【DSE重考優劣分析】決定retake前必睇!

AfterSchool
AfterSchool 2019年07月09日
留意到身邊有啲同學,榜都未放就已經準備retake DSE,當中有啲係戲言,但原來每屆DSE都會有成幾千名自修生(當中唔少都係重考生)!然而唔係個個都可以透過重考如願升分,讀到心儀學科。小編我都重考過DSE,係決定重考前都做過唔少資料搜集同聽一啲過來人嘅意見同經驗之談,以下呢篇嘢我會幫你分析下retake DSE嘅優劣同埋你應該要考慮嘅重點!

留意到身邊有啲同學,未放榜就已經準備定retake DSE,當中有啲係戲言,但原來每屆DSE都會有成幾千名自修生(當中唔少都係重考生)!然而唔係個個都可以透過重考如願升分,讀到心儀學科。

小編我都自修重考過一年,係決定重考前都做過唔少資料搜集同聽一啲過來人嘅意見同經驗之談,最終升咗三分。以下呢篇嘢我會幫你分析下重考DSE嘅優劣同埋你應該要考慮嘅重點!

重考DSE嘅好處:合併成績,更多時間去專攻個別科目

重考嘅好處就係可以多好多時間溫書,同時可以專注於個別科目身上,因為JUPAS計分係可以合併兩年嘅DSE成績,考兩次剩係攞每一科嘅最佳成績!

例如你第一年考到45433,第二年剩係重考中文同英文攞到lv 5*同lv 4,中文就可以變成lv 5(第二次考),而英文科就可以攞返第一次嘅最佳成績lv 5,變成5*5433!

但係留意有啲大學學科會對合併成績扣分,建議睇清楚心儀嘅大學/學系對重考生會唔會有咩特別安排。

重考DSE嘅壞處:金錢、時間、心理壓力

講到重考咁好,但係其實唔少人重考都升唔到分,或者剩係升到一兩分。因為重考會遇到好多困難,唔係好似你想像咁易,除咗金錢之外,時間亦都係你嘅本錢,消耗一年青春(好似留班咁,永遠比同級大一年)唔係個個都接受到。

而且心理壓力又大(因為已經付出太多,同埋重考嘅人通常都比較重視成績,情緒波動較大),重考閉關果年其實唔係你想像中咁輕鬆。

DSE Retake升分難唔難?

重考可以成功升分的三大類人

按照個人經驗,小編認為以下三種人retake係最易升分:

  1. 第一次考DSE嘅狀態唔好
    病咗(甚至要住院)或者太緊張,第二次考就冇嘢
  2. 第一次溫書策略不當
    如選修咗科自己唔擅長嘅科,後來重考嘅時候自修翻啲自己較易取得高分嘅科
  3. 第一次考DSE冇咩溫書
    但考完突然良心發現考好DSE嘅重要性,然後發奮圖強溫書(呢類人升分的幅度最大,因為佢哋本身有天份但冇點用到)

重考成功率其實並唔高

其實重考升分真係唔係想像中咁容易,聽過唔少身邊朋友重考後都升唔到分。我重考的四科主科中,都有兩科升唔到分。

事實上,每年重考生佔整體考生約一成,重考後符合3322大學入學資格嘅人數低於當中嘅十分之一 ,重考中文的翻身率(本來中文不及格(2級或以下)而重考中文至合格(3或以上))約為三成。重考英文的翻身率約為兩成。

可見重考成功率不高,千萬不要以為只要重考即能成功升分。嗰啲重考成功升分嘅勵志例子,其實只係少數嘅個案。重考升好多分嗰啲,唔少都係本身有天資但又極少溫書,到重考嗰年就發奮圖強嘅人。

如果你本身就有讀書,咁重考升分會冇咁易。但係都唔排除你係嗰成功升分嘅百幾人中嘅其中一位。個人覺得重考能否升分嘅關鍵在於決心同策略。如果你跟呢篇文講過嘅嘢去做已經可以避免好多令你升分失敗嘅伏位。

邊類人唔適合重考DSE?

1. 盡咗力但成績都係唔理想(少數人)

如果你自問本身已經搏晒命去溫都考唔到理想嘅成績,可能你本身底子好差/已經到咗樽頸位,好難再進步。就算進步到少少,都要睇夠唔夠你升一個grade,尤其lv 3同lv 4嘅分數範圍都幾大,lv 5再攞星就更加難上加難!

如果你真係呢類同學又唔洗太灰嘅!只要你有決心,無嘢係無可能!加上如果你本身冇補開習,但嚟緊呢年有少少資源搵到個好嘅學習資源,絕對都可以幫你係成績上有所突破嘅!

全港首創嘅DSE網上學習平台—AfterSchool入面有大量由狀元級導師親製嘅網上課程,更加可以比你針對自己嘅需要,選擇最合適嘅網上課程,隨時隨地、安在家中都可以輕鬆上堂,極速升grade!

2.自律性低

自修嘅感覺就好似成年Study Leave一樣。DSE前放一兩個月Study Leave,你可能會因為知道DSE快到而係短時間內努力溫書衝刺,但如果俾成年咁長嘅Study Leave你,你又有幾大信心自己有足夠嘅自律性堅持到底呢?個道理就好似跑100 m你可以全程都全力衝刺,因為距離夠短。但跑1500 m就好難咁做。到時可能又臨考DSE前先做Deadline Fighter認真溫書。

另外自修嘅同時,你會發現身邊少咗好多朋友同老師鞭策自己溫書。以前係學校有好多同學同你一齊搏盡,你可能見到某某努力溫書嘅榜樣又激勵到你俾心機溫書,喪氣時又有大把人可以同你互相傾訴,亦可以組織Study Group互相分享筆記同學習心得,成個氛圍好易令你因為羊群效應而認為溫書係好理所當然嘅事。

但自修時,就成日見到啲朋友考完DSE好似脫咗疆嘅野馬咁, 加上大學一年級比較輕鬆自由,就會不停出去玩, 又會成日分享啲大學遇到嘅新奇事,好似O Camp(迎新營‌)、上莊、走堂等等。

3. 缺乏學校嘅學習資源

以前學校老師成日俾功課同練習你做,成日放學留低補課,又有測驗同考試逼你溫書,唔洗特登去搵,學習資源都隨手可得。但自修會少咗好多學校嘅資源,例如我自修溫英文嘅時候,先發現唔係學校讀,就算自己有搵練習做,都係唔夠以前老師俾得多;就算自己聽多啲英文,都唔夠以前日日上英文堂聽老師講英文聽得咁多;就算有朋友願意出來陪你練Oral,都唔夠以前係學校定期練Oral練得多。明明努力咗,英文反而生疏咗,好難講有進步。

但係另一方面,係學校重讀又會佔用你好多時間學啲你明明已經識嘅嘢,要做好多對你考DSE冇咩用嘅功課,IES又要再做過等等,所以有好有唔好啦。

不過好彩嘅係而家只要你有心,網上都大把免費資源任你用,AfterSchool本身都提供唔少免費嘅網上課程,又定期出下高質嘅學習心得分享!如果你決定自修,呢個平台絕對會係你嘅DSE得力助手!

決定Retake DSE:應該揀自修定重讀?

如果決定咗重考,就要諗自修定重讀好。

重讀

重讀即係重讀中六一年,同留班感覺差唔多。

重讀嘅好處
有學校嘅資源,如練習、老師指導、同學嘅鼓勵同支持,可以鞭策自己讀書冇咁易怠惰。

重讀嘅壞處
要做過曬啲SBA同功課,明明上堂學過曬啲課題,都要照上堂、測驗考試同補課,佔用你唔少黃金嘅時間。

自修

即係自己安排時間溫書,好似study leave咁。

自修嘅好處

  • 有充裕嘅時間,唔使應付學校嘅課業,可以有更多時間溫書同做past paper,針對自己嘅弱處重點提升。多咗嘅時間可以用嚟做運動、做兼職同補習。
  • 可以靈活安排工作。比起重讀,可以安排自己嘅生理時鐘,瞓夠先溫書,溫攰咗可以小休。喺適合自己嘅環境溫書,唔使翻學校,慳翻啲交通時間。

自修嘅壞處

  • 真係要自律、自律同自律!成年流流長好易怠惰。唔溫書又唔翻學校好易生疏同退步,水平仲低過考DSE嗰陣。
  • 如果冇咗學校老師嘅幫助,又冇補習,可能會冇咩進步嘅方向。自己又唔識做卷嘅正確策略嘅話,有啲科自己用錯嘅方法狂操卷都會冇咩進步。

重考DSE不建議嘅策略:邊讀書邊自修

有啲人JUPAS入咗唔理想但都可以接受嘅科目,唔捨得放棄而家入咗嗰科、唔捨得額外花一年時間去重讀或自修,但又唔甘心入唔到心儀科目,就打算邊讀邊自修重考,如果重考後仍不能成功升分入到心儀科目,就繼續讀而家讀緊嗰科。

我唔建議呢種兩頭唔到岸嘅做法。咁不但會影響到你嘅學業,就算影響唔大,你都一定會比好多專心重讀或自修嘅人少咗好多時間預備重考DSE。

重考升分本身就唔容易,好似逆水行舟咁,如果付出唔夠多時間溫習,就只會生疏倒退,直接啲講,何必為咗自我安慰自己「努力過多一次」,而明知會失敗都要重考呢?如果想重考,就一定要搏盡先可以無悔!唔係只係浪費心力。

溫馨提示:報考下年DSE文憑試程序

如果在校重讀,透過學校報考DSE就得。

但如果決定好要自修,就記得要喺2020 年 9 月 11 日 至 10 月 8 日期間,去「香港中學文憑網上服務」右面「自修生帳登記戶」>「自修生報名」>「 香港中學文憑考試報名系統」報名下年嘅考試,同喺10月15日或之前繳交考試費用,如果遲咗報名或者交考試費用,就要額外交幾百蚊附加費架啦!

更多自修生報考資訊

總結

總括而言,自修會遇到嘅困難真係一籮籮,而且絕對比你想像中嘅大。Retake DSE or Not呢個決定真係唔易做,希望上面嘅內容可以幫你容觀咁睇到自修嘅優劣,幫你做到一個明智嘅決定喇!

如果你已經決定咗喺嚟緊2021會retake DSE,而對2021 DSE自修生嘅時間表、JUPAS放榜等等有疑惑嘅話,可以睇下Afterschool另一篇文章【2021年最新】DSE自修生報名必讀懶人包【DSE 時間表】2021 DSE 考試時間表及重要日子,相信可以幫你哋了解更多關於2021 DSE嘅詳細流程。