已經開咗學兩個禮拜，新學年目標都一定有訂過，但係你仲記得自己訂咗啲乜嗎？訂咗之後有冇真係努力去實踐呢？
今日我地就一齊重新嘅去訂立目標，用三步，將目標幻化成為現實啦！
一．反思｜尋找起點
正所謂「新學年、新開始」，話就話「新開始」，如果年年都重新開始，咁你咪冇進步過？！
要進步就要首先知道自己有咩需要進步
所以我地依家一齊反思下上一年有咩做得好、有咩做得唔好、點解會做得唔好先啦！
比個例子你參考下：
中文作文得38分
英文作文都係得48分
數學考試拎咗滿分，比預計九成好
好似花太多時間落數學，搞到無時間去溫其他科目
化學暫時仲算follow up到，同預期差唔多
上年參加排球隊，最少每星期用咗4個鐘
為自己進行一個年度反思，評價下自己嘅表現！做得好嘅就要keep，做得唔好嘅就要搵出做得唔好嘅原因！
二．目標｜你的終點
反思完你就可以諗下黎緊呢一年有咩目標，記住唔好一黎就吹太大話「我要7科5*」，要根據翻目前學習進度同你DSE嘅目標，去定立一啲係你能力範圍以內做到嘅事情同目標！
例如：
我本身中英都係麻麻地，都係求合格拎個3入到大學就得，但係照上年情況黎睇會有D危機，所以其中一個目標可以係「我要中、英作文平均表現有65分或以上」。
三．行動｜交通工具
知道起點同終點之後，你就要知道前往終點嘅方法！第三步就係為自己設立一啲具體嘅行動！要訂下令自己可以進步嘅方法！
又用翻上面做例子，你要做咩先可以令自己中文、英文作文去到上面嘅水平呢？
1. 每星期中文、英文最少各作一篇文並交比老師去改
2. 一派作文果陣就問同學拎D佳作黎睇下
咁樣具體話比自己知要做咩先可以幫你達成目標！最好就搵個日日都會見到嘅地方寫低，日日提醒自己有咩目標同要點樣達成！
總結
上面三步看似簡單，其實真係好簡單，係睇你做唔做！
今年有心想改變一下自己嘅，不妨搵一晚lock自己係間房度，拎支筆同白紙，開始試下寫低你今年嘅目標同點樣去達成！話唔定半年之後你都會比自己嚇親呢！
