大家上年因為疫情嘅關係，面對好大嘅轉變同挑戰，包括生活方式，學習模式等等。咁唔知喺呢嗰咁艱難嘅時間，大家有冇堅持自己年頭定落嚟嘅目標呢？定係已經頹廢到日日喺屋企 Hea 呢？ 如果 2020 年達唔到年頭嘅目標唔緊要，AfterSchool 今日就教你點訂立 SMART Goal，再加埋時間管理嘅技巧同讀書小貼士，保證 2021 年會係你學業上豐盛嘅一年！ 訂立年度目標 正所謂「好嘅開始已經係成功嘅第一步」！訂立適合自己嘅年度目標，有助督促自己不斷進步。但點為之「適合自己嘅目標」呢？不妨參一下 Smart Goal！ credit: unsplash @esteejanssens SMART Goal 點樣提供讀書動力俾你？ S For Specific 明確的 話明「年度目標」，當然唔可以整得模模糊糊啦。SMART Goal 其中一個原則就係明確，目標要有咁清晰得咁清晰。 就例如同學仔想今年數學有進步，呢個目標就唔合乎 SMART 原則啦，同學仔應該要講埋數學邊份卷，例如係想 Paper one (選擇題）定 Paper two (長答題) 方面。 M For Measurable 可測量的 除咗目標要明確之外，測唔測量到都係一個重要嘅因素，如果唔係，大家到最後就好難畀定自己有冇達到目標。 用返頭先嗰個例子呀，同學仔想數學 Paper one (選擇題)有進步，同學仔可以已做啱幾多題為一個測量方法，比如目標可以定立為要喺 Paper one (選擇題) 啱一半。 A For Attainable 可達到的 正所謂「冇咁大個頭，唔好戴咁大頂帽」。定立目標都係，同學一定要知道自己本來嘅能力大約喺邊度，再定立一個比自己能力範圍大小小嘅目標。 用返上面嗰個例子（同學仔想數學 Paper one 啱一半） 如果同學本身數學底子好好嘅，平日都可以啱八成，咁呢個目標未免就太容易啦，記得要有少少挑戰性嘅目標先有意義！同時，假設同學本身冇乜數感嘅，平日都只係答啱一兩成嘅，咁啱一半呢個目標就太遙遠啦，記得要循序漸進。 R for Relevant 相關的 「相關」意思即係目標嘅內容同者實踐方法都要有關連。 訂立嘅目標，如果佢嘅內容同實踐方法係唔關連嘅，好多時會令大家中途覺得混亂。假設大家係想達到數學 Paper one (選擇題) 啱一半呢個目標，但淨係想靠溫雞精筆記就當係溫習數學，咁係真係可以幫到你達成目標呢？ T for Time-Bound 有時限的 話明「年度目標」，當然要喺今年內完成啦！同學記得要訂立時限，例如今年內或者係一個學期內，套用返上述嘅例子，同學可以以喺 2021 年內，做歷屆數學 DSE Paper one (選擇題) 都可以啱一半為目標。目標千祈唔好冇了期咁做，因為咁只會越做越冇動力。 訂立 DSE 讀書時間表 訂立咗目標之後，點樣每日逐步走向成功嘅道路都好重要。呢個時候，「時間表 Timetable」 就幫到手啦。 credit: Julia M Cameron 訂立時間表嘅步驟 1. 檢視自己本身嘅時間表 你可能會話「吓？我就冇時間表先嚟睇點整時間表」但係所謂「檢視自己本身嘅時間表」意思除咗係預留時間俾學校或補習外，你仲要知道自己咩時間係最精神，咩時間係需要休息。備試期間，人人嘅作息時間都唔同，所以自己記得咩時間溫書係最入腦，咁先叫「有效率」！ 2. 排優先次序 小編曾經見過，有同學自知自己邊科已經操到好強，邊科同合格仲有啲距離，但係仍然花大量嘅時間喺強嘅科目，忽略自己弱嘅地方，結果當然就未如理想啦。所以，同學仔一定要清楚自己喺來年，邊啲科係需要花啲時間嘅，做好時間分配，咁做 5** 壯元都冇難度啦！ 延伸閱讀： DSE 時間管理法 | 中六假日 Timetable DSE 時間管理法 | 中六返學日 Timetable 熱門溫習時間管理 App 宜家人人都有部 Smartphone，等小編介紹返一啲熱門實用嘅 App 俾你，一定有一款啱你。 Todoist 呢個 App 可以俾同學自行設定待辦事項資料夾，將要做嘅事打上去資料夾度，例如每天三點鐘做一份數學 Past Paper，咁個 App 就會準備提醒你。如果同學仔完成全部清單上面嘅所有工作，App 仲提醒你記得好好休息，好人性化㗎。 Android 版本下載 iOS 版本下載 Fabulous 真正嘅時間管理大師，唔單止可以好好掌握自己嘅時間，仲可以有效率咁係最短嘅時間內做最多嘅嘢。 呢個 App 唔單止介面超靚，仲可以透過科學嘅方法，將良好嘅生活習慣，同每日嘅目標灌輸入生活當中，令同學可以輕鬆一步一步咁完成目標。 Android 版本下載 iOS 版本下載 以上小編建議嘅時間表 App 好唔好用就見人見智啦！不過，如果大家想了解更多關於時間管理嘅技巧，不妨睇埋我哋 AfterSchool 寫嘅 【DSE溫習時間表】中六備戰時間管理Time Management攻略！ DSE 讀書小貼士 有晒目標同時間表啦，咁點樣實行呢？好多時同學仔話就話溫緊書，但係雙眼就冇離開過手機、Instagram，心不在焉，咁點可以提高溫書效率呢？ credit: unsplash @prateekkatyal 冇動力呀，唔想讀呀！ 點算？ 冇動力，經常都係因為你唔多鐘意溫緊嘅科目，或者你知道自己對呢個科目一頭霧水，所以唔想花太量的時間接觸佢。所以，其實你最冇動力溫果科，就係你最需要溫嘅嗰科。 但點先可以有動力啲呢？ 不妨試下將個科嘅課題，一個一個獨立咁溫。例如，同學仔可以先專注溫熟一個課題，再試下做相關嘅題目。呢種 by topic 嘅溫書方法，好處在於同學仔只需要全力溫好一個課題就得，同時專注嘅時間唔會太長，方便同學喺課題與課題之間休息。 集中唔到呀！點算？ 手機，IG，Facebook，都係同學仔最大嘅誘惑。其實好多準考生喺備試嗰陣，往往都會將自己嘅時間表，全部俾晒溫書同 DSE Past Paper，好似唔容許自己休息咁。。。。 正所謂「休息，係為咗行更遠嘅路。」 呢句說話好似好兒戲咁，但係只要同學分配好時間，例如有時俾自己休息下 30 分鐘，做自己鍾意做嘅嘢，總好過喺溫書嘅期間唔認真，神游太虛。 其實講到尾，時間分配嘅問題，關鍵在於同學仔嘅心態同自律，而呢兩方面不論喺 DSE 期間定往後嘅人生，都好重要。AfterSchool 希望大家可以喺呢年，充份裝準好自己，迎接日後嘅考試同難關啦。 P.S. DSE 2022 考生加油！小編一定會陪著大家㗎！
