【DSE中文作文】2020中文卷二寫作題目分析

吾同中文 | Maychu
吾同中文 | Maychu 2020-9-30 10,366

「中文作文卷佔分咁重,但我又唔知有咩好溫......」← 呢個係好多同學都有嘅疑問。其實,大家可以透過睇多啲唔同嘅作文題目、範例佳作,仲有範文分析去令自己嘅寫作進步。我個人覺得分析下歷年嘅 DSE 中文作文 Past Paper 就係一個唔錯嘅溫書選擇。為咗各位 DSE 2021 準考生,Maychu 我今日就決定幫大家寫一篇《2020 DSE 中文卷二寫作題目分析》,等大家可以透過我嘅分析,了解下唔同題目嘅特點、相應嘅寫作技巧,同埋點樣透過題目就可推測到考評局嘅評分標準。

 

 

DSE中文寫作卷二考啲咩?

考核內容

中文卷二,即係寫作能力卷。顧名思義,佢考嘅係同學嘅中文寫作能力,並會從文章嘅構思表達創作能力各方面對學生進行評核。

簡單嚟講,就係睇下同學:

  • 有冇建構一篇完整文章嘅能力
  • 可唔可以用適當嘅語句描述故事情節
  • 可唔可以用富於邏輯嘅語句去陳述自己嘅觀點

 

佔分比例 (DSE 2021 中文科最新改動)

「卷二寫作能力」佔 DSE 總分嘅比例甚高,往年佔整個中文科嘅 24%

受疫情影響,根據考評局,2021 DSE 中文科取消咗「卷四說話」,寫作卷所佔嘅比例更大幅上升咗 8%,佔中文科總分 32%

對 2021年嘅考生嚟講,寫作卷更加不容有失!

 

考試模式

按往年經驗,中文作文卷一般會提供三條唔同類型嘅題目。同學可以從中選其一,然後寫作文章一篇。

中文作文卷最低字數要求為 650 字,如果寫唔夠 650 字係會被扣分

不過值得注意嘅係,卷二寫作能力並無字數上限,而整份卷嘅考核時間只有一個半小時,所以同學要把握機會,喺有限嘅時間內寫最多嘅字。好現實咁講,字數嘅多少同文章論述嘅飽滿程度係成正比

當然啦,我所講嘅字數係指同文章內容緊密相連同主題息息相關嘅內容,而唔係指湊字數嘅廢話

 

2020考試題型分析

既然中文作文咁重要,不如等我喺度同各位分析下 2020 DSE 所出嘅三條題目,幫大家稍為掌握審題方法,更深入咁了解不同題目類型嘅思考方式。

 

題目一 (描寫文):「嚴以律己,寬以待人」

在我認識的人當中,他最能體現「嚴以律己,寬以待人」的美德。試寫作文章一篇,描述這位人物的言行。

 

同往年嘅題目編排有啲似,2020年嘅第一題都係「描寫類」嘅文章,但今年唔單止要記敘一件事,更需要透過對件事嘅描述表現出人物性格

定義題目

收到題目之後,決定揀唔揀呢條題目嘅前提並唔係自己文筆嘅好與壞,而係你有無信心完全理解「嚴以律己,寬以待人」呢個八隻字,以及有無把握諗到一件同呢句描述相關嘅事

「嚴以律己,寬以待人」呢個描述嘅意思係:對自己嘅要求好嚴格但係對別人就好寬容

因為呢個描述分成咗兩部分,所以有啲同學會認為可以用兩個場景,分別展示人物「嚴以律己」同「寬以待人」嘅一面。由於題目無限定淨係可以寫一件事,所以呢種寫法都可以嘅。

不過,我會建議同學喺同一個場景入面,寫曬人物對自己要求嘅嚴格,但對他人犯下嘅錯誤就會十分理解同寬容嘅表現,因為咁樣文章結構會更緊密

題目仲有一個成日被忽略嘅字眼,就係個「最」字。題目中寫到「在我認識的人中,他『最』能體現」,所以同學亦需要緊扣呢個字眼。但我哋可以點樣突出個「最」字呢?咁就需要透過比較 (例如同身邊其他人嘅行事進行比較)。呢個比較唔需要寫到長篇大論,只需要喺文章入面有意識咁樣勾畫出,例如寫出主角同其他人喺同一情況下嘅處理方式有咩唔同,就已經可以點出呢個「最」字。

 

描寫文

題目提到「描述這位人物的言行」,所以行文中敘事嘅重點應該擺喺人物語言行動描寫上,透過呢啲描寫去反映人物性格。透過觀察唔同嘅範文,我哋可以得知,好嘅描寫文行文都要盡量避免平鋪直敘,以及流水帳或者白描嘅寫法。除此以外,喺呢類寫人嘅文章,人物嘅肖像描寫係必不可少嘅。肖像描寫嘅精髓在於,你需要描述人物特別具有辨識度嘅外表特徵,令讀者可以透過你嘅肖像描寫,喺腦海入面勾勒出人物嘅形象。

再補充一個小小提醒,由於題目入面用咗「他」呢個字眼,所以穩陣起見,你文中描寫嘅人物最好係一位男性

建議場景:同學可以寫平日學習生活中常見嘅場景,例如同其他同學一齊做小組功課、參加課外活動,又或者籌備活動嘅過程。呢類唔單止係大家都經歷過嘅事,容易令人產生共鳴,亦同時係一啲容易產生衝突或者出現錯誤嘅場景,較易呈現到主角對於自己要求嚴格,但對他人行為比較寬容嘅表現。

 

題目二 (議論文/記敘文):「微笑以對」

在人生路上,面對各種處境,我們都能微笑以對嗎?試以「微笑以對」為題,寫作文章一篇。

 

呢一題就係所謂嘅「開放題」,淨係比出一條題目,無規定文體,亦無規定題材。

定義題目

呢種題目嘅發揮空間好廣,同學可以選擇單純咁寫篇議論文,亦可以選擇用敘事嘅方式帶出對「微笑以對」嘅睇法或者相關嘅議論。

題目嘅描述只得一句話,所以我哋可以拓展「微笑以對」,講下呢個短語嘅引申意思,以「微笑以對」代表一種人生態度,而唔單止只係一個表情咁簡單。「微笑以對」可以指我哋喺惡劣處境中所保持嘅一種樂觀態度,又或者係一種對他人親切嘅態度

然後再思考,喺乜嘢場合或者景況之下,我哋會表現出呢一種態度。

面對自己人生嘅低谷嘅時候?

面對自己生活困境嘅時候?

面對他人為你造成各種麻煩處境嘅時候?

他人犯下錯誤嘅時候?

 

議論文

若以議論文體書寫,同學可以考慮論述「微笑以對」呢種態度對於人生嘅影響 (可以係正面或者負面)。喺論述之後,同學可以再比一個同「微笑以對」呢種態度有關嘅生活建議,又或者將呢種態度同當今社會嘅狀況勾連鼓勵呼籲大家對於生活都應該 / 唔應該採取呢種態度。

 

記敘文

若以記敘文體書寫,同學可以參考上面所提到嘅一啲狀況,然後再建構一個事件作為文章主體。喺呢件事嘅框架入面,我哋需要強調「微笑以對」呢四隻字,所以同學不妨採取前後對比嘅寫法。

例如:

先寫寫之前可能會以比較消極嘅態度對待事件,然後描述一個受他人開導,或者受身邊人行為潛移默化嘅情節,之後再講述自己從中所領悟到「微笑以對」嘅態度,而呢種態度又為事件帶嚟咗咩良好嘅影響。

同學都可以喺寫嘅過程入面,運用神態描寫嘅手法,仔細描寫一個微笑,然後呢個微笑可以成為全文嘅線索。咁樣既能夠扣題,亦都可以令文章嘅結構更加緊密

喺過往唔同嘅中文作文範文入面,我哋都可以觀察到結尾出現「昇華主題」呢個動作。因此,同學不妨喺文章結尾運用「以小見大」嘅寫法,帶出呢種做法對於人生未來嘅規劃有咩影響;又或者喺整個社會層面而言,如果大家廣泛地都採用此種做法,會帶來乜嘢正面嘅影響,最後再回應多一次你自己對該種做法嘅睇法。

 

題目三 (議論文):「送禮之我見」

農曆新年,一心收到親戚送來的禮物。

一心說:「每年都送來不合用的東西,不送也罷。」

一心的姐姐說:「禮多人不怪。」

一心的弟弟說:「千里送鵝毛,禮輕情意重。」

各人對送禮都有自己的看法。

試以「送禮之我見」為題,寫作文章一篇。

 

題目三要求同學書寫議論文。

定義題目

「送禮之我見」呢條題目需要同學寫出對於「送禮」呢種行為嘅自我見解,即係你自己會對呢種行為有啲咩睇法。其實,呢個只需要同學喺文章入面表達議論嘅時候,寫返多啲「我想」「我認為」嘅字眼,咁就已經可以扣返「我見」呢個題眼

面對呢啲有咁多題目解說嘅文段式題目,我哋需要對文段內容字字斟酌,喺文段內容入面挖掘自己可以用到嘅寫作方向,唔好淨係望住條題目,然後大腦一片空白。

以第一句「農曆新年,一心收到親戚送來的禮物」為例,呢一句入面已經可以提到送禮嘅時間、場合,以及送禮原因呢一啲可能嘅思考方向。

從一心嘅評論「每年都送來不合用的東西,不送也罷。」可以分辨到佢應該係一個實用主義者,對於冇實際用途嘅禮物會持負面態度,佢寧願唔收。呢度可以引申嘅方向就係,如果對方係一個理性嘅實用主義者,你送一啲佢唔需要嘅禮物,可以引起對方反感,令送禮嘅效果大打折扣,甚至適得其反;又或者可以諗,如果送對方認為無用嘅禮物,其實係會造成浪費

比起禮物嘅實用價值,姐姐嘅評論就集中喺禮物嘅數量禮物本身所包含嘅社交意義,所以我哋可以就禮物本身所包含嘅意義進行議論;弟弟嘅評論就著重於禮物背後所包含嘅情誼,係一啲感情上面嘅感悟

 

議論文

同學可以根據返我上面比出嘅方法逐步分析。大家會發現其實題目入面已經有好多寫作嘅提示

除咗傳統嘅議論文體以外,呢條中文作文題目仲可以選用夾敘夾議,或者係敘事議論嘅方法書寫,例如用一件自己親身經歷過嘅送禮事件,再就呢件事件唔同嘅發展階段,發表返自己嘅睇法。但係要留意返,對於呢篇文章嚟講,議論嘅段落先係文章嘅主體,敘事嘅描述只係為文章嘅議論服務,所以唔係主體。事件情節嘅鋪排亦需要緊扣你所提出嘅論點,留意返敘述同埋議論嘅比例最好就係五五分,議論嘅部分甚至可以佔六成。
 

****以上就係我分析 DSE 2020 中文作文卷三條題目 + 唔同嘅範文所得出嘅一啲小貼士,希望可以幫到咁多位溫緊書嘅同學仔啦!記得,小心審題係中文作文嘅其中一個好重要嘅考試技巧!

前面都提到,DSE 中文寫作卷二所佔嘅比例喺 2021年大幅增加,所以呢份寫作卷絕對不容有失。同學喺備考嘅過程入面一定要多作操練,而且多作思考,鍛鍊自己嘅思考速度同埋建構文章嘅速度,令自己可以喺呢短短嘅 90 分鐘考試入面,寫到一篇令評卷員眼前一亮嘅高分之作,為自己 DSE 總分如虎添翼,更上一層樓。

如果各位想了解點樣可以輕鬆寫出一篇高分嘅作文,特別係議論文,不妨嚟參加我嘅免費課堂《議論文實戰攻略班》!喺課堂入面,我會同大家講解下「DSE 議論文嘅搶分攻略」同「7大論證手法」,盡力幫大家中文作文攞到 Lv 5+!大家仲會收到一本《議論文實戰攻略》,入面唔單止會有 5** 議論文結構 + 鋪排,仲會有實戰分析 + 自擬範文例子

快啲免費報讀議論文實戰攻略班》啦!

 

免費 DSE 電子報
定期為 30,000+ 中學生送上實用 DSE 資訊和資源
吾同中文 | Maychu

吾同中文 | Maychu

教學與我並生,吾同中文齊一