想追尋更多元化、更自由嘅學習環境？去海外留學，特別係英國升學，係個唔錯嘅選擇！去之前，大家記得要了解埋 UCAS、英國大學排名、留學生活費用、大學收生入學要求、Visa 證件申請、英國升學專家顧問 Agent 等資訊！不如等 AfterSchool 同大家講下《英國留學須知》啦！ 英國升學好唔好？ credit: unsplash @charlespostiaux 無論你係 F5 唔想考 DSE，定係 DSE 成績唔理想嘅 F6 放榜生，又或者純粹想體驗海外留學生活、離開香港發掘個人興趣、能力所在，英國升學都係一個唔錯嘅選擇！ 完善、多元化嘅教育體制 「英國」一直都係港人海外升學嘅首選。英國唔單止有完善嘅教育體制，仲有多元化嘅課程同科目選擇，比起喺香港，同學有更多機會入讀心儀學系！ 性價比高 英國升學優點多多，比起讀書時間較長嘅國家 (e.g. 美國)，一般英國學士課程3年制同家長慳錢又幫子女慳時間，性價比非常高。（醫科大概讀 5 - 6 年，部分科目一可能會提供一年實習機會） 認受性高 同時，英國大學好多都喺世界名列前茅，佔咗近兩成嘅「世界百大名校」。佢哋非常重視學生個人品格、創造力、領導力等全面發展。公立大學更加有政府把控教學品質，令英國畢業生學歷認受性高，備受本港僱主青睞。 【英國升學制度】建議幾時去英國讀書留學？ 有計劃去英國讀書，但唔知幾時起步好？ 升讀英國中學 credit: unsplash @tesecreates 以下呢幾個時間點都係去英國讀中學、銜接兩地學業嘅好時機。 時間點 1 (讀完小學五年級)： 讀完小五之後 (大約 11 歲) 過英國讀 Year 6 或者 Year 7。 時間點 2 (讀完小學六年級)： 讀埋小六 (大約 12 歲) 去英國讀 Year 7 或者 Year 8 。 時間點 3 (讀完中一)： 讀完 form 1 (大約 13歲) 之後去英國讀 F3 (Year 9)。 ***由於 Year 9 距離考 GCSE 公開試仲有 3 年，呢一年學生嘅學業壓力唔算太大，同學可以參加唔同嘅課外活動，把握時間探索自己感興趣嘅科目，享受英國寄宿學校生活，係一個適應英國生活嘅好時機。另外，同學亦會喺呢年揀定 Year 10 要讀嘅「GCSE 中學會考」修讀科目。 時間點 4 (讀完中二)： 讀完 form 2 (大約 14 歲) 去英國讀 Year 10。 時間點 5 (讀完中三)： 讀完 form 3 (大約 15 歲) 去英國讀 Year 10 或者 Year 11。 時間點 6 (讀完中四)： 讀完 form 4 (大約 16 歲) 去英國讀 Year 12，就讀高中 A-Levels 或 IB 課程。 升讀英國大學 4 大途徑 credit: unsplash @evanmichaelimages 想升讀英國大學，一般可以考慮四種途徑 讀 Foundation 後升 Year 1 讀 International Year 1 後直升 Year 2 讀一年 A-Level 之後考 Year 1 直接升讀英國大學 Year 1 呢四種方式各有利弊，大家可根據自己嘅成績、信心程度、心儀大學、科目等方向考慮。 1. 英國大學基礎班 (Foundation Programme) 呢個途徑適合讀完 F5 但唔打算考 DSE，又或者喺 DSE 失手嘅同學仔。 同學只需讀一年 Foundation，再加三年大學本科課程，合共四年就可以攞到學士學位。 P.S. 只要喺 Foundation 期間達到大學要求嘅分數 75 - 85%，就可以順利升讀大學 Year 1。 2. 國際一年級 (International Year One) 呢個途徑適合 DSE 分數平均 3 - 4，但係英文底子唔錯嘅同學。 F6 畢業生如果唔想嘥一年時間讀 Foundation，可以考慮讀 International Year 1， 然後直升 Year 2，咁一共淨係需要讀三年。不過記得留意你想讀嘅嗰間大學有冇提供 International Year 1 嘅課程 (較少傳統名牌大學會開辦呢類課程，所提供嘅學科選擇亦較為有限)！ 3. 一年制 A-Level 課程 如果喺 DSE 稍微失手，同學可以考慮先讀 Fast Track 1 年制嘅 A-Level，再經英國聯招 (UCAS) 報讀英國大學。 一年 A-Level 再加上三年英國大學課程，一共留學四年。A-Level 雖然課程緊湊，但因為淨係讀 3 科，點都比 4 + 2、4 + 3 嘅 DSE 嚟得輕鬆！ 考 A-Level 仲有一個額外好處：同學如果想返香港讀大學，可以用英國 A-Level 嘅成績經 Non-JUPAS 報讀本港嘅大學。 4. 學士課程 假如同學 DSE 成績理想，其實可以直升英國大學 Year 1，咁只需三年時間就可以攞到大學學位。就算唔係 local 嘅同學仔，都可透過英國聯招 (UCAS) 報讀心儀嘅院校㗎！ UCAS 「英國大學聯招系統」到底係咩嚟？ credit: unsplash @naassomz1 上面提到英國大學聯招系統 (UCAS)，究竟係咩嚟㗎？ UCAS 全名係 The Universities and Colleges Admission Service，其實就等於香港嘅 JUPAS。同學可以透過 UCAS 直接喺網上申請英國大學，入面所有嘅課程都受英國政府認可。 申請咗 5 個志願學位後，大家可以隨時上網 check 住申請進度。假設 5 個志願都冇被錄取，同學可以再申請多一個額外志願 (UCAS Extra)。如果咁唔好彩都係冇 offer 嘅話，之後亦可以通過候補程序 (UCAS clearing) 申請剩餘嘅學額。 UCAS Application 報名過程、UCAS 放榜 UCAS 報名程序雖然有啲繁複，但大體可以分為「四個步驟」。 1. 深入了解唔同嘅大學課程 同學可透過 UCAS 平台 (search.ucas.com) 了解可供選擇嘅大學課程，根據自己嘅能力、興趣或者所修讀嘅學科嚟揀選適合自己嘅課程。 由於提交申請時只要遞交預估成績，同學未有最終嘅考試成績，想更加穩妥嘅話，需要諮詢升學顧問嘅意見，分析吓自己嘅優勢、了解更多資訊，然後揀最適合自己課程。另外，申請要盡量選擇一系列唔同要求嘅課程，萬一最終成績不如預期，都有備選傍身。 2. 提交申請文件 唔少英國大學喺 rolling 收件審件嘅制度下，額滿就會停止收件。假設學生希望喺明年九月入讀英國大學 Year 1，小編建議大家喺今年 9 月 1 日就可以開始提交申請。 咁點樣用 UCAS？ 同學首先要喺 UCAS 嘅網站上開一個帳戶，之後就按要求輸入相關資料，例如個人資料 (Personal Details)、5 個選擇 (Choices)、學歷 (Education)、個人陳述 (Statement)、推薦信 (Reference)、藝術作品 (申請藝術相關學科) 等。學校有機會經 email 通知大家交啲補充文件，所以填申請資料嘅時候，一定唔可以填錯 email！ UCAS 大部分課程嘅申請截止日期係每年 1 中旬。雖然國際學生 (international student) 個申請期會去到每年 6 月 30 號，但其實過咗 1 月中旬之後，好多熱門嘅科目都已經俾人搶曬！所以大家盡可能喺 1 月中旬之前遞交申請！ 另外，大家亦要留意個別大學或學科可能會有唔同嘅截止日期，所以一定要查清楚自己想報嗰科幾時截止啊！ －（此為圖片分隔線，中間沒有資料缺失）－ 想了解詳細嘅申請流程，大家可以睇呢度！ 3. 獲通知申請結果 - UCAS 放榜 牛津大學 (University of Oxford)、劍橋大學 (University of Cambridge) 會比較早通知申請結果，通常會喺 1 月開始出 offer。至於其他大學，就通常會由 2 月起陸續發出申請結果。 UCAS 放榜結果一般分為以下三種： 無條件取錄 Unconditional offer 簡單嚟講就係得咗、有大學收啦！如果接受呢個大學俾你嘅 offer，只需要喺 deadline 前，按指示搞好曬入學手續，再交埋學費就 ok！ 有條件取錄 Conditional offer Conditional offer 一般指，只要同學喺公開考試嘅成績達到大學嘅要求就會獲得取錄 (但亦有機會係因為未交齊文件，所以大學暫時俾唔到正式 offer，交齊翻就冇問題)。 申請者呢個時候可以選擇兩個有條件取錄嘅課程，一個係較心儀嘅確定選擇 (firm choice)，另一個就係穩陣啲、入學要求較低嘅候補選擇 (insurance choice)。 進入補招程序 In Clearing 如果咁唔好彩，五個選項都冇被取錄嘅話，同學就會進入「補招程序」，並獲分派一個用嚟申請補招嘅號碼。 4. 接受大學錄取/申請補充選擇/補招程序 收到 Conditional Offers 嘅同學，呢個時候就可以選擇一個 Firm Choice 同一個 Insurance Choice，而其餘三個就會被當係自動放棄。 但假設申請者已收到 5 個選擇的申請結果而都冇被取錄，或申請者唔接受已有嘅入學邀請，都可喺 2026 年 2 月 26 日開始喺網上申請補充選擇 (Extra choice)，每次可申請一個仍有空缺的課程，呢個過程會不斷重覆至 2026 年 7 月 1 日為止。如果校方喺 21 日都未回覆補充選擇嘅申請結果，申請者可以繼續等待，或作出下一個補充選擇。 當同學有實際成績後，無論成績高低都有機會於 7 月 2 日正式開始嘅 Clearing 階段揀選大學。英國國大學補錄取階段 (Clearing) 係針對仲未招滿生嘅學位，因此好有可能會降低入學要求，想喺 Clearing 階段申請其他大學嘅同學就要即時聯絡升學顧問中心，咁就可以有系統地根據自己嘅成績配對適合嘅大學，把握最後機會。 查看 UCAS 重要日子 英國大學收生入學要求 大學喺招生時主要會考慮下列幾點： 1. 學術能力 (DSE 成績要求) 同學有冇足夠嘅能力完成學業要求，同埋能否適應英文教學嘅環境都係大學會考慮嘅範疇，以同學嘅公開試成績，或者大學基礎課程考獲嘅成績就會係主要參考文件。 DSE 成績要求 (唔包括中文及通識科目)： 牛津/劍橋：劍橋要求同學至少有「 5* 5* 5 」 嘅成績；而牛津就要全部 5 或以上。除咗學業成績，呢兩間頂尖嘅英國大學仲會考慮埋「其他因素」，例如：學生喺課外活動、領導能力、面試時嘅表現等。 排名前 30 嘅大學：DSE 3 科選修科至少要有「 5 4 4 」(如果係專業科目，收分要求會更高) 排名中後嘅大學：「全 4」或以上。 英國 A-Level、香港 DSE：成績對照表 如果你係想喺考完 DSE 之後報 UCAS，大家不妨參考下呢個 table 同埋英國大學發放嘅收生分數，了解下自己適合報讀邊間英國大學啦！ HKDSE Grade (核心科目/甲類選修科目) GCE A-Level DSE 5** A* DSE 5* A/A* DSE 5 A DSE 4 C DSE 3 E 英國大學熱門學科收生分數（以 DSE 成績計算） 如果你係諗住以 DSE 成績入讀英國大學，要注意佢哋大部分都係睇「英文 / 數學」+「2 - 3 個選修科 Electives」 如果你係想直入英國排名較好嘅大學，咁你更要預先了解一下心儀科目嘅收生要求！下面呢個表係「英國熱門學科」嘅收生門檻，大家可以參考以下！ 大學學科 收生成績範圍 (以 DSE 成績計算) 建議修讀科目 (成績需達 DSE Level 5 以上) 法律 Law 5*55 - 555 / 醫學 Medicine 5*55 - 555 Biology 生物 / Chemistry 化學 經濟 Economics 5*55 - 555 M1/ M2 (M2 更佳) 工程 Engineering 5*55 - 554 M2 + Physics 物理 電腦工程 Computer Science 5*55 - 555 M1/ M2 (M2 更佳) 心理學 Psychology 5*55 - 554 Biology 生物 商科 Business 5*55 - 554 * A&F 需修讀 M2 社會學 Sociology 555 - 444 / 如果同學 DSE 成績未如理想，可以考慮先讀一年大學基礎課程，再直升大學一年級。Foundation Programme 收生要求較低，一般 DSE 有「 2 2 3 」都 ok 冇問題。 英國大學基礎班(Foundation Programme) DSE：2、2、3 (中文除外) 國際一年級 (International Year 1) HKDSE：3、3、4 (中文除外) 一年制 A-Level HKDSE：4、4、5 - 5、5、5 英國大學一年級 HKDSE：4、4、5 (Top 30 大學) 2. 英國大學入學試 除咗公開考試成績之外，部分大學課程都會要求申請者考「入學試」，當中嘅成績更加係量度同學入學資格嘅重要指標！ 以下係牛津、劍橋大學嘅熱門學科嘅入學試，同埋考試內容。大家可以參考一下！ University of Oxford 牛津大學 學科 入學試名稱 入學試內容 Law, Law with Law Studies in Europe LNAT (National Admissions Test for Law) Section 1: 42 multiple-choice questions based on 12 passages (95 minutes) Section 2: Writing task selected from a choice of three questions (40 minutes) Computer Science, Computer Science and Philosophy, Mathematics, Mathematics and Computer Science, Mathematics and Philosophy, Mathematics and Statistics. MAT (Mathematics Admissions Test) 10 multiple choice questions and 4 long questions from a choice of six depends on the course applying for (150 minutes) Engineering, Materials Science, Physics and Physics and Philosophy. PAT (Physics Aptitude Test) 24 Multiple choice questions and longer questions in Physics and Mathematics (120 minutes) Economics and Management, Experimental Psychology, Human Sciences, Philosophy, Politics and Economics, and Psychology, Philosophy and Linguistics TSA: S1S2 (Thinking Skills Assessment) Section 1: 50 multiple-choice questions in problem-solving skills and critical thinking skills (90 minutes) Section 2: Writing task selected from a choice of four questions (30 minutes) University of Cambridge 劍橋大學 學科 入學試名稱 入學試內容 Medicine, Dentistry, Veterinary BMAT (BioMedical Admissions Test) Section 1: 32 multiple-choice questions in Thinking Skills (60 minutes) Section 2: 27 multiple-choice questions in Scientific Knowledge and Applications (30 minutes) Section 3: Writing task selected from a choice of three questions (30 minutes) Maths , Computer Science CTMUA (Cambridge Test of Mathematics for University Admission) Section 1: 20 multiple choice questions in Mathematical Thinking (75 minutes) Section 2: 20 multiple choice questions in Mathematical Reasoning (75 minutes) Economics ECAA (Economics Admissions Assessment) Section 1: 20 multiple choice questions in Mathematics and 20 multiple choice questions in Advanced Mathematics (60 minutes) Section 2: Writing task (60 minutes) Natural Sciences, Veterinary Medicine NSAA (Natural Sciences Admissions Assessment) Section 1: 20 multiple choice questions in mathematics plus 20 multiple choice questions in one science (Biology, Chemistry or Physics) (60 minutes) Section 2: 20 extended multiple choice questions in Biology, Chemistry or Physics (60 minutes) Land Economy TSA:S1(Thinking Skills Assessment) Section 1: 50 multiple-choice questions in problem-solving skills and critical thinking skills (90 minutes) 3. 語言要求 (IELTS 要求) 外國人想去英國讀書，學校緊係會要求同學有一定程度嘅英文水平啦！雖然唔同大學、學系、學科對學生英文水平嘅要求不一，但大家都可以參考以下呢個表，大概了解下。 英國大學基礎班 (Foundation Programme) IELTS for UKVI (Academic)：4.5 – 5.5 國際一年級 (International Year 1) IELTS for UKVI (Academic)：5.5 – 6.0 一年制 A - Level IELTS for UKVI (Academic)：6.0 – 6.5 英國大學一年級 IELTS for UKVI (Academic)/ IELTS (Academic)：6.5 4. 課外活動貢獻 除咗學業成績，好多名校仲會睇埋同學過往嘅課外學習經歷，包括義工、體育、課外活動、獎項、個人興趣等去評核學生嘅潛力，希望所錄取嘅學生日後可以為社會作出貢獻。 5. 與眾不同嘅特點 特別係英國最 Top 嘅嗰幾間大學，佢哋冇可能單憑公開試嘅成績，去判斷一個人適唔適合間大學。呢個時候，你份 Personal Statement 就非常重要。呢篇嘢係將你從成績差唔多嘅人當中突圍而出，展現你與別不同嘅「重要法寶」！ 英國大學排名 credit: unsplash @jon_chng 除咗了解點樣報名 UCAS 聯招外，相信各位家長、同學都好關注英國各大院校嘅國際排名。一般嚟講，比較有權威嘅大學排名有 QS World University Rankings，Times World University Rankings 或者 Guardian The Best UK University。 為等大家可以一次過睇晒啲排名，AfterSchool 整理咗 《2026 英國大學排名懶人包》！除咗總排名之外，入面仲包括按科目類別分嘅排名 (e.g. Law、Engineering、Economics、Business、Psychology)！ 英國留學費用大概係幾多？ credit: unsplash @zck_ 學費 寄宿中學 £8,000 - £18,000 / 學期（共 3 學期） 大學基礎課程 £12,000 - £19,000 / 年 大學課程 £11,000 - £40,000 / 年 碩士課程 £12,000 - £50,000 / 年 英國政府建議留學生活費用 倫敦及周邊地區 大約 £12,100 / 年 其他英國地區 大約 £9,150 / 年 依家有唔少網站可以幫你計算喺英國讀書期間嘅開支，例如 Expatistan 用最新嘅群眾數據計算英國嘅生活開支。 英國留學生申請簽證常見問題：Student Visa Student Visa 非英籍或歐盟人士 (或沒有持有其他有效簽證，e.g. BNO Visa) 如果要去英國升學，喺獲得學校取錄後，就要辦理 Student Visa (舊稱 Tier 4 Visa)。 備註： 去英國留學時長超過六個月，同學（BNO / HKSAR 護照持有者）就需要申請學生簽證 (Student Visa)。 攞住 Student Visa 嘅同學可以喺簽證期內，喺英國讀書同有限度打工。 所有學生簽證申請人都要俾醫療附加費，以喺英國免費享用一般醫療服務。 準備簽證所需文件及資料 Checklist 有效護照正本 過往 10 年舊護照 過往所有英國簽證 最近 10 年內的旅遊資料 (出發日期、地點) 最近次到英國的出入境紀錄 (出發及到達日期) 護照相 肺結核報告 (TB Test) 英國學校入學確認信 (CAS Letter)* 出生證明 (出世紙) 身份證 (學生本人) 最高學歷成績單 (英文版) 財力資金證明 (e.g. 銀行月結單) 英文認證考試成績單 CAS Letter上所註明的學歷證明 *Confirmation of Acceptance of Studies (CAS) 英國留學生活有咩要準備 credit: unsplash @mantashesthaven 衣物、生活用品 英國生活便利，好多日常生活用品唔使專登由香港帶過去，例如毛巾、浴巾、棉被、枕頭、鍋具等，咁可以慳翻啲行李空間。衣物都係帶幾件替換嘅就得啦，厚嘅禦寒衣物可以趁英國減價嗰時再買。 值得帶嘅主要係輕便嘅日常生活用品，例如文具、USB 線、行動電源、旅行裝嘅盥洗套裝、筷子、保溫杯、個人常用嘅醫藥用品、洗衣網袋、曬衫夾、應急衛生用品 (衛生棉/ 紙巾、保養品) 等，呢啲生活用品唔會太嘥位，但帶咗會更加安心。 必備文件 必備嘅文件包括護照、機票、財力證明、英鎊現金、國際駕照、英文畢業證書、國際學生證、健康檢查報告書、入學許可、證件相。 英國留學常見問題 Q1 問：家長可否代辦簽證？ 答：唔可以。整簽證嗰陣，同學需要登記埋「生物辨識資料」(影相 + 登記指紋)，所以一定要學生本人去親身辦理，未滿 18 歲嘅同學需要有家長陪同。 Q2 問：簽證費用係幾多？ 答：學生簽證費約 348 英鎊。 Q3 問：如果父母有 BNO，子女可以唔用學生簽證去英國留學嗎？ 答：可以。如果父母持有 BNO，同時可以證明子女目前「受養」於自己，咁子女就可以以 BNO Dependent Visa 留喺英國讀書。 Q4 問：父母有 BNO，子女喺英國讀大學，可以俾本地生學費嗎？ 答：唔可以。BNO 持有人嘅子女，只有選擇就讀當地 State School 中小學日校，而且同時可以證明其主要居留地係英國 (e.g. 父母有當地嘅物業證明) ，先可以俾本地生學費。如果子女係去英國讀大學，即使父母有 BNO，佢哋都需要俾國際學生嘅學費價錢。 Q5 問：父母有 BNO 但留喺香港，子女可唔可以自己用 BNO Dependent Visa 去英國讀書？ 答：唔可以。如果父母雙方都留喺香港，仔女單獨去英國就唔可以用 BNO Dependent Visa，要申請 Student Visa 。 Q6 問：個人陳述信 (Personal Statement) 對英國大學申請重要嗎？ 答：Personal Statement 係申請透過 UCAS 系統申請大學中非常重要嘅一環，俾負責招生嘅老師由各方面評估學生嘅個人能力、興趣愛好、性格特質等。 Q7 問：喺英國讀書期間可以搵工嗎？ 答：如果想喺逗留英國期間工作，需要睇下護照上移民官員嘅蓋印或標貼上有冇註明可以喺英國工作。如果所持嘅係學生簽證 Student Visa，每個星期可以最多工作 20 個鐘。如果護照上印有 “prohibition” 嘅話，就唔可以喺英國打工，違反規定打工嘅後果十分嚴重。嚴重嘅甚至會被撤銷簽證！
