準備考 2023 年 DSE 嘅各位中六同學，係時候開始編排自己嘅溫書時間表啦。比起漫無目的咁溫書，制定一個 Study Timetable 可以為自己確立一個明確嘅目標，幫自己更有效率咁溫數。以下不如就等 AfterSchool 同咁多位同學介紹下應該點制定自己專屬嘅時間表啦！如果都係唔識嘅話，我地都提供左啲樣本 Sample 比大家㗎！
目錄
如何分配溫書時間
喺整溫書 Schedule 之前，大家要先做下資料搜集，搵下自己嘅學習目標，方便制定一個 Study Plan。所謂嘅學習目標係指你 DSE 嘅目標分數。每間大學甚至每個學系嘅 JUPAS 計分方法都唔同，好似 HKU 同 CU 就話攞星會有 Bonus 分，而想讀 Law 嘅話可能英文比重 Weighting 會較高。所以各位同學要做定 Research，決定自己最後呢年要衝咩科，同埋邊科係求合格定，邊科係要衝粒星。
以小編自己做例子：小編嗰時主科比較厲害，所以將來想讀嘅嗰科，無論係計 4C+1X 定係 Best 5對我嚟講都係一樣。小編亦計過只要選修科保持正常水平，我就一定入到想入嘅U。所以小編嗰時就主力衝主科，選修科基本上都係處於一個得閒溫下、Refresh 下自己 Memory 嘅狀態，費事到時考試失手。
由於每個人嘅能力同將來想入讀嘅科目唔同，大家嘅溫書目標都應該會有分別，喺分配溫書時間方法亦理應不同，所以建議各位唔好過分依賴網上面連溫邊科都幫你安排好嘅 Timetable。
喺繼續睇落去之前，不如各位按照自己嘅需要，將要考嘅科目分類一下啦（亦可以係某份試卷 e.g. 英文作文、數學 MC）。不過記得每項唔好放超過兩個科目啊！
最重要：唔熟但係對 JUPAS 計分有重大影響， 要衝、最需要升 Grade嘅科目
重要：雖然相對比較熟、成績較穩定，但係對 JUPAS 計分有重大影響
正常：對 JUPAS 計分影響唔大 + 知道自己點努力都唔會升到好多嘅科目
無特別：基本上唔會對 JUPAS 計分造成任何影響，考得唔好，最多只係影響成績表嘅觀感（好多同學都係讀 6-8 科，但由於好多學系都只係計 5-6 科嘅成績，喺極端/ 時間緊迫嘅情況可以考慮放棄）
延伸閱讀：《【DSE倒數】中六開學備戰注意事項》
中六 DSE 考生溫書時間表
返學同放假嘅生活完全唔同，所以 AfterSchool 就設計左兩款溫習時間表，比大家分別喺返學日子同埋放假 / Study Leave 嘅時候參考下。
溫習時間表（中六返學日）
交通、放空時間（3:30pm - 4:30pm）
- 返左成日學，大家都一定好攰，不如趁呢一個鐘頭嘅空檔/ 搭車時間休息一下。可以趁呢一個鐘喺返屋企、去圖書館、去Cafe嘅路上，買下野食、同朋友吹下水、上網輕鬆下。
補習、自修時間（4:30pm - 7:00pm）
- 如果放學無補課或者測驗考試嘅話，盡量將啲補習都安排喺呢個時間。
- 如果無安排任何特別活動，就襯呢個時間做曬所有功課。小編自己鍾意做曬所有功課先開始溫書，等自己唔好心掛掛，同埋其實做功課都係溫書嘅一種嚟㗎！
食飯（7:00pm - 8:00pm）
- 食飯、休息、做自己鍾意做嘅野
繼續做功課/溫書/做運動（8:30pm - 10:15pm）
- 做埋未做完嘅功課
- 溫習未來兩日內會默書、測驗、考試嘅範圍
- 無特別嘅就溫「最重要」或者「重要」嘅科目。(小編通常會喺呢兩個分類入面揀比較耐無溫過嘅科目)
- 如果唔趕住溫書嘅都可以隔日做下運動，保持一個健康嘅身體！
「放監」/沖涼時間 (10:15pm - 11:30pm)
- 話明「放監」，梗係鍾意做咩就做咩啦！
- 11:30pm 瞓上張床，確保自己有足夠嘅睡眠時間
其實返學日嘅時間表好 Flexible，你可以將啲時間調嚟調去，只要有效率咁溫書，其實都無所謂。
Study Leave 溫習時間表
| 星期一 | 星期二 | 星期三 | 星期四 | 星期五 | 星期六 | 星期日 | |
| 7:30am | 起身+食早餐+去溫書地點 | 起身+食早餐+去溫書地點 | 起身+食早餐+去溫書地點 | 起身+食早餐+去溫書地點 | 起身+食早餐+去溫書地點 | 起身+食早餐+去溫書地點 | 自由時間（自己安排活動，但要抽時間溫書） |
| 8:30am-1:30pm | 做卷：「最重要」 | 做卷：「重要」 | 做卷：「正常」 | 做卷：「重要」 | 做卷：「最重要」 | 做卷：「正常」/ 「無特別」 | |
| 1:30pm-2:30pm | Lunch Time休息 | Lunch Time休息 | Lunch Time休息 | Lunch Time休息 | Lunch Time休息 | Lunch Time休息 | |
| 2:30pm-5:00pm | 對卷+檢討錯誤+溫習檢討嘅內容範圍 | 對卷+檢討錯誤+溫習檢討嘅內容範圍 | 對卷+檢討錯誤+溫習檢討嘅內容範圍 | 對卷+檢討錯誤+溫習檢討嘅內容範圍 | 對卷+檢討錯誤+溫習檢討嘅內容範圍 | 對卷+檢討錯誤+溫習檢討嘅內容範圍 | |
| 5:00pm-5:15pm | 休息 | 休息 | 休息 | 休息 | 休息 | 休息 | |
| 5:15pm-7:00pm | 溫習「最重要」/「重要」科目 | 溫習「最重要」/「重要」科目 | 溫習「最重要」/「重要」科目 | 溫習「最重要」科目 | 溫習「正常」/「無特別」科目 | 溫習「最重要」科目 | |
| 7:00pm-7:45pm | Dinner Time休息 | Dinner Time休息 | Dinner Time休息 | Dinner Time休息 | Dinner Time休息 | Dinner Time休息 | |
| 7:45pm-10:00pm | 溫習「重要」科目 | 溫習「正常」科目 | 溫習「重要」科目 | 溫習「最重要」科目 | 溫習「正常」/「無特別」科目 | 溫習自選科目 | |
| 10:00pm-11:00pm | 繼續溫習/做運動+沖涼 | 繼續溫習/做運動/ 休息+沖涼 | 繼續溫習/做運動+沖涼 | 繼續溫習/做運動/ 休息+沖涼 | 繼續溫習/做運動+沖涼 | 繼續溫習/做運動+沖涼 | |
| 11:00pm | Bed Time 瞓覺 | Bed Time 瞓覺 | Bed Time 瞓覺 | Bed Time 瞓覺 | Bed Time 瞓覺 | Bed Time 瞓覺 | Bed Time 瞓覺 |
滑動查看更多
上面只係一個參考，如果有需要嘅話，大家可以按實際情況改動要做卷/ 溫習嘅科目。至於 Study Leave 點解要 7:30am 起身同 11:00pm 就瞓，係因為想大家培養一個適合DSE 考試嘅生理時鐘 (同埋要瞓夠 8 個鐘)。到時考 DSE 嘅時候，大家通常都喺呢個時間左右起身出發去試場。
星期日係「自由時間」，但唔代表唔使溫書。自由時間嘅目的只係比大家可以瞓晏啲、多啲休息時間、自己安排溫書嘅時間同埋科目。不過就算可以休息多啲，都最好確保自己有一定嘅溫書時間啦 (e.g.唔少過 4-6 個鐘)。
如果覺得呢個 Timetable 唔適合自己嘅話，大家仲可以參考 AfterSchool 另一個 中六假日Timetable 㗎！
溫習小貼士
溫書策略
溫書時要注意唔可以過 chur！！！！大家會發現小編設計嘅兩個 Study Timetable 都比坊間設計嘅好多時間表多左啲休息/ 自由時間。身為過來人，小編絕對明白考 DSE 有幾大壓力。所以喺設計 Schedule 嘅時候，小編希望透過加啲自由時間比各位，等大家 chur 得嚟會有時間放鬆心情，避免壓力過大。壓力使人進步，但係太多嘅壓力反而會令人退步㗎！
希望各位同學記得 “Quality over quantity”。 溫習嘅重點在於溫左啲咩同吸收左幾多，而唔係溫左幾耐同幾多。假如各位覺得實在 Handle 唔到，千祈唔好唔開心同夾硬嚟！上面為大家提供嘅溫習時間表只係一個 Sample，希望大家唔好為左完全跟足個 Study Timetable 而感到有壓力。大家可以按照自己嘅步伐、能力去編排一個更適合自己嘅 Schedule。呢方面，大家可以參考一下《DSE狀元》分配時間嘅秘密。
另外，好多人問小編關於溫書地點嘅問題。其實每個人嘅習慣都唔一樣，小編自己雖然鍾意喺屋企溫書，但係知道好多同學覺得屋企誘惑太多，需要離開屋企先可以集中溫書。所以小編想同大家介紹呢篇 Blog， 入面唔單止比較曬全港唔同嘅溫習地點，仲有幾個推介地點添！快啲 Click 入嚟睇下《【溫書好地方】香港溫書地方大比拼+各區溫書Cafe、樓上自修室介紹》啦！
Time Management 時間管理 App 推介
既然比左咁多自由時間你地，大家喺溫書嘅時候就真係要集中精神，以最高效率去吸收知識。不過相信好多同學都試過喺溫溫下書嘅時候，走左去睇 IG、睇YouTube (小編經常都係咁......) 所以喺度同大家介紹返一啲幫助時間管理 Time Management 嘅 App，避免大家喺溫書時分心。
Forest: Stay focused
記唔記得前排好興一個網上心理測驗，分析自己係啲咩植物嗰個呢？其實嗰個遊戲就係由 Forest 嘅團隊打造出嚟！Forest 嘅目的係想大家喺限時之內唔可以分心離開個 App。用法其實好簡單，只要入 App set 一個時限，然後開始種樹，喺限時之內無離開過個 App，就可以成功種出一棵樹啦！小編 DSE 嗰時就係靠呢個 App 同自己嘅好勝心成功令自己遠離誘惑。
Andriod (免費) 下載
Flat Tomato
Flat Tomato 係一個協助保持工作效率嘅 App，等各位每集中溫書 25 分鐘，就要休息 5 分鐘。當然，個 App 都容許大家自己設定工作同休息嘅時長啦！相比起 Forest，佢仲有個優點，就係加入左記錄干擾事項功能。假如有人突然打電話比你，打斷左你集中溫書嘅時間，大家嘅任務都唔會失敗，仲可以記錄係啲咩事情打擾左你添！雖然暫時只有 IOS 有 Flat Tomato，不過 Play Store 都可以搵到類似嘅 App。其實 Flat Tomato 係根據番茄工作法 Pomodoro Technique去設計。想知呢個係咩原理？可以去睇下《Double 溫書效率嘅方法》呢篇 blog！
Keep住做運動
考 DSE 就好似一場長跑咁，係一個極度需要體力嘅活動。小編記得以前睇新聞訪問啲 IB 狀元時，佢地好多都話就算喺考試期間都有做運動㗎！所以大家記得要 keep 住做運動，保持身體健康，順便釋放下壓力啊嘛。
最後祝各位 DSE 考生考到自己想讀嘅學系啦！溫書加油！
