【大學五件事】香港大學生必做?

AfterSchool
AfterSchool 2020-1-23 4,303

Photo by Joseph Chan on Unsplash

好多人入U之後成日都會聽到「大學五件事」,仲話冇做哂呢必做嘅 5件事就等於冇入過U 😢 😱 唔知大家有冇聽過呢?AfterSchool 同你探索呢度多姿多采嘅大學文化!

大學五件事到底係邊五件?

「大學五件事」其實就係讀書、住hall、拍拖、上莊同 做part-time 啦!喺短短嘅4年,要做晒可能好簡單,但係要做得好就可能唔易啦~ 逐個逐個分析下先!

1) 讀書

你以為升咗大學之後就唔使讀書?傻啦~ 唔少人都話上到大學仲辛苦過中學嘅時候。大學生又要寫 academic essay,又要做 project,又要周圍搵freerider做嘢,又要溫習準備midterm test同exams⋯ 如果少咗份堅持同耐力,好容易就爛grade架啦。為咗靚grade同GPA,大家都真係搏晒老命!

2) 住hall

好多中學生升U後,其中一個最想做嘅嘢就係住hall啦。除咗可以認識新朋友外,有啲係希望可以獨立啲。每間U都有佢哋特別嘅 hall culture 架,而且唔同hall 又會chur 啲~ 

好似HKU咁,宿生係要參加唔同嘅活動攞夠分先可以繼續入住架。小編就覺得非常熱血,你呢?

另外住hall都唔簡單架,因為好多人都想住,但係hall位有限呀,大部分都要留俾international students。如果year 1嘅同學仔無報或者跌咗落waiting list,可能要等幾年架。

3) 拍拖

唔少同學仔升大學個陣都係A0,完咗3年高中嘅辛酸梗係想快啲出pool啦!當然如果搵到鍾意嘅人就梗係開心啦,但係都怕遇到啲「players」、「渣男」、「渣女」!而且大學都唔係咁容易識到人架,所以小編我都係出唔到pool 😔 有邊個想做單身狗架!

4) 上莊

五件事當中,小編就認為上莊係最chur同辛苦嘅嘢。上莊即係做學生會或學生會附屬學會嘅幹事,要為學會嘅members舉行活動。因為上莊都比較多嘢做,好多人都會發現上莊後無辦法平衡學習同上莊,結果chur盡自己,好後悔。但係上莊都有好處架,除咗可以識到多啲人,好多人都覺得上莊係一件好熱血嘅事,係一種難忘嘅回憶嚟~

5) 做part-time

你知唔知原來香港超過90%嘅大學生都係半工讀嘅呢?學生做兼職有好多原因,除咗為咗交昂貴嘅學費外,有一啲係因為想賺取額外收入同積累工作經驗,以更好嘅CV幫助就業。大學彈性嘅上堂schedule就令到返part-time變得容易~所以咪變成大學其中一件嘅必做五件事囉。小編仲成日見到啲同學上堂上到一半就走咗去返工,半工讀都幾辛苦架。

唔同大學有唔同嘅「五件事」?


Photo by Ribhav Kala on Unsplash

小編有日同一啲讀唔同大學嘅朋友傾下計,發現原來大家大學都有唔同嘅「五件事」,唔知係唔係真嘅呢?讀 HKUST 嘅朋友同我講話佢哋嘅「五件事」竟然係住hall、拍拖、上莊、做part-time、同做intern (實習)啊!朋友同我講笑話可能讀書已經成為咗佢哋嘅日常~所以返intern就升級做咗 UST 嘅必做「五件事」。

「五件事」真係香港大學生嘅日常?


Photo by Alan Chen on Unsplash

讀書、住hall、拍拖、上莊同 做part-time 真係呢度大學生嘅真正生活?小編相信唔少大學生都未必做得晒~最主要原因可能就係大學生真係太忙喇,真係要分身先可以做好晒所有嘢!顧得掂上莊或者part-time,又唔夠時間去上堂同溫書喎。最驚就係收到一啲chur嘅class timetable,想做晒五件事但係又分配唔到時間,結果chur盡自己 😨 所以做香港大學生都唔簡單架~

唔知大家點睇香港嘅大學生活呢?仲想知多啲?即睇AfterSchool【中學VS大學】校園生活大不同》,睇下中學同大學有咩唔同!

免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool