【Non-JUPAS/JUPAS Interview】無敵面試攻略幫你輕鬆攞Offer

AfterSchool
AfterSchool 2020年01月30日
Interview一詞,相信唔少人一聽到就打晒冷震。有見及此,小編今日就集合咗啲過往大學面試時所累積嘅心得,希望可以令大家係Non-JUPAS/JUPAS interview嘅時候處變不驚,大展鴻圖,輕鬆奪bonus mark!

Interview一詞,相信唔少人一聽到就打晒冷震。輕患者聽之則心跳加速,重病者聞之則冒汗失禁,活動不能。有見及此,小編今日就集合咗啲過往大學面試時所累積嘅心得,希望可以令大家係Non-JUPAS/JUPAS interview嘅時候處變不驚,大展鴻圖,輕鬆奪bonus mark!

開始入正題之前就等小編講下自己嘅interview經驗先啦。話說小編當年就出席咗三場嘅 JUPAS 面試,包括Poly嘅Hotel Man同UST嘅Science/Engine,結果三個interview都攞咗Full Bonus Mark。所以小編可以話對大學面試呢一關都幾有信心!同埋值得注意嘅就係其實Non-JUPAS同JUPAS嘅面試形式都係相同嘅,所以唔需要擔心呢篇文唔適合自己!好啦,咁事不宜遲,而家就等小編過招俾大家啦!

Work on your English 學好你嘅英文

相信大家都知道,所有嘅Non-JUPAS/JUPAS interview基本上都係用英文嚟進行,而且當你入到U,大部份嘅course,甚至你嘅同學都係講英文,所以英文嘅重要性真係不容忽視!如果你係初中嘅同學就可以嘗試下睇多啲英文書/戲/報章,慢慢耳濡目染咁去學。而如果你係高中生甚至應屆考生,咁就要快啲背vocab,做多啲Grammer練習,寫多啲文俾老師改,急起直追! 小編之前都寫咗篇文章教大家點樣令英文進步,有興趣嘅同學可以去睇下《【DSE English】不得不知的英文進步心得 X 操Past Paper攻》!

如果想更加有系統去學習英文,就可以去AfterSchool提供嘅英文網上補習課程,透過DSE英文5**導師們嘅英文真跡同筆記,發掘英文攞高分嘅關鍵同打好根基,從此唔再怕英文!

Do your Research 做好你嘅資料搜集!

如果想獲得最全面同貼地嘅一手資料,就一定要去各大學嘅Non-JUPAS/JUPAS Info Day! 因為到時會有讀緊該Major嘅學生喺度回答你嘅問題,所以你可以借呢個機會問下佢哋當初嘅Non-JUPAS/JUPAS 入學分數,溫習及面試經驗以作自己參考同分析。


其次就係記得要上網睇下該學系嘅資料,廢事入學處職員問起嘅時候自己口啞啞!記得當時就係有位professor問我,覺得佢個學系邊一個特色最吸引我,好彩我一早做咗research同問過師兄師姐,知道佢個Final Year Project係可以同一啲大企業合作一齊做策劃同做研究。所以我就即時講晒我research咗嘅嘢,仲講番啲大企業嘅名同佢哋嘅project,證明我真係冇講大話。一講完professor就嘴角微微笑,而且之後無論小編講咩都點晒頭!所以話小心駛得萬年船,各位一定要做足research呀!

Prepare Self-intro 預備好自我介紹

正所謂好嘅開始就係成功嘅一半,所以大家一定要好好準備面試時嘅自我介紹,務求令考官眼前一亮。但係各位一定要記住記住再記住,就係千祈唔好背自我介紹!小編明白大家唔希望講嘢嘅時候甩甩咳咳,但係咁樣除咗會令人覺得你好死板外,亦唔會凸顯到你自己 。所以小編建議大家可以mark低啲你想present嘅重點,再用自己嘅英文去present出嚟!

第二,介紹嘅時候唔好分享啲太學術性既野,拋太多書包。因為首先你學術方面嘅成就已經喺personal statement個度已經寫得好清楚。其次,就係interview其實係想睇你係個咩人點樣嘅性格 點解會適合讀呢科,同你想讀大學嘅理由等等,唔係想睇你讀書有幾叻。所以大家嘅目標就係要比Professor了解你係一個點樣嘅人,而唔係一個幾勁嘅人!

起步點方面,小編認為各位可以由介紹個人性格特點起步。用一啲引人入勝嘅個人故事作切入點,繼而用啲正面嘅詞匯介紹自己嘅性格,再帶出自己申請該學系嘅原因。當你嘅起承轉合如流水般暢順同前文後理都合理無誤,咁相信你已經解決咗最難個關,因為後面嘅問題通常考官都係根據你之前嘅回答而問嘅,只要你唔自打嘴巴,基本上都輕鬆過關。

即使考官問啲比較挑戰性及牽涉個人睇法嘅問題,如分析題,時事題或創意題,同學們亦不用擔心,只要大家真係對該學系做足資料搜集,同時保持冷靜思考,勇敢作答,基本上考官都會收貨,因為呢啲題目都冇真正嘅對與錯。簡單嚟講,同學們對該學系嘅認識同熱情就係你回答呢啲問題嘅指路明燈!

Manners maketh Man 做人要大方兼老實!

相信各位對Group Interview都唔會陌生,但係各位要留意我哋唔係講緊DSE嘅說話考試,所以Group Interview嘅大方向係應該保持禮貌,並且理性地論證自己嘅意見,並唔需要過份執著於反駁對方嘅論點或者為咗面面俱圓而強行達成共識。相反好似『君子』咁,保持思緒鎮定冷靜自信表達自己嘅意見就可以了。其次,同學們亦唔需要特登搶先發言。若然同學都未準備好自己嘅論點就發言,咁樣除咗會喺發言嘅時候顯得唔夠說服力同弱勢更加令考官覺得你未準備好你嘅Interview。所以大家記得要諗清楚整合好先至發言!如果你禁啱同其他同學一齊發言嘅話,記得一定要保持風度,俾對方發言先!Manners maketh Man!

Have confidence 挺一個自信的笑容!

雖然Interview本身應該係一個嚴肅的事情,但係interview普遍嚟講,係一個俾雙方認識彼此嘅機會,從而讓雙方衡量對方究竟係一個點嘅人,而小編相信無人會鍾意一個愁眉苦面嘅人。因此保持笑容挺起胸膛勇敢自信地回答對方嘅問題絕對唔係破壞緊一場嚴肅嘅interview,而係建立一個良好嘅交談氣氛,令對方更容易理解你嘅出發點,而唔係處處為難你!即使遇到啞口無言嘅問題,只要你自信合理地講出你嘅睇法,並且承認自己缺乏該方面嘅認識,考官唔一定會扣你分,仲有可能會加你分添!所以笑一笑,世界更美妙!

Do you have any question? 你有冇其他野想問?

每次臨完interview之前,通常個Professor都會問各位同學仔有無啲咩問題想問佢。理論上唔問佢都冇問題嘅,小編都試過真係無問嘢但係最後都有full bonus mark。但係其實呢個都係一個隱藏嘅加分位!通常我就建議唔好問啲好作狀嘅問題,例如「如果我真係好想入呢科我可以點?」(老實講考好DSE囉)反而可以問下啲你對個program有嘅疑惑,或者該學系未來嘅出路等等。

Life isn’t perfect but your outfit can be! 輸人都唔好輸陣!

現今社會,相信不少嘅身邊人都係「外貌協會」嘅鑽石級會員,所以學識襯衫,幾時著咩衫就好重要喇!以依家大學Non-JUPAS/JUPAS面試為例,面試嘅時候雖然Professsor冇直接咁講出嚟,但係果啲識穿衣打扮嘅人,相信Proessor都已經潛意識咁為你加咗唔少印象分同一定睇得出你係能力出眾嘅人!

Dresscode方面,通常叫你出席interview嘅個封信都會列明你嘅dresscode係咩,而小編嘅認知就係,Smart Casual = 恤衫 + 西裝褲/牛仔褲 + 皮鞋;而Formal Dressing就係西裝褸 + 恤衫打呔 + 西裝褲 + 皮鞋!當然小編就認為同學不論點都好,都帶定西裝褸同呔,以防不時之需!

 

至於顏色方面,引用小編最愛嘅編輯(佬訊)嘅一句話『如果衣櫃只能留下一種顏色,佬編不用思索一定選擇藍色。』不論你要如流水般避過咄咄進逼嘅professor,定係將你嘅說辭如洪水般衝擊大家嘅認知,藍色(Navy Blue)一定係你嘅劍同盾。藍色嘅西裝襯條啡色皮帶,再加一對棕啡色嘅皮鞋,就係果條同時身處informal同formal dressing嘅中間線。

不論你係陳冠希,定係bob哥,只要你手執藍色,你就係型嘅定義。

所以簡單啲黎講,預期同其他人一式一樣,倒不如選擇低調沉實又無損自信嘅永恆定律-Navy Blue

為咗令大家更加體會到小編嘅意象,小編將隨函附上幾張相比大家參考下。

最後希望各位喜歡小編嘅分享!順帶一提,小編之前就寫咗篇關於Non-JUPAS嘅入學資訊嘅文章,同嚟緊仲會出有關Non-JUPAS唔同方面嘅分享,所以大家要繼續留意呢個專欄啦!小編亦係度推薦幾篇關於JUPAS嘅文章,希望可以幫到各位同學順利入U。離DSE得番三個月,各位同學要繼續一齊向目標努力呀,加油!

其他JUPAS/Non-JUPAS實用文章

咁有用嘅文章記得要share俾你哋嘅同學啦!~