今次我會為大家講解溫習前應做既準備。係開始之前，相信各位同學都有自己既一套溫習方法，所以我想問下大家－ 你地平時係點樣溫習？同埋點解要選擇呢個方法？ 相信大部分同學溫書時都會慣性拎起課本或筆記就直接溫書、操paper，而無諗過上面既問題。我曾經都同大家一樣，所以感同身受。但係你地又有冇諗過，原來溫書前只需要多做幾個步驟，就能夠提升學習效率呢？ 根據史丹福大學研究生Patricia Chen既研究表明，大部份學生都忽略左“溫習方法”同“學習時段”既重要性，從而導致學生無法充分發揮應有既學習天賦令溫習效率下跌。Patricia為求提升學生既學習效率，嘗試從實驗中通過問卷形式引導學生運用“後設認知(Metacognition)”既方法，幫助學生定立學習目標、方法同策略，而研究結果更令人讚嘆不絕。 驚人的實驗結果 Patrcia係同學考試前既十日，做左一個好簡單既實驗。佢隨機抽取半班學生，只提示佢地記得溫書。相反另一半既學生則被邀請去接受一個15分鐘既問卷週查，問題內容包括： 你係呢個考試入面想拎幾多分？ 呢個分數對你黎講有幾重要？ 你覺得你拎到呢個分數既可能性有幾大？ 你覺得呢個考試會有咩類型既題目？ 列出所有你可以用既學習資源：如書本，past paper, mock paper，補習notes，問老師，同朋友一齊溫等等。 根據上面提過既每一種資源，寫低佢地有咩用、你可以點樣去用佢、再計劃一個完整既study plan。 Patricia既實驗結果令人嘆為觀止，有參與問卷調查既學生，對比只收到溫習提示既學生，平均成績高出10分 – 15分！究竟點解一份問卷，就可以拉高半班既成績？ 後設認知同問卷有乜野關係？ 後設認知—係一種思考模式，一種「思考如何學習」既方法。Patricia從實驗中，透過問卷形式，引導學生了解自己既能力同目標，繼而進一步思考考試模式、題型等資料，再列出所有可行既學習方案。藉由問卷既引導，學生能夠從中思考點樣可以學習得更好，為自己定立目標、方法同策略，從而提升學習效率，而唔係隨隨便便拎起本書就溫。 Thinking about one’s own thinking. John Flavell 我可以點樣運用呢個方法？ 其實坊間有好多類似既研究，均得出相似既結果，總括黎講就係透過「設立目標」、「思考如何完成目標」以及「製定study plan」呢三個簡單既步驟就能助你提升學習表現。你唯一要付出既就係短短幾分鐘，靜下來去設計出屬於你既study plan。 為左方便大家運用呢個技巧，下面會將需要考慮既問題一一列出。 具體列出可量化既目標（例如「我要下星期既數學考試有80分或以上」，以唔係「我要攞高分」。） 諗下呢個分數對你有幾重要，以及你拎到呢個分數既可能性有幾大。 列出考試範圍內容等資料，以及可利用既學習資源。 判斷每一樣學習資源對你既重要性（例如補習notes同學校textbook邊樣會較為有效？） 根據以上問題既答案，為自己定立一個study plan。 一個完整既study plan應包括學習資源使用既先後次序同學習時間表。 例子 － 準備DSE數學科考試 假設你而家係應屆文憑試考生，準備緊一個月後既DSE數學科考試，學校之前模擬試預測你會有Level 4，但係你想拎到Level 5去提升你入讀港大精算系既機會，咁我地一齊睇下點樣運用“後設認知”係呢個情況啦。 目標：一個月後既數學DSE考試拎到level 5 原因：我想入讀港大精算系，需要數學level 5去提升入讀既機會 可用資源：數學書、補習notes、自己寫既notes、網上教學片段、私人補習、n x past paper、雞精筆記⋯⋯ 最有用資源：自己寫既notes、網上教學片段、past paper 溫習時間：每星期三日，每次四小時，每次最少完成一份past paper加改正 溫習方法：做past paper，改正時將錯既地方mark低係另一本薄，並定時複習薄上錯處。如有任何困難或者唔明既地方，先參考自己既notebook睇下解唔解決到，唔得既再即時重溫網上既教學片段，用最短既時間去重新學習某個concept。 當然上面呢個只係簡化左既版本，同學可以藉住暑假，利用“後設認知”呢個概念設計屬於自己既study plan，暑假之後既你就必定煥然一新！ 資料來源： https://educationendowmentfoundation.org.uk/resources/teaching-learning-toolkit/meta-cognition-and-self-regulation/ https://qz.com/978273/a-stanford-professors-15-minute-study-hack-improves-test-grades-by-a-third-of-a-grade/?utm_source=pocket&utm_medium=email&utm_campaign=pockethit
