【溫書好地方】一文睇哂全港邊度溫書好!

AfterSchool
AfterSchool 2019年11月22日
考試又就來殺到,溫書除咗可以係屋企,唔少同學都鐘意約埋朋友一齊出去溫書。AfterSchool今次搵咗四大溫書好地方,包括均設有自修室嘅傳統公共圖書館、社區中心或青年中心,同學們可以慳翻排隊輪侯同埋搭車嘅時間。另外,多個市區(觀塘、旺角、銅鑼灣、尖沙咀等)嘅連鎖咖啡廳或樓上cafe都是不少同學邊chill邊溫書嘅好選擇。

考試前夕往往有好多同學埋怨溫書「溫極都唔入腦」,其實只要揀啱一個適合自己嘅地方,溫書效率自然會大大提高!AfterSchool今次就為你搵咗四大溫書好地方!

Cafe

圖片來源:Pixabay

自修室環境寧靜休閑,適合同學專心溫書。但唔知有冇同學同小編一樣,邊吃零食邊溫書就會事半功倍?相信唔少同學都會約朋友到咖啡廳溫書,一邊飲咖啡,一邊傾課題,喺氣氛舒適放鬆嘅環境下溫書。

市面上較為就同學們歡迎嘅連鎖咖啡廳分別有Starbucks同埋Pacific Coffee。前者較容易滿座,顧客可以憑單據上嘅密碼享用無限時嘅WIFI,而後者嘅WIFI則只有20分鐘時間,但滿座情況不常見。同學可以按需要自行選擇,也可以考慮較少人認識嘅Coffee Academics,喺全港設有十三間分店。

除咗Coffee Shop,唔少小型Cafe也設有充電插座同埋免費WIFI,例如有旺角嘅神經餵飼丶佐敦嘅Cafe Rovel,仲有銅鑼灣嘅Brunch Club。揀去cafe溫書嘅同學應儘量到人流較少丶或專門設有工作空間嘅樓上cafe溫書,例於觀塘嘅「木 ‧ 讀」,收費以每小時計。或是銅鑼灣丶金鐘丶旺角及荃灣都設有分店嘅Desk One,以免妨礙到其他客人。

圖書館自修室

圖片來源:香港特別行政區新聞公報

若然喺屋企專注唔到溫書,相信好多同學都會選擇到附近公眾圖書館嘅自修室。撇除車費外,同學可以免費享用政府嘅無限WIFI同埋一個小型嘅工作空間,相當符合經濟效益。

但每年到咗DSE或考試嘅季節,各自修室門前必會大排長龍。雖然同學要早啲到達排隊等位,溫書時間相對上較少彈性,但變相都係一個強迫自己早啲起身溫書嘅方法。

若同學係應屆文憑試考生嘅話,不妨等年頭嘅時候申請「學生自修室考試期間入座證」。喺每年嘅三月初至五月初,亦即各DSE考生分秒必爭之時,同學只要喺各入座時段前準時到達,即可憑證skip-the-line直接入座,慳翻唔少寶貴時間。

社區中心/青年中心/青年廣場

圖片來源:Pixabay

雖然公共圖書館嘅自修室配套完善,一向係不少同學溫書地方嘅首選,但考慮到某啲同學嘅屋企同埋自修室嘅距離較遠,同學可以考慮設有自修室嘅大型社區中心丶青年中心或者係青年廣場,慳翻排隊同埋搭車嘅時間。因為滿座嘅情況較少見,所以小編建議同學夜晚嘅時侯去,食完晚餐行兩步落街溫書,唔洗趕住搭車出去自修室排隊咁緊張嘛!

一般黎講,同學只要辦理簡單入會手續並繳交會費則可使用。想知道自己地區嘅自修室位置? 可參考教育局嘅自修室名單

 

屋企

圖片來源:Pixabay

每次溫書之前都要拎一大堆書丶補習筆記同埋文具出嚟「擺陣」。因為所需嘅物品太多,若然同學家中有一個寧靜舒適嘅私人空間溫書,其實留係屋企溫書都係一個唔錯嘅選擇。一方面可以慳翻行路或搭車嘅時間,另一方面,溫書時間亦更加有彈性,一舉兩得!

揀完溫習地方,下一步就可以諗下點樣提升學習效率,想掌握一招可以輕鬆Double學習效率嘅方法就入嚟呢度喇!

【2020 DSE Mock Exam】你唯一需要嘅模擬試

現正開放早鳥報名,快啲嚟【呢度】睇下詳情喇!