀埋呢半年啦，我一世都唔會再見到佢㗎啦！ 考試只係一場遊戲 其實我唔知大家嘅讀書嘅動力係啲咩，我諗好多人都係話想入大學。但其實對我來講，讀書嘅目的從來都唔係為咗入大學，或者推動我努力讀書嘅動力唔係為咗話入某一啲嘅科目。 其實，我一開始並冇諗過自己會考得咁高分，我想讀嘅科目亦都唔需要咁高分，我原本只係諗住考得一次就盡力啦嘅心態去考。 同埋我當考試只係一場遊戲，由細到大我都好鍾意爭贏，凡事都要做第一，如果輸咗嘅話會覺得好冇面，所以我係唔想衰比人哋睇，尤其是我自己喺校內嘅成績都唔差，例如係通識、經濟科成日都係考頭一二名，如果自己喺校內考得咁好，出到去有冇5**我話，我會對唔住自己囉！我亦都會唔敢面對自己，比賽最後依兩科都考都5**，等我唔使跳樓！ 你嘅好勝心去咗邊！？ 而且，我覺得好勝心都係一個推動人讀書幾重要嘅因素，如果你本身個科考得好，你唔會想你自己第一第二名俾人搶走，所以你就會更加之努力讀，我以為係你考得好之後，你會越嚟越想讀。當然，我都曾經試過考得差，例如喺某啲嘅通識卷攞唔到好高分，果幾次真係非常之sad，所以係每次有啲咁嘅經歷之後，我都會更加之努力讀，同埋佢問個老師點解我攞唔到高分。呢個係我一個給大嘅讀書動力。 唔知 @dsefreegiveaway 嘅溫書貼士有無幫到你呢？有動力但係溫書嘅時候都仲係好眼訓？！唔緊要等小編教你點樣 HACK YOUR BODY啦!
