知道好多家長都好緊張小一派位，但又對成個小一入學申請程序好迷茫，成日都收到唔少查詢我哋有關小一入學嘅事項，例如小一統一派位係啲咩、小一入學申請表點填。其實小學派位程序主要分為自行分配學位、統一派位同叩門，有各自嘅報名程序，連小一放榜日期都唔同。今次 AfterSchool 小編就特別整理咗統一派位嘅資料，會用數據同統一派位嘅程序講解下到底小一統一派位填表嘅注意事項，同埋希望可以幫到咁多位家長同子女成功獲派統一派位前三志願！
目錄
小一入學申請校網
| 區域 | 小一學校網編號 |
| 中西區 | 11 |
| 灣仔 | 12 |
| 北角/筲箕灣/柴灣 | 14, 16 |
| 薄扶林/香港仔/黃竹坑/赤柱 | 18 |
| 油麻地/尖沙咀/旺角 | 31, 32 |
| 何文田/紅磡/九龍城 | 34, 35, 41 |
| 深水埗 | 40 |
| 黃大仙 | 43, 45 |
| 九龍灣/牛頭角/觀塘/油塘 | 46, 48 |
| 荃灣 | 62 |
| 葵涌/荔景/大窩口 | 64, 65 |
| 青衣 | 66 |
| 屯門 | 70, 71 |
| 天水圍/元朗 | 72, 73, 74 |
| 上水/粉嶺/北區 | 80, 81, 83 |
| 大埔 | 84 |
| 沙田 | 88, 89, 91 |
| 西貢/將軍澳 | 95 |
| 離島/東涌 | 96, 97, 98, 99 |
小學申請總共分咗 19 個區、36 個校網，如果想睇吓自己心水嘅小學屬於邊個校網，可以上返教育局小一學校網選校名冊睇。
小一入學申請時間表（2022年）
| 2021年9月2日至9月27日 | 索取小一入學申請表 經幼稚園、幼稚園暨幼兒中心、各民政事務處、教育局學位分配組及各區域教育服務處派發。 |
| 2021年9月20日至9月27日 | 遞交入學申請表 家長將填妥嘅小一入學申請表直接交返去申請自行分配學位嘅官立或資助小學。 |
| 2021年11月22日 | 學校公佈「自行分配學位」結果 每所官立或資助小學各自公佈「自行分配學位」嘅取錄名單。 |
| 2021年11月24日至11月25日 | 註冊「自行分配學位」 獲派「自行分配學位」嘅學童辦理小一入學註冊手續。 |
| 2022年1月22至1月23日 | 參加統一派位 未獲「自行分配學位」嘅學童嘅家長前往統一派位中心為子女辦理選擇學校手續，填寫小學統一派位表格。 |
| 2022年6月1日至6月2日 | 教育局公佈小一統一派位結果 因疫情關係，小學放榜後，教育局會將印有統一派位結果嘅《小一註冊證》，透過香港郵政嘅『本地郵政速遞』以上門形式派遞畀家長。 |
| 2022年6月7至6月9日 | 註冊「統一派位」學位 獲統一派位嘅學童嘅家長須依照指定日期，前往獲派嘅學校辦理入學註冊手續。萬一唔得閒，記得寫定小一註冊授權書，可以參考授權書樣本。 |
小學統一派位
Credit: unsplash @Tim Mossholder
小一入學「統一派位」係小學派位機制嘅第二階段，一般喺自行分配學位放榜後未分配到學位，就需要進入呢個環節。
統一派位嘅「選擇學校表格」分為兩部分，
- 甲部：每間小學提供約 5% 學額作為全港統一派位，而家長可以不受校網限制選擇最多3間學校
- 乙部：每間小學提供約 45% 學額作為校網內統一派位，家長按照自己意願決定次序
甲、乙選擇可以重疊，但喺同一部份重覆填相同嘅選擇，唔會增加獲派該所學校的機會。
| 學校網 | 甲部：不受校網限制(1-3) | 乙部：住址所屬校網(1-3) | 乙部：住址所屬校網(4-10) | 乙部：住址所屬校網(Beyond 10) | 總計 |
| 港島 | 361 | 2468 | 449 | 368 | 3646 |
| 九龍 | 5336 | 1153 | 987 | 8369 | 14671 |
| 新界與離島 | 1497 | 8970 | 2266 | 1787 | 14520 |
| 校網總計 | 2751 (5.7%) | 16774 (34.6%) | 3868 (8%) | 3142 (6.5%) | 26535 (54.8%) |
以上係 2021 年度經統一分配學位同獲派選校志願嘅數據，可以睇到只要你識玩，喺統一派位階段大部份人都可以派獲頭三志願（甲部同乙部加埋）。
統一派位程序
- 電腦會畀每個申請人一個「隨機編號」嚟決定分配學位嘅先後次序
- 處理甲部「不受學校網限制」嘅選校排名
- 處理乙部「住址所屬學校網」嘅選校意願
- 以每一個志願作為輪次，即係會首先審閱所有申請人嘅第一個學校選擇
- 然後先到所有人嘅第二選擇，如此類推⋯⋯
| 申請人 | 第一志願 | 第二志願 | 第三志願 |
| 小明 | A | B | C |
| 小東 | A | C | B |
| 小花 | B | A | C |
| 小新 | A | B | C |
| 小綠 | B | A | C |
以上面呢個表為例，抽籤次序先後分別為小明、小東、小花、小新、小綠。
A、B、C學校各有兩個名額。
第一輪：
小明第一個選A，入讀A
小東第二個選A，入讀A
小花第一個選B，入讀B
小新第三個選A，A學校已滿，需要等到第二輪睇第二志願
小綠第二個選B，入讀B
第二輪：
小明已入讀A，唔洗重選
小東已入讀A，唔洗重選
小花已入讀B，唔洗重選
小新第三個選B，B學校已滿，需要再等第三輪睇第三志願
小綠已入讀B，唔洗重選
第三輪：
小明已入讀A，唔洗重選
小東已入讀A，唔洗重選
小花已入讀B，唔洗重選
小新第一個選C，入讀C
小綠已入讀B，唔洗重選
所以，你會發現即使小新嘅次序係前過小綠，但因為每輪都會睇哂所有申請人嘅志願先，所以最後小新去到第三輪（第三志願）先有學校有位收佢。
小一統一派位填表策略
呢張就係統一派位嘅申請表樣本，甲部選擇可以填三間位於任何學校網嘅小學，而乙部就可以填三十個所屬校網嘅小學。
統一派位有兩樣重點：
- 睇哂所有學生嘅甲部選擇，之後先睇乙部選擇，所以甲部嘅第二、第三選擇其實係優先過乙部嘅第一選擇
- 甲部選擇獲派位嘅成功機會係較微（成個統一派位階段，甲部只佔5%學額，而乙部有45%學額）
因為以上呢兩個重點，所以有幾樣嘢一定要注意！
- 甲部選擇一定要係最心水嘅學校！如果乙部第一選擇更為心水，就寧願漏空甲部第二同第三選擇！
因為統一派位係先睇甲部、後睇乙部，而如果你已經獲派學位，就唔會再睇你其他選擇；亦即係如果你甲部第二、三選擇嘅學校中咗，就唔會再睇乙部第一選擇，變相你入到間相對無咁心儀嘅學校。所以，如果有心水學校，寧願漏空都唔好諗住「蝕底」格硬填！
- 如果心儀嘅小學喺校網內，統一派位申請表嘅甲部同乙部最好都放落第一！
因為甲部同乙部嘅選擇可以重覆，而且乙部嘅學額佔統一派位45%，放多次喺乙部就可以增加成功率，同時表達到你真係好想入呢間學校，萬一真係運氣唔好，日後叩門都更大機會。
- 統一派位嘅乙部最重要係頭5個選擇
乙部頭5個選擇都諗清諗楚，唔好將全部都係非常熱門嘅學校放哂頭5，最好第3、4個選擇放啲次熱門嘅小學，隱陣為主，否則萬一運氣唔好，真係有機會派到好後。
- 就算無咁多心水學校，都要填哂乙部嘅果30個選擇。
因為統一派位到最後，係每個學生都一定會有學位，所以就算你唔填，你都會自動獲派一間小學，與其放棄由佢隨機，不如都花少少時間盡量填哂30個選擇。
統一派位中心資料
Credit: unsplash @haseebm
統一派位中心係非常重要，每年嘅位置都略有不同，主要係指定期間負責以下兩樣嘢：
- 派發和收回「選擇學校表格」
- 派發「小一註冊證」
由於統一派位中心地點眾多，可以去返教育局網頁睇返。
小一叩門攻略
其實大部分官津學校都有喺學校網站公佈申請後補學位嘅方法，多數收表嘅截止日期都定喺小一入學註冊日前，所以除咗少數官津學校表明採取先到先得政策，或即日面試之外，一般喺小一放榜後，家長都會有大約兩日時間到心儀學校交表叩門。
叩門準備嘅文件
家長記得盡早睇清楚心儀學校嘅安排，下載同填好有關表格，準備以下文件嘅正副本：
- 小朋友出世紙
- 家長身份證
- 派位表格
- 幼稚園成績表
- 證件相
- 領洗紙
- 證書/ 獎狀
- 貼足郵票的回郵信封
想增加成功率絕對唔少得「叩門三寶」：
- 申請信：用英文寫，電腦打印，最緊要清楚易讀、簡明扼要，一般3-4 段文字就可以
- 推薦信：如果識啲校監、名人、牧師，當然最好搵佢哋，但呢啲重量級人物相對都難搵。所以大多家長都會搵返幼稚園校長，咁就記得最遲喺5月前主動問吓校長；如果子女跟啲好出名好勁嘅老師學嘢，都可以請老師幫手寫推薦信。
- 個人檔案：一般都係放返基本資料、學業成續、參與過嘅活動同專長、以及比賽嘅獎項同證書副本。
叩門選擇咩學校？
- 留意學校可以提供幾多小一叩門嘅位：一般每班可以酌情收多1個學生(叩門位)，加每班1個重讀位；有啲傳統名校經教育局准許，叩門位可以收小一總人數嘅10%，再加每班1個重讀位。所以舉個例，如果某傳統名校有5班小一，每班30人，「150人×10%+5人」，即係小一全級最多可以提供20個叩門位。
- 留意有無「111」限制：有啲學校只會接受曾經喺「自行分配學位」及「統一派位（甲部及乙部）」以果間學校作為第一志願嘅申請人（俗稱「111」）
叩門面試考啲咩？
小一面試多數都係會問及中英數嘅學科問題，如果申請信提及過小朋友有獨特才能，例如唱歌、跳舞等，都有機會要小朋友即時表演。家長都要了解學校教學方向、點解希望子女入讀同對學校嘅期望。
其他常見問題
Credit: unsplash @Volodymyr Hryshchenko
1.申請私立同直資小學嘅分別？
獲私立小學取錄嘅學生依然可以參加官津小學嘅「小一入學統籌辦法」（即係經自行分配學位或統一派位入學）；而接受直資小學學位嘅家長，就要簽署一份承諾書，應承會放棄參加官津小學嘅「派位」，不過個份承諾書無要求家長放棄其他直資小學嘅學位，所以都係可以繼續參與其他直資小學嘅面試。
2.我無揀__小學，點解都會入咗去？
統一派位有個最重要嘅原則，就係一定會分派一個小學學位畀申請人，無論呢間學校你本身有無選擇，所以如果你申請統一派位，建議你有心水學校就盡量填滿乙部30個選擇。
3.如果我唔得閒去幫小朋友辦理小一註冊，可唔可以搵朋友或親人幫手？
當然無問題啦，不過記得要準備定小一註冊授權書！授權書樣本可以參考下圖：
希望咁多位家長睇完以上嘅資料，都知道小一統一派位程序係點，最緊要係知咗統一派位嘅遊戲規則，填表時可以精明咁揀小學！同埋一啲小小嘅叩門攻略，放榜想叩門都唔洗咁驚慌，最後可以順利入到心水嘅小學！
