【2022 DSE考生必睇】DSE Chem化學操卷全攻略

The Chemist🧪
The Chemist🧪 2020-9-16 29,135
讀 DSE Chem 嘅中六同學得返唔夠一年就要考試,考 DSE 離唔開操卷,點操卷先最有效?得咁少時間又追唔追得切?等 The Chemist 教你DSE Chem 化學操卷全攻略!
原來仲有唔夠一年就到 2022 DSE 考 CHEM 嘅日子!讀中六嘅你唔係得返好多時間,咁係有限嘅時間入面點溫習、點操卷先最有效率?操卷難就難在點樣可以透過操卷去搵出自己嘅弱點、提升自己嘅實戰能力。為咗幫大家有系統咁溫晒 DSE Chem 三年嘅內容,我決定分享呢套溫習攻略。如果你到呢一刻都未有一個具體嘅溫習計劃,麻煩你一定要認真睇落去,因為呢篇文好有可能可以救你一命!

DSE Chem 化學嘅考核要求

根據考評局 2022 年化學科評核大綱,化學 Chem 嘅考試只有原本「公開考試」嘅部分,「校本評核」(即係SBA)將會取消。
「公開考試」有分試卷一 (必修部分) 同埋試卷二 (選修部分):
  • 卷一 Paper 1 (必修 Compulsory)(考試時間 2 小時 30 分鐘,佔全卷 75 %)
    • Section A: 多項選擇題 MC (佔全卷 22.5 %)
    • Section B: 短題目 short questions、結構體 structured questions、論述題 essay questions (佔全卷 52.5 %)
  • 卷二 Paper 2 (選修 Elective) (考試時間 1 小時,佔全卷 25 %)
了解清楚 DSE Chem 嘅考核方式之後,我哋就可以開始就住以下嘅重點去操卷!

DSE Chem 操卷前準備

清楚了解 Syllabus 變動

其實 2022 DSE CHEM 真係有唔少變動,唔單止評核大綱變咗,更 cut 咗唔少 syllabus!要打贏 DSE 呢個遊戲嘅首要條件就係掌握到個「遊戲規則」,syllabus 改咗都唔知,亂咁溫亂咁背,嘥時間溫多咗嘢都算,溫錯咗先大鑊。(已經聽過有啲老師都無提翻同學,搞到好多同學嘥時間背咗啲唔會考嘅嘢)
如果你唔係100%清楚個 syllabus 的話,記得自己 Google "DSE CHEM Syllabus" 睇睇,唔好依賴任何人,因為考試嘅係你。就算之前拎咗我嘅《Out C 終極懶人包》都要下載嚟睇睇,我嗰份只係一個 summary。

理解操 Past Paper 嘅原因

其實你知唔知點解要操 Past Paper?⠀
好多人為操而操,但就無諗過點解要操卷。連目標係咩都唔知就走去操,你覺得真係幫到你提升成績?我認為操卷要達成嘅目的主要有三個:⠀
1)提升 DSE 實戰能力
除咗日校大考外,正常學生根本無乜機會去操卷。但 DSE 真係一場「七分實力,三分運氣」嘅遊戲,而想提升實力同運氣就要多練習,確保到時 DSE 嘅臨場發揮可以穩穩陣陣!
2)測試自己對 DSE 題型嘅理解程度
喺呢個過程你要搵到自己嘅強項弱項,從而調整你嘅溫習策略以得到最佳嘅回報!⠀
3)預測 DSE 成績
畢竟考試只係過程,每個人嘅目標都係拎住呢個成績入讀心儀大學。排 JUPAS 都係一個策略,要排得靚就必須要有能力以最大準確度去預測自己嘅成績!⠀
接下來我會針對呢三大操卷目標,去話你知點樣「操」先可以真正幫到你考好 DSE !

DSE Chem 化學嘅操卷順序

By Topic 重溫課題嘅 concept 同題型

考 2022 DSE 嘅學生得返唔夠一年就考 DSE,但升上中六其實好多中三、四嘅課題嘅 concept 同題型都唔記得七七八八,所以強烈建議大家先 By Topic 咁溫書同埋操 Paper。
12 個 Core + 2 個 Elective 前後 14 個課題,依加九月開始平均一個星期操一個課題,大約去到十二月就要操得晒所有課題!(一星期一個課題唔會花你好長時間,咁樣都 commit 唔到真係好難幫你)⠀
依加開始準備定課題操練嘅 schedule(建議無咩特別嘅就由最簡單嘅開始),再準備好要操嘅 By Topic CE/DSE PP(係我嘅學生之後會比埋相關資源你,唔洗你晒時間自己搵),咁花少少心機就可以 K.O. 全部課題。

By Year 高強度操練 DSE Past Paper

By Topic 操完你嘅根基應該會札實好多,去到呢嘅 stage 你需要 Full Paper 咁樣操,單計 DSE 有 10 份卷左右(CE、AL 都無咩意思)。平均一星期操 1 - 2 份,咁去到一月(最遲二月)就可以操晒。
中六同學要記得自己嘅時間有限,所以一定要跟足時間表去操,如果唔係我教埋你操卷嘅具體時間分配都冇用!
 

DSE Chem 操卷三大重點

重點一:100% 跟足 DSE 要求

要提提大家,操卷時需要 100% 跟足 DSE 要求!有同學會問我:提早做完 Past Paper 可唔可以對卷?答案係「唔可以」!唔講 DSE 講你學校大考,你做完有時間剩都會對下卷掛!如果你用 1 個鐘就做晒,咁麻煩你剩低 1.5 小時都同我專心對卷、check 答案,直到你手機上嘅 timer 開始響起為止!
又有人問,「有唔識做可以點算?」咪做咗識做果啲先囉,有時間剩再翻嚟睇下識唔識做。唔好同我講見到有條題目唔識就走去 Google 或者搵筆記,因為 DSE 考試咁做嘅話你應該可以儲定錢報下一年嘅 DSE 了...⠀
其實自己操卷時做任何動作前都問自己一句:「如果而家考緊 DSE,我可唔可以咁做呢?」就得。奈何我實在聽過好多同學講一套做一套,希望你今日睇完真係會聽話!

重點二:極仔細對 Marking Scheme

Marking Scheme 同考評 Report 實在有太多嘢可以學到,特別係 LQ 好多同學連點計分都唔識,所以做完 PP 一定一定要對翻考評份 Marking。同學要留意翻啲 keywords,有唔肯定啱定唔啱嘅地方可以問老師或者問我。改卷嘅時候,寧願改得緊啲都唔好放水比自己,自己改得鬆手對你百害而無一利。你仲可以搵個朋友一齊做之後交換卷去改,因為自己做又自己改好容易有盲點。⠀
Marking Scheme 其實同貓紙無分別,已經講晒比你知點樣先可以贏到呢場遊戲,咁都唔肯花時間睇嘅話真係會輸蝕好多!

重點三:紀錄錯題並重溫

紀錄錯題並定期重溫,再調整溫習策略,都係非常重要。操完知道自己幾分就算數嘅同學,其實同掉咗份卷落垃圾筒無分別。記住操卷嘅其中一大目標就係反思、調整、進步。以下幾個 steps 大家可以跟住做,咁做卷先最有用:
Step 1:By Topic 去紀錄錯題(連同 Marking Scheme)
建議大家唔好重新抄一次條題目,因為真係好晒時間。一係影相,一係剪亂份卷貼去本筆記到,再唔係開個 Google Sheet 記得佢都得!⠀
Step 2:調整溫習策略⠀
By Topic 分類嘅好處係等你可以從宏觀嘅角度去睇下自己邊個課題最弱,再去調整你嘅溫習策略。只有咁樣做你先可以真正透過操卷去提升自己嘅成績。⠀
Step 3:定期重溫 DSE 錯題⠀
你需要每星期至少做多一次曾經錯過嘅 DSE 題目。做嘅時侯一樣先做一次,然後再對 Marking 睇下自己啱幾多。⠀
就算啱晒都唔好自滿,因為要將過去嘅失誤轉化為長期記憶就需要不斷重複嘅練習。
 

2022 DSE Chem 最新安排

重申一次,2022 DSE Chem 嘅遊戲規則大改,本來佔分 20% 嘅 SBA cut 咗,令到 elective 部分變得尤其重要。點解?好簡單計條數比你睇:
Paper 1 兩個半鐘考 12 個課題,佔比 75%,除翻開條數即係平均一個課題佔比約 6.25%
Paper 2 一個鐘考兩個課題,佔比 25%,除翻開一個課題佔比約 12.5%⠀
雖然每個課題嘅「份量」唔同,有啲多啲、有啲少啲。但係咁樣換算落嚟,平均溫 elective 嘅回報率係比 core topic 高出兩倍之多!
嚟緊,我會搞一套免學費嘅《MOLE數思維特訓班》(適合DSE 2022 嘅同學仔),務求幫你用最短時間重新掌握 DSE 必出嘅 MOLE 數題型,同時教你一套「Google Map 拆題法」,用短時間大幅提升你嘅 DSE CHEM 實戰搶分能力!想知道更多詳情?快啲點擊呢度睇睇喇!

我另外仲有一套都係免學費REDOX 思維特訓班》(適合 DSE 2023 嘅同學仔),幫你真正理解 "Redox Reaction"、"Oxidation Number"、"常見 O.A.、R.A." 等抽象難明嘅概念,學習推論 Redox Equation 嘅 100% 穩陣方法,再教你 DSE 必出題型滿分答法!想 KO Redox 就記得撳呢度睇吓~
免費 DSE 電子報
定期為 30,000+ 中學生送上實用 DSE 資訊和資源
The Chemist🧪

The Chemist🧪

🚀定期分享 DSE CHEM 嘅學習心得、應試技巧🧪港大化學系畢業.專科專教🎖港大理碩士學歷.鑽研最強教學法🏅曾與港大教授進行兩年教育研究🏆多年DSE教學經驗.曾教授近百學生