【DSE 白話文】中文閱讀卷白話文技巧大全 (附主旨題、分段技巧)

DSE 中文科一向被稱為「死亡之卷」，而中文卷一閱讀理解更加係唔少同學嘅失分位。

AfterSchool 今日就想同大家分享一下做白話文嘅攻略，除咗為同學建議卷一嘅時間分配，重  會介紹各種白話文溫習竅門同埋常見題型，包括係分段、主旨、寫作手法及修辭手法題，幫助大家輕鬆 KO 中文閱讀理解！

眾所周知，依家中文卷一分為3部份，分別為「甲部範文」、「乙部A 白話文」及「乙部B 文言文」，當中白話文部份約佔成份卷【五分之二】作答時間，可見其重要性！

卷一的考試時限是 1 小時 30 分鐘。我哋建議可以先完成甲部指定篇章，大概 15-20 分鐘就應該要完成。相信大家經過幾年嘅訓練，都已經背過唔少答案，呢一部分做起上嚟應該比較得心應手，答案務求簡而精，盡量為乙部爭取時間。

雖然乙部嘅白話文編排喺文言文之前，但因為文言部分比較短，而且問題一般都很直接，主要都係想考核同學嘅翻譯能力，所以只係需要將文句譯成白話嚟理解，已經可以答到大部分問題。建議大家最好喺 20 分鐘之內完成文言部分。

而白話文就係全卷需時最長嘅部分，根據 2020、2019 呢兩年嘅白話文試題，同學需要先閱讀差唔多 2000 字嘅文章再答題，所以我哋建議同學留返最後嘅 50 分鐘嚟專攻白話文。如果大家遇上冇把握嘅題目，切忌花太多時間思考，可以留待最後先處理。

為咗想喺白話文閱讀理解取得好成績，唔少同學會選擇閱讀多啲課外篇章，並且進行操練。但一昧死做爛做有機會只係原地踏步，掌握以下四個溫習竅門，先真正有效提升乙部嘅分數。

當我地閱讀白話文篇章嘅時候，第一步就係要分辨文體。唔同嘅文體有各自嘅特色，認識各種體裁嘅特色同結構，就可以借助文意脈絡推斷詞意，呢個步驟有助同學回答內容大意題。以下舉出一啲不同文體嘅重點例子：

記敘文又叫「記描抒」，因為文章一般融合記敘、描寫，但更在抒情。所以，當同學閱讀記敘文嘅時候，可直接將抒情嘅感情色彩字眼圈起，有助疏理文章脈絡，能夠更清晰咁區分文章層次。特別提醒大家，「愛」、「喜歡」、「討厭」等字詞其實都係一啲富有感情色彩嘅字眼，千祈唔好因為呢啲字太常見而漏咗啊！

好多同學成日都覺得好難去掌握抒情文裏面嘅「文字感覺」。事實上，我哋要理解抒情文嘅本質就係抽象，作者通常會用唔同物件、環境象徵其心情，例如雨天、食物嘅苦澀，可以寓意住沮喪嘅心情。因此，如果同學遇上抒情文，可以邊讀邊圈出表達情感、氛圍嘅重點字，嘗試推敲作者心情，例如係喜悅、失望、矛盾，以幫助自己代入文章，去分析深層意思。

面對抒情文，考生最常犯嘅錯誤係花好多時間去分析個別字眼。要喺卷一中文閱讀理解得分，識得歸納文章亦相對重要，所以閱讀期間需要有取捨，千祈唔好迷失喺推敲作者所思所想嘅過程中。 

另一個喺中文卷一「老是常出現」嘅就係議論文，作者未必會直接講出真正意思，可能會運用反問句，以諷刺嘅方式，引導讀者同佢一齊轉彎抹角。

面對呢類文體，同學應該邊讀邊圈出隱藏在文章內嘅中心句。亦切忌過分加插自己嘅推測或建議，因為代入作者、理解作者先至係你嘅責任。

此外，議論文一旦刪去內容裏面嘅全部例子，剩低嘅一般就係文章重點。以 2015 年 DSE 嘅白話文考核篇章〈 論趣〉為例，如果刪走第四段中所有例子，就只係得翻「還有一種知其然而不知其所以然的行為動機，叫做趣。」及「凡在學問上有成就的，都由趣字得來。」兩句。只要將兩句嘅重點字眼重新構成一句句子，可能已經輕易搵到該段嘅段旨。

解構文章體裁只係進行中文閱讀理解嘅第一步，如果想快速了解文章嘅內容，第二樣要做嘅就係推斷文章嘅重點。搵到文章嘅重點可以有助作答各種題型，特別係主旨、段意題。

同學要多加留意文章中提及篇名含有嘅字眼。偶爾篇名嘅意義或者相對隱晦，係寄寓咗象徵意義之物，所以當同學剖析篇名嘅時候，亦要融會到對象徵手法嘅認識同埋分析能力。

另外，同學亦要注意多次重覆嘅字詞或句子。例如 2013 年 DSE 中文卷一的白話文篇章〈 我交給你們一個孩子〉，最後一題問到作者唔同意朋友家格言嘅原因。文章嘅最後一段，喺短短四行文字之內，就已經出現咗四次嘅「來不及」。由此可見，「來不及」正正就係回答呢條題目嘅核心，只要回答「著急」、「抓緊時間」、「珍惜」等，同「來不及」相關嘅字眼，都可以幫助考生喺呢題得分。

參考過往嘅 DSE 中文卷一嘅白話文篇章，主題一般圍繞住「傳統與現代」、「城市與鄉村」、「個人與社會」、「漂泊與尋根」、「父母與子女」、「教育與成長」、「自然景象與哲理」、「飲食與人生」。

2013 年卷一的白話文篇章〈我交給你們一個孩子〉，正正就圍繞住「父母與子女」。作者描述往事，表達對兒子成長的慨嘆，擔憂兒子在成長過程中，因社會環境而變得不再善良正直，藉此抒發對兒子愛猶不及的情懷。

同學可重點搵同上述呢 8 個主題有關嘅文章，思考一下文章立意，並留意當代作家點樣以唔同嘅寫作方法，刻劃主旨，直抒胸臆。如果預先溫習主題嘅背景，例如喺「城市與鄉村」中，不少文章都係講述1949年或之後南方文人對祖國的懷念，將會對作答更有幫助。

同學千祈唔好以為做 past paper ，做完一次就可以揼咗佢，我哋重要從錯誤中學習。如果唔想重蹈覆轍，就要參考一下marking scheme，尤其係長題目。考試最重要就係「睇分數做人」，絕對唔可以浪費任何時間。唔同分數嘅題目，答題框架都唔同，答案嘅重點、篇幅都會有相應嘅變化。

所以最有效嘅方法就係分析marking scheme，咁先可以了解不同題型、分數嘅作答方式。當然，我哋重要自行思考應該點樣整合拓展等等，先算係真正掌握白話文嘅答題要訣。

雖然好多人都話閱讀卷除咗甲部之外係冇得溫，但只要我哋事先熟習唔同嘅題型，背熟一啲常見題型嘅答法，實戰嘅時候按照答題框架作答，多多少少都可以為自己保障返一啲分數。而且，考評局會特別考問呢一類過往考生表現唔理想嘅題目，同學可以多加留意考評報告同相關題目。

歸納內容大意題主要考同學劃分段落重點及文章層次嘅能力，呢種為近年常考題型，而且佔分多，但偏偏就係同學比較冇把握嘅題目。但實際上，對文章結構佈局嘅安排了解深入，正可以幫助我哋理解文章嘅深層意義，即使答題簿無考問同學對文章分層嘅能力，閱讀嘅過程中亦需要多多留意文章嘅層次。

而劃表題最令人擔心嘅，其實係分段嘅部份。因為分段可謂「一子錯滿盤皆落索」，只要分錯一題，前、後題目都可能分錯。而且只要一分錯段，就會牽連到段落大意都攞唔足分，只係好在近年段落大意嘅佔分比例有下降嘅趨勢，因此分段顯得更為重要。

分段雖然看似難以觸摸，但其實係有跡可尋。同學喺分段嘅時候，可以先辨識開首、結尾兩部分，佢哋喺最容易正確分段嘅。穩取呢兩部分嘅分數後，再嘗試喺文章中搵出過渡段，咁我地就可以得出呢一個段落點樣連接上文下理。之後就可以運用呢三項資料，推敲出各部分喺邊幾段。

除咗開首、結尾同埋過渡以外，如果我哋想區分到其他段落，就可以留意一下每一段第一句嘅第一個詞。如果係第一個詞語係連接詞，例如係「但是」、「其實」、「總括而言」；又或者係標示語，即「首先」、「其次」；又或者係「現在」、「後來」之類嘅時間詞，咁呢啲都好有可能係屬於下一個部分嘅段落。

第二，同學要留意兩個連續段落的主題、內容，例如事件、語調、情感、時間不同，就有可能係不同嘅分段。第三，留意一啲重覆出現嘅情感、物件、人物。當然，唔係每一篇文章都可以用到呢幾種方法去分段，實際上都好睇每篇文章嘅情況，唔可以一概而論。

此外，每一種體裁都有佢哋各自嘅分段要訣。記敘文就要留意敘事要素的轉變，根據事情發展嘅起承轉合，時、地、人嘅變化；而議論文嘅分段重點，就係在於出現不同嘅分論點嘅時候。

為一篇文章劃分結構段，牽涉到考生對眾多寫作手段嘅掌握，所以呢部分確實需要多下苦功。

分好段落之段，就要搵出段落大意。同學只要睇返past paper嘅model answer，就會發現每一篇文章嘅結構策略其實都大抵相同，而段落大意都有幾個常見用字。譬如第一部分可以係「開門見山」、點明文章大意等等；過渡段落需要回答佢嘅結構作用，譬如「承上啟下」；而最尾就一定係抒發咗某種感情。只要參考一下呢啲model answer用字，就多多少少可以執到啲分數。

除咗係參考model answer嘅用字以外，同學都要緊記參考例題嘅作答結構，先好落筆。作答嘅結構一般都係先寫文中大意，再寫出其作用。例如係透過某事件，帶出某道理或情感。

除咗答題嘅框架以外，最重要就係搵出每段嘅中心句（若有），再整合意思，切忌原文抄寫。一般嚟講，通常可以喺每段嘅段首或段末搵到中心句。有時作者亦會用反問、設問句提示出文章嘅中心思想。同學亦可留意某啲特定句式，例如「…，其實…」，搵到作者想表達嘅意思。如果搵唔到清晰嘅中心句，就要透過時、地、人等要素去判斷、搵出重點。

無論遇上乜嘢文體，搵出文章內嘅主題句其實係中文卷一閱讀理解嘅應試必勝大法。只要搵到文章句子主幹，就可以幫助考生快速推斷文章中心思想，把握答題時間。

考評局一般唔會淨係要求考生搵出文章主旨，而係透過歸納主旨，再要求你哋回答其他問題。例如 2017 及 2020 年中文卷一都曾經要同學歸納主旨，說明個人體會或睇法。而2015、2020年就要同學歸納主旨，去比較不同篇章觀點。

2020 年嘅白話文部份第16題問到，篇名既然為〈夢中的父親〉，文中後段卻不斷描寫母親，是否偏離主旨，要求同學解釋並說明看法。雖然問到「是否偏離主旨」，但其實都係「換湯不換藥」，一樣係「歸納主旨」題。同學要先寫文中主題同主旨，再分析「是否偏離」，最後寫出個人睇法。

而 2020 年中文閱讀理解第17 (ii) 題問及文中「那些和父親一樣的遊子」，與王鼎鈞同樣身在異鄉，要求同學指出佢哋對故鄉嘅看法有否矛盾。呢一種比較題屬高階題目，容易分出高下。如果見到比較題，同學要預留時間，並放喺較後嘅階段作答。

答案必須要有比較方向，例如「什麼是故鄉、是否要還鄉、對故鄉的感情」，從不同方面比較兩篇文章。同學唔需要急住回答有冇矛盾，作答前應該先睇題目，先論王鼎鈞對故鄉嘅看法，再述文中作者父親嘅看法，最後作比較。喺呢類4分題目中，即使最後比較論述答唔到，前面嘅說明也有機會得分。

寫作手法題都係常見嘅題型，同學要事先背熟唔同常用寫作手法嘅定義同作用，作為答題嘅框架。做卷時，同學先第一時間分辨出用緊嘅係咩手法，之後再以閲讀材料嘅相關內容填補入去作答。切忌單純解釋手法，一定要引用文本。

以借景抒情為例，答案通常都係「作者藉描寫（文中嘅景物），以抒發XX之情」，而「XX之情」亦來來去去都係嗰幾個，例如懷才不遇嘅惋惜之情、對故鄉嘅思念之情等等，呢啲都係一啲常見嘅答案。

而溫習描寫手法時，除了釐清各種常用描寫手法，例如動態描寫、靜態描寫、直接描寫、間接描寫、白描等，同學亦可以諗吓「呢個寫作手法有咩好處？點樣塑造角色形象？」等 。

除咗描寫、抒情手法之外，考評局都好鍾意考大家修辭手法。同學要注意唔同修辭嘅作用、效果和定義。以下有幾種常見嘅修辭手法：

如果想睇更多修辭手法嘅作用同例子，同學可以睇返我哋早前分享嘅修辭手法大全。

除咗上述提及嘅幾種修辭手法，其實比喻先係考核次數最多嘅修辭手法。而由於明喻、暗喻均會點明本體，所以考評局一般考借喻為主。考核方法多為辨析喻指，要求考生搵出文中借喻嘅本體。同學應該多加操練比喻題，先可以取得分數。

做比喻題嘅時候，同學應先理通上下文內容，準確判斷句意，千祈唔好淨係分析喻體一詞，而忽略佢喺整段甚至全文中嘅意義。

例如 2014 年 DSE 中文卷一曾要求考生形容「鹹」同「苦」可以比喻嘅人物，以及兩者相似嘅原因。文中對「鹹味」嘅描述係「俗流的」、「常人每天吃的」、「最易化舌的」。歸納特質就係普遍、尋常，因此對應嘅人物答案就是比喻普通人、一般人。

此外，比喻中本體同喻體嘅詞性通常都係一致，同學緊記要以相對應嘅詞性作答。2013 年DSE白話文部份曾要求考生辨析文章中「瓊漿」、「糟粕」嘅喻指。「瓊漿」同「糟粕」係名詞，考生應該同樣以名詞作答。而正確答案就正正係是「令人變得正直忠信的資訊」同埋「令人變得奸猾詭詐的資訊」。

同學亦應該熟悉比喻嘅作用同效果，例如係令抽象複雜嘅事物，變得具體簡單；讓陌生艱澀嘅道理，變得淺白易明；令語言變得生動有趣、新鮮活潑，增強感染力；以及引起聯想，吸引讀者。

議論文同記敘文、抒情文所常用嘅修辭手法又會有啲唔同，佢經常會用到排比，將意思、語氣相近嘅三句或以上句子相連，達到提升語言氣勢嘅效果。除此以外，對偶亦係議論文常見嘅修辭，主要作用在於營造文句之間嘅氣勢。

考評局亦經常問到人物嘅形象或者係人生態度。2014、2018 及 2020 年DSE中文卷一就曾經要求同學綜合全文，以掌握人物性格、內心感受及人生態度；而 2020年嘅第10題，要求同學說明父親的姿態跟作者感到遺憾的關係。

呢種題目考核同學嘅概括、歸納能力，要透過文中不同片段去分析人物性格、內心感受同埋人生態度。答題時，考生必須舉出文章嘅相關事例，再加以說明。切忌原文照抄。

而 2014、2015、2016、2018、2020 年都考核過同學辨別人物形象、人生態度嘅能力。呢類題目雖然係初階題，但同學要得分，就必須熟讀所有描寫手法。同學要先釐清作者寫嘅係「人」定係「物」，再從分類中選擇適合嘅描寫方法。而近年較熱門嘅長答問題中，就有問到寫作手法喺文中有乜嘢作用。

雖然有唔少人認為中文卷一白話文係好考個人嘅中文底子，如果本身語文能力唔好嘅話，就只可以靠運氣去得分。但係只要同學溫習嘅時候花多少少心機，掌握做卷嘅竅門，同埋熟習作答嘅框架，相信都可以為自己撈返唔少嘅底分，甚至會成為升一個等級嘅關鍵！