【DSE 放榜 2020】放榜必睇最強攻略

AfterSchool
AfterSchool 2019年12月19日
2020 DSE 將於七月中放榜,今次AfterSchool就會將 2020 DSE 嘅放榜流程、重要日期等資訊羅列晒比你睇!保證可以解決晒你對 2020 DSE 文憑試放榜嘅所有問題!

帶你入大學嘅不單單係DSE放榜攞到最少「3322」嘅成績,應對策略都好重要!面對人生中「最重要」嘅一次放榜,心態上、行為上、計劃上應該點應對?當日嘅流程究竟會係點?自己有冇可能成為DSE狀元?應該點準備好自己迎接DSE放榜日呢?AfterSchool陪你逐個睇,DSE 放榜FAQ逐個逐個為你解答!

2020 DSE 放榜前嘅準備事項

放榜前心態準備

放榜人人都會緊張,但係緊張都好,其實最重要都係你要知道自己想行嘅「路」。成績只係你嘅一個踏板,但係「冇踏板」係咪就等於「唔會成功」?無論你點緊張都好,其實你考緊文憑試嘅時候一 “Pens Down” 大致上分數已經塵埃落定。所以唔好比自己有太多嘅擔心擔憂,相比起緊張、擔心,你可以做嘅係提早準備!

放榜前行為準備

準備好「成績不等於我人生」嘅心態之後,就可以做啲比較實際嘅準備喇!

以下係AfterSchool提供比大家嘅「DSE放榜前行為準備」Checklist ,睇下你哋係咪真係準備好先!

  • 有預測過自己文憑試成績
  • 預測自己實際DSE放榜成績後,有「比預期好」、「比預期差」、「與預期相乎」嘅三個計劃
  • 做好最壞打算,知道邊度可以即刻叩門,有埋路線準備
  • 知道學校附近影印舖位置
  • 影印好所有叩門需要用嘅「文件」
  • 所有需要用嘅「文件」正本都已經入好喺Clear Folder,仲準備咗個目錄
  • 問屋企人攞定放榜日當天要用嘅錢

DSE放榜前,要點樣預測成績同調整JUPAS嘅choices?

上面講過要有是三個計劃:「比預期好」、「比預期差」、同「與預期相乎」

  • 比預期好:係指比「預期預測」嘅分數高3 - 4分。
  • 與預期相乎:係指同「預期」分數高1 - 2分;或低1分。
  • 比預期差:比預期分數低1 - 3分。

當你就住唔同嘅情況預測完自己嘅DSE成續之後,就可以按照唔同情況嘅分數去預先調整下JUPAS嘅choice。咁樣做嘅好處係當你當日放榜果陣,無論成績比預期好、比預期差,定係同預期一樣,你都唔洗再煩,可以即刻按照你當時嘅預測去重新排下JUPAS,減輕你放榜後嘅負擔!

一般嚟講,所有考生都可以係放榜後加減五個JUPAS嘅學科、或者作學科嘅調動;但需要注意嘅係:每個人進行JUPAS調整嘅時段都唔一樣,所以到時記得留意翻自己係係咩時段去改JUPAS啊!

*詳情可以留意翻JUPAS嘅官方網站

DSE 放榜時要準備嘅資料同物品

因為未知道自己放榜嘅實際成績,所以大家最好都要帶齊以下嘅項目、已備不時之需:

  • 身分證正本;身分證副本
  • DSE成績表正本;DSE成績表副本(當日即時影印)
  • 中四至中六校內成績表正、副本
  • 其他學習經歷(OLE)正、副本
  • 學生學習概覽(SLP)正、副本
  • 文具(最低程度都要帶支筆)
  • 錢💰(現金$2000 作面試成功嘅留位費,至於分別每科幾錢,大家就可以自行上網查詢)
  • 餘額充足嘅八達通(交通上前往院校使用嘅)
  • 學校推薦信 *如有
  • 升學指南

副本需要複製幾份,以供不同院校參閱。

同學最好準備一個文件夾(Clear Folder更佳)去入住曬咁多份嘅正本,咁樣就方便查閱同更整齊。

建議資料排序

  • 中四至中六嘅成績表由中六開始排起(通常學院會更注重你高年級嘅成績),
  • 第一版可以放你嘅簡介、同埋整份文件嘅目錄、
  • 預留一版放文憑試成績表嘅正本。一個「面試」嘅成功就係在於你有冇「注重細節」。

DSE 放榜時的衣著打扮

放榜當日係唔需要著校服嘅,如果學校係要求大家著校服翻去嘅話,都可以帶定一套面試用嘅衣著。放榜當日或者之後數日,自資院校或者其他嘅專上學院都會提供面試;為咗攞足印象分,所以建議同學著住或帶套面試嘅衣著。

記住!絕對唔可以著牛仔褲、熱褲、短褲、短裙、拖鞋!

大學面試衣著上分為「Smart Casual」同「Formal」兩種。同學嘅衣著係要配搭翻你想入讀科目嘅特質,

例如:

  • 想讀同商業相關嘅科目(要著正式嘅西裝)
  • 想讀同護士相關嘅科目(面試嘅衣著要莊重得體、唔洗咁多個人風格,說話要有禮貌、細心)
  • 想讀同設計有關嘅科目(穿著上就要得體但要有個人風格:可能顏色上比較鮮豔)

 大學面試上都要準備好面試嘅技巧,而呢個都係一門學問,就唔係哩度提及住啦。

DSE 放榜後計劃

去到呢個階段,你攞到DSE成績後,你已經有三個計劃喺手,所以你已經可以選擇使用邊一個JUPAS方案。

你可以請你嘅班主任、或者升學及就業輔導組嘅老師幫忙核對或者對你嘅方案給予意見。千奇唔好驚尷尬而唔去詢問,呢啲老師每年都會經歷咁樣嘅場景,比起第一次經歷嘅你,一定會更有經驗;因此請教更有經驗嘅人係你成功入讀大學嘅重要因素之一。

心態調整

你可能會對自己嘅成績興奮、或者失落,但係記住唔可以比情緒主導太耐,盡快接受呢個成績並且尋找應對方案先係你「要去做嘅事」。

聯絡家人或老師

如果發現自己無法接受自己嘅成績,搵屋企人或者老師傾訴都係一個好嘅選擇,最重要嘅係,你要接受到自己成績同知道自己下一步嘅計劃係點。就算你覺得屋企人比唔到任何建議你都好,至少佢地都可以成為你心靈嘅支柱。

文憑試覆核成績 (Appeal DSE Result)

調整好心態後,大家可以思考應否覆核成績 。你最多可以覆核四科,而覆核分為積分覆核(Rechecking)同重閱試卷(Remarking)兩種:

  1. 積分覆核(Rechecking)
    你懷疑改卷員加減你分數有錯誤,簡單啲嚟講:「我懷疑你數學差,加數都唔識!」呢個時候你就可以Recheck你嘅分數。建議用喺比較客觀嘅卷上面,例如:商科、理科等。

  2. 重閱答卷(Remarking)
    你懷疑個改卷員改錯卷,認為評卷員評分唔合理,就可以申請重閱答卷喇!適用喺比較主觀嘅卷,例如:作文、綜合、通識、文科等等。雖然考卷都由至少兩位評卷員評改,但事實上,不同評卷員對同一題的評分可相差數分,這種差異足以影響試卷的grade。

Appeal成功 / 失敗結果

  1. 成功覆核(DSE Appeal 成功)
    考評局會退翻Appeal錢比你,你可以重新排列JUAPS比院校重新考慮要唔要重新收錄你 。Appeal成功嘅優勢在於就算學科收生滿額,只要你攞到學科收生分數Cut Off或以上嘅成績,學院就必須要取錄你。

  2.  覆核失敗(DSE Appeal 失敗)
    你會損失你投放係Appeal嘅金錢,如果覆核後分數比原本嘅低,你嘅Grade係唔會下降嘅。考評局會選擇你較高嘅分數。

應否覆核(Appeal係咪真係咁好?)

Appeal其實除咗金錢損失之外都冇其他負面影響嘅。所以大家經濟能力係許可嘅話,都可以選擇Appeal。同學需要留意嘅係 Appeal 一 份卷嘅科目係$180至 $1416不等,大家經過多方面考量之後可以按照自己嘅需要選擇係咪要Appeal。謹記!更改遞交嘅申請、逾期遞交申請都係要比額外嘅費用㗎!

有關更多嘅詳情,可以參考考評局網頁:http://www.hkeaa.edu.hk/tc/HKDSE/admin/release_of_results/recheck_remark/

想買翻份DSE卷要點做?

放榜後考評局係唔會派翻份卷比你嘅,如果你想要翻份卷留念、或者想知道自己分部、題目得分,你就要比錢考評局買翻份卷翻嚟。除咗份卷之外,你仲會收到試卷嘅題目、分部同試卷嘅詳細得分。如果買說話卷就可以額外購買考生面部打咗格仔嘅考試錄像。

有部分學校亦會主動購買考生嘅試卷作日後參考嘅用途,但前提係學校老師必須要得到同學嘅身分證副本先可以購買你嘅試卷。你都可以同科目老師傾下可唔可以買你份卷再比翻個副本你嘅。

買卷程序及費用詳情:

申請表格(兩項均須填寫):

DSE 放榜後生活

希望大家經歷完放榜之後,可以順利、開心並且充滿希望咁度過你嘅「後中學人生」!好期待大學生活,但係唔知道大學生活同中學生活實際有咩唔同?考完DSE出咗成績開始想搵師弟師妹私補?但唔知道學生來源,又唔想俾錢中介?咁就睇下AfterSchool嘅其他Blog啦!