【E-APP 2020 報名全攻略】申請報讀專上課程前必睇

AfterSchool
AfterSchool 2020年01月23日
E-APP究竟係乜?你又需唔需要報呢?AfterSchool 為你整合最新版本嘅報名全攻略,即刻了解課程丶截止日期丶交錢等資料。應屆學生嘅你仲唔快啲禁入嚟睇!

嚟到2020,好多應屆 DSE (中學文憑考試 / 文憑試) 學生都開始努力溫習同備戰。但係除咗公開試,有一樣嘢學生唔可以忽視⋯就係報課程啦!

有好多同學都只會留意 JUPAS (大學聯合招生辦法 / 聯招) 報讀學士學位,以為只係排完課程優先次序後就唔使擔心,但係絕對唔係架!

有啲學生因為無預先喺 EAPP 報名所以放榜時非常徬徨,四處搵大專排隊報名。就算溫書溫得幾辛苦都好,都要有兩手準備架!

咁 EAPP 究竟係咩嚟呢?報名嘅流程又係點?AfterSchool 就為咗大家準備咗呢份《E-APP 報名全攻略》,助你輕鬆升學!

 

E-APP 係咩嚟?

E-APP 係由教育局設立嘅網上報名服務,俾應屆 DSE 嘅考生預先報讀 JUPAS 以外嘅專上課程 (學士學位 及 副學士等)。

E-APP 同 JUPAS 嘅流程都大致相似。同學仔只要喺 E-APP 填妥一份網上申請表,就可以報讀多間院校嘅專上課程。有一啲同學喺 DSE 放榜前就已經收到院校面試嘅通知,甚至可以收到 conditional offer (條件取錄資格) 添。

喺 DSE 成績公布當天,E-APP 同 JUPAS 一樣,會將申請人嘅 DSE 成績從考評局 send 俾你報讀嘅院校,唔駛申請人親自到院校遞交成績,減少不便。除咗 E-APP 外,個別課程同院校都有提供佢哋自己嘅網上報名系統,仲可以親身遞交申請添。但係經 E-APP 一次過報晒梗係方便好多啦。

 

報完JUPAS仲洗唔洗報E-APP?


Photo by Ben White on Unsplash

有唔少人都會問,「吓,我需要報 E-APP 咩?」。小編認為除非你真係好有自信啦, E-APP 都幾值得報架。對於成績唔錯但係又有啲緊張自己入唔入到U嘅學生,E-APP 其實除咗係一個兩手準備外,好多人都認為呢個係一個定心丸

因為好多時學生喺 DSE 放榜前已經受到 conditional offer,只要達到某個 DSE 成績就可以入學。比起考完 DSE 又要等成績同JUPAS放榜個種忐忑不安,有 conditional offer 喺手感覺會輕鬆好多。

除此以外,對於認為自己未必入到U嘅同學仔,E-APP 絕對可以避免你放榜後拚搏嘅麻煩。只要輕鬆喺 E-APP 登記同報名,就可以輕鬆升學!

 

E-APP 幾時截止?!

  • 首輪申請 (Main Round):2019年12月05日 – 2020年05月15日
  • 次輪申請 (Second Round):2020年05月22日 – 2020年06月30日

各位要睇清楚highlight咗嘅截止日期,唔好過 deadline 啊!如果未過嘅話,就可以開始啦~
如果過咗點算?㩒入嚟睇吓

 

E-APP 報名流程

1) 你符合收生要求嗎?

每個課程嘅要求都唔一樣,但係普遍嚟講,差唔多全部都係同一個入學門檻。 如果希望報讀學士學位,你必須達到「3322」要求 (中丶英丶數丶通識 至少有 Level 3);而如果你想報讀副學士,就要有至少五科 Level 2 嘅成績

2) 了解課程資料

報名前梗係了解下啲學位課程先啦!同學仔可以按此進入 E-APP 課程搜尋網頁,然後可以根據你鍾意嘅院校丶學習範疇 同 課程類別搵適合你嘅課程。

3) 建立 E-APP 帳戶

了解課程資料後,你就可以按此進入E-APP系統頁面,並按「建立帳戶」。

輸入個人資料丶用戶名稱 同 密碼後,你會收到確認 email。打開 email 確認申請後就可以 login 登入架啦~然後,您需要繼續輸入更多個人資料同授權 E-APP 同院校分享資料。

4) 提供校內成績

你之後需要提供你嘅中學資料,同埋你中四至中六嘅考試成績。同埋你要準備中四、中五及中六嘅考試成績表,以PDF檔案形式上載。如果無嘅都唔緊要,可以遲啲先upload~

5) 填寫比賽或活動的經驗及成就 (OEA) 同 學習概覽 (SLP)

之後就係填 OEA 同 SLP,呢啲資料之前填 JUPAS 都應該有準備所以都係直接抄返就可以~最緊要就係記得上載你嘅 SLP 檔案,PDF/JPEG 檔案都可以。

6) 過往的公開考試成績 (如有)

如果你曾經參加其他嘅公開考試,你都可以寫埋架。無論係香港中學文憑考試成績 (HKDSE) 或 香港中學文憑考試以外嘅其他考試成績都可以。

如無嘅話,你要剔選「我沒有過往香港中學文憑考試成績」同「我沒有香港中學文憑證書檔案/我會稍後上載」。

7) 確認申請

去到開帳戶嘅最後一步啦!只要睇清楚資料冇問題就可以確認資料。系統會俾一個申請人編號你,之後你就可以進入報讀課程嘅頁面。

8) 報讀課程

去到報讀課程嘅頁面後,你可以㩒左邊嘅「報讀課程」開始。

您可以搜尋你之前睇過而且有興趣嘅課程,之後㩒課程名稱左邊嘅 「+」加號 選擇課程。揀好後就可以㩒「下一步」排好優先次序,再㩒「遞交」。見到綠色字「已遞交」就搞掂架喇!恭喜~ 

9) 俾錢!

E-APP 嘅服務係免費嘅,但係唔同院校有唔同嘅申請費同報名費。以 HKU SPACE Community College 為例,每一個申請本地學生需要交HK$150,非本地嘅就要HK$500。同學仔要喺個別嘅院校網站check清楚啦~ 小編為咗方便大家,係下邊整咗個表可以參考下,入邊有熱門院校嘅基本資料,可以入嚟睇下

 

有關E-APP嘅常見問題


Photo by Curtis MacNewton on Unsplash

1. 我可唔可以同時申請 JUPAS?

可以,E-APP 同 JUPAS 係分開嘅報名系統,E-APP 係唔會影響你嘅 JUPAS 申請
(延伸閱讀:《【十大院校入學要求2020】一文睇盡JUPAS Admission Score、收生要求》)

2. 首輪申請 (Main round) 和次輪申請 (Second round) 有咩分別?

無咩分別,只係院校會優先處理首輪申請嘅申請先。但係亦有一啲院校表示只有 Main round 先有 conditional offer。為咗避免課程已經達到收生要求,記得早啲申請啦。

3. 有無申請嘅數目上限?

E-APP 無數目上限架,但係個別院校可能會有。

4. 幾時知結果?

每一間院校都有唔同嘅公布結果日期架,所以要問返佢哋~

5. 我錯過咗 E-APP 嘅 deadline!點算?

唔駛擔心,你仲可以嘗試去個別院校查詢。有一啲院校提供「放榜後剩餘學額」俾本地嘅應屆學生
小編建議你即刻打電話去心儀院校嘅office問下入學資料啦。

 

熱門院校申請資訊概覽

資料只供參考,所有資料以院校官方網站資料為實

院校 (按連結可直接進入官方收生資料)

報名費用 (本地生-每份申請)

面試日期

香港大學 - 專業進修學院 (HKU SPACE)

$150

2020年2月29日/5月22日/6月16日/7月4日

香港大學 - 專業進修學院 保良局何鴻燊社區書院 
(HKU SPACE Po Leung Kuk Stanley Ho Community College)

-未公佈

香港中文大學 - 專業進修學院 (CUSCS)

$200

-未公佈

香港城巿大學 - 專上學院 / 香港伍倫貢學院 (UOWCHK/CCCU)

$150

-未公佈

香港城巿大學 - 專業進修學院 (SCOPE)

$160

-未公佈

香港理工大學 - 香港專上學院 (HKCC)

$200 (包括三項課程選擇)

2020年1月18日/2月29日/4月23日/5月30日/6月19日

香港浸會大學 - 電影學院 (AF)

$300

-未公佈

香港浸會大學 - 國際學院 (CIE)

$150

-未公佈

香港浸會大學 - 持續教育學院 (SCE)

-未公佈

香港公開大學 - 李嘉誠專業進修學院

$300

-未公佈

嶺南大學 - 持續進修學院 (Life)

$150

-未公佈

香港教育大學 (EdUHK)

$150

-未公佈

香港恒生大學 (HSUHK)

$100 (每個課程)

-未公佈

香港樹仁大學 (HKSYU)

$200

-未公佈

職業訓練局 (VTC)

$180

$300 (候補申請)

-未公佈

 

所有參與 E-APP 嘅專上院校

大學 或 旗下專上學院

其他專上學院

– 唔知我哋整嘅《E-APP 報名全攻略》有無幫到你呢?小編喺度祝大家可以順利升學!搞掂報名嘅麻煩嘢就可以放心溫書啦~ 想知 DSE Past Paper 點出?即刻去 AfterSchool 整嘅《【全港最齊】歷屆 DSE Past Paper 資源庫 》啦!

其他DSE資料庫