【2020年整合】DSE買卷必睇指南

AfterSchool
AfterSchool 2020年06月08日
AfterSchool 整合咗DSE買卷嘅資訊,由買卷程序、費用,以及常見問題,全部羅列清楚,立即查看詳情!

就快又DSE放榜,點解要向考評局買卷?DSE買卷嘅Deadline係幾時?買咗卷可唔可以Appeal?相信唔少DSE考生放榜前就好緊張,放榜後就好迷茫,好多野要煩,今次AfterSchool 小編就幫大家整理吓DSE買卷嘅原因、程序同埋費用,幫助大家決定到底買唔買卷好。

如果想知更多有關放榜前後嘅準備,同應該考慮嘅重點,推介你睇吓《放榜必睇最強攻略》。

 

DSE買卷係啲咩?

由於DSE試卷嘅版權係考評局,買卷其實就係向考評局買返自己份試卷(複本),官方亦稱為「查閱個人資料」。向考評局買卷除咗可以拎返份卷嘅複本之外,你仲會收到試卷嘅題目、分部同試卷嘅詳細得分,不過如果想買自己說話卷嘅錄影片段,就要另外再畀錢買。
 

DSE買卷嘅原因?

其實每個人買卷嘅原因都唔同,主要都係以下幾種:

1.留為紀念

始終對大多數人嚟講,DSE都係一生人一次嘅事,甚至可以話係人生一個里程碑,所以唔少人都會買卷嚟作為紀念,睇返自己親筆寫嘅答案,始終呢樣野都好反映當時自己嘅諗法同心情,尤其係作文卷同一啲長問題。
 

2.知道自己嘅實際分數

除咗睇答案,DSE買卷最緊要係睇埋分數!

更多樣本可睇考評局網頁

睇吓自己每題題目同埋每份分卷嘅實際分數,可以知道自己到底衰咩。呢個亦都係唔少學校會資助學生買卷嘅原因,藉此比對吓考評局嘅marking scheme,研究吓點樣喺答題上攞到更多分,只要有夠多嘅數據,亦可以大概推論到唔同試卷唔同Grade嘅Cut Off
 

3.Retake

因為唔少考生會考慮Retake,買卷嘅好處就係知道自己表現成點,咁就可以知道自己咩類型嘅題目比較弱,同埋邊份分卷會比較容易升Grade,咁決定重考後,就可以針對呢啲位置嚟溫書,咁就更加事半功倍。
 

4.睇吓考評局有冇改錯

但要留意,買卷同覆核試卷係兩回事!你買咗份卷唔等於Appeal!買卷只會收到試卷嘅複本,唔會影響分數;覆核試卷有分為積分覆核同重閱答卷,最重要係無論邊種,都係會影響分數。不過如果你買完份卷,發現考評局真係改錯咗,你都可以喺拎到試卷嘅複本後十個工作天內向考評局申請上訴覆核,但你需要準備充足嘅論證,否則考評局未必會接受你嘅上訴覆核申請。

 

DSE買卷程序

第一步:下載、填寫申請表格

考生想申請DSE買卷分別有以下兩個方法:

  1. 網上申請 最方便快據,直跳到第三步!

  2. 查閱資料要求表格* & 補充表格 須自行列印(可參考考評局樣本

兩個方法都需要喺表格填寫申請人資料、購買嘅科目同領取方法,同埋提交申請時要繳交所有申請費用,否則會當申請唔完成,詳細繳費方法可以睇文章下面
 

第二步:提交買卷嘅申請表格

填寫完表格,申請人*帶埋申請表、身份證、考生編號嘅證明文件(成績表/準考證)去考評局以下呢個辦事處辦理申請,或郵寄相關申請文件到下面呢個地址:

  • 考評局地址

    • 學校考試及評核部 - 香港灣仔軒尼詩道一百三十號修頓中心十二樓(灣仔地鐵站B1出口,行幾步就到)

    • 查詢電話:3628 8860

  • 辦公時間

    • 星期一至五上午8時30分至下午5時正

    • 星期六上午9時至中午12時正

    • 星期日及公眾假期休息

*如果授權他人,請準備申請人簽署嘅授權書同身份證副本
 

第三步:按照指定方法取得試卷

一般嚟講係提交申請表 40 日內就會收到電郵通知,可以跟返你填表格時所選取嘅領取方法,索取你所購買嘅 DSE 試卷。索取方法一般有以下三種:

  1. 選擇親身/授權* 到灣仔修頓中心考評局辦事處領取

  2. 郵寄掛號到你自己指定地址(掛號郵費可參考下面考評局買卷費用表格

  3. 如果揀郵寄到郵政局自取,郵費會到付,按重量畀錢,一般1-2科申請約$5-$11,3科或以上申請就大約$21-$35

*如果授權他人,請準備申請人簽署嘅授權書同身份證副本

 

DSE買卷Deadline

參考往年,每年9月上旬考評局就會銷毀所有考生嘅試卷,所以買卷嘅截止日期就會係銷毀日期前一個工作日,係呢個期限後你申請買卷都只會拎到分紙,唔會收到試卷、錄影片段。

如果銷毀試卷後、考試年度11月30日或之前,你買到嘅分紙如上;如果11月30日之後,你只會睇到科目嘅等級,詳情請睇考評局網站


考評局買卷徵收嘅費用

無論你係學校考生定係自修生,買卷嘅費用都係一樣:

如果係試卷銷毀前,買一科嘅卷係需要$400,加多一科就只需要$104;如果你想買埋中、英文科說話卷既錄影片段,你就要畀$990。

但要留意,有個別科目嘅卷會包含另類試卷模式,所以除咗一般申請費用外,考評局會按成本需要而徵收附加費。例如視覺藝術科嘅繪畫卷別,申請人需要繳交附加費$150,先可以索取返一份彩色嘅個人資料硬本。
 

申請咗買卷幾時交錢?

DSE考生必須申請買卷時就繳交所有申請費用,否則申請會被視為唔完整,考評局就唔會處理買卷申請。
 

買卷點樣畀錢?

如果申請人係銷毀考卷日期前申請:

  1. 網上以信用卡畀錢
  2. 便利店以「繳款單」畀錢

如果係銷毀日期後申請,咁就可以用:

  1. 易辦事(EPS)
  2. 八達通
  3. 抬頭人為「香港考試及評核局」嘅劃線支票

記住千祈唔好郵寄現金!

 

DSE買卷常見小問題

1.買卷係咪一定要成科買?

係,如果你買數學就會包埋Core同M1/2,但中國語文科同英國語文科可以考慮買唔買埋說話分卷嘅錄影片段。
 

2.如果想買卷又想同時Appeal,有無問題?

無衝突㗎!你可以放榜當日就同時申請買卷同Appeal,Appeal結果公佈後嘅40日內你會收到試卷。所以即使你Appeal結果前就買咗卷,最終收到嘅試卷都會包埋Appeal後嘅分數,唔會造成影響!
 

3.買卷時應唔應該申請Appeal?

好老實講,真係睇你嘅需求。因為如果你無申請Appeal,買咗卷之後先發現考評局改錯咗,雖然你可以喺收到試卷後十日內申請上訴,但一嚟考評局未必會接受上訴(除非你有充足嘅證明指出改錯咗),二嚟就係即使接受咗你嘅上訴,你嘅成績都趕唔切報今年嘅JUPAS。所以如果你只係差一、兩分,又唔想等多年,就強烈建議你都係申請埋Appeal。
 

4.學校想買你份卷?

唔少學校都會主動買考生嘅試卷作參考用途,學校老師必須先得到你嘅同意,拎到你嘅身份證副本先可以向考評局購買你嘅試卷。你亦可以主動搵科目老師傾吓,睇吓學校會唔會買你份卷,再順手畀返個副本你。
 

5.如果買完卷發現考評局改錯咗咁點算好?

你收到試卷後十日內可以提出上訴覆核申請,但必須有充份嘅理據,詳情可以睇返考評局網站

 

諗完買唔買卷後,大家都要認真考慮吓JUPAS排位嘅問題,十大院校嘅JUPAS Admission Score同收生要求一定要睇清楚,否則排錯位,分分鐘派出嚟嘅結果重差過其他考得無咁好嘅同學仔⋯⋯ 

JUPAS排完位,唔好掛住去玩,記住要留意電話,隨時會收到Interview通知!諗到面試就好緊張好擔心?送你幾個無敵Interview心得,到時面試處變不驚,輕鬆拎Offer!