心理學 (Psychology) 一向係大學嘅熱門學科，但唔少人有疑惑，呢科係讀咩？ 學讀心？ 讀完就做得心理學家？ 讀心理學出路好窄？ 錯哂啦！ 心理學讀嘅嘢好廣泛，出路亦唔止得心理學家㗎！ 不過讀心理學之前，要認真考慮就真嘅，咁要諗啲咩呢？繼續睇埋落去啦！ AfterSchool 小編整合咗各院校嘅心理學課程、出路，逐一解答你對讀心理學嘅問題！ 心理學讀咩？ 人人都話心理學有趣，係咪人人都知心理學讀咩？呢科當然唔單止係讀心啦！心理學涵蓋嘅範圍極之廣泛，簡單嚟講，係用科學嘅方法研究人類思想、行為、情緒嘅學科。心理學分為理論心理學、應用心理學兩大領域，同時亦涉及好多其他領域，當中例如有： credit: unsplash @Robina Weermeijer 教育心理學 (Educational psychology) 臨床心理學 (Clinical psychology) 認知心理學 (Cognitive psychology) 性格心理學 (Personality psychology) 近年興起嘅正向心理學 (Positive psychology) 都係其中一種。 心理學同人嘅生活關係密切，家庭、教育、社會關佢事，醫學、神經科學、哲學都關佢事。實際上，好多人文科、自然學科都同心理學有關。 邊啲院校有得讀心理學？ credit: unsplash @Priscilla Du Preez HKU Psychology 港大心理學冇分科收生，佢係 Social Sciences 嘅其中一個核心學科。想入 HKU psychology 嘅話，要先入讀以「大類收生」(broad-based) 嘅香港大學社會科學 (JS6717)，讀一年後揀心理學做 major。 CUHK Psychology 中大心理學有兩個收生途徑：第一，「大類收生」。首先入讀中大社會科學系 (JS4801)，讀完一年再揀心理學做 major。第二，「分科收生」，直接選中大心理學 (JS4862)。呢兩個收生方法係同步進行㗎，如果你未係好清楚自己啱唔啱讀心理學，不妨考慮入咗「大類收生」先，讀完心理學嘅入門課程先再做決定！ CityU Psychology 城大心理學同中大一樣，分別有「大類收生」同「分科收生」兩個途徑入讀。前者可以先選擇社會及行為科學系 (JS1110)，讀一年後揀心理學做 major。後者就係直接入讀城大心理學 (JS1112)。 值得留意嘅係，根據 JUPAS 嘅數據顯示，2020、2021年度，社會及行為科學系 (JS1110) 同心理學 (JS1112) 兩個學系嘅收生人數都差唔多，大約17-18 人。 所以，唔好以為入讀「大類收生」嘅社會及行為科學系，就冇咁大競爭，事實上佢同「分科收生」嘅心理學系一樣大競爭㗎。 credit: unsplash @Jeswin Thomas EdUhk Psychology 教大心理學只得單獨收生，有興趣嘅同學直接揀 EdUhk 嘅 Social Sciences in Psychology (JS8651) 就得㗎啦！ LingU Psychology 嶺大心理學同港大一樣，只可以透過「大類收生」入讀。想喺 LingU 讀心理學嘅話，要先入社會科學學系 (JS7300)，第二年揀 Applied Psychology (應用心理學) 做 major 就得。 OUHK Psychology 公大心理學都係只得單獨收生，揀科嗰陣，直接填 OU 嘅 Social Sciences in Psychology (JS9001) 就可以啦！ 院校收生懶人包 雙途徑收生：CUHK、CityU 只有「大類收生」：HKU、LingU 只有「分科收生」：EDUhk、OUHK JUPAS 各院校嘅收生分數 (未計 weighting) 各院校學系 計算方法 Upper Quartile Median Lower Quartile Mean HKU 社會科學 (JS6717) Best 5 29 28 26 ／ CUHK 社會科學 (JS4801) Best 5 26 25 25 ／ 心理學 (JS4862) Best 5 28 26 26 ／ CityU 社會及行為科學 (JS1110) 4C+2X ／ 25 25 ／ 心理學 (JS1112) 4C+2X ／ 25 25 ／ * JS1110、JS1112 weighting：英文*2 EDUhk 心理學 (JS8651) Best 5 ／ ／ ／ 21 LingU 社會科學 (JS7300) Best 5 ／ 15 15 ／ * JS7300 weighting：英文*2、數學*1.5、通識*1.5 OUHK 心理學 (JS9001) 4C+1X ／ 16 14 ／ Source: 2020 JUPAS Admissions Scores of 9 JUPAS Participating-institutions 讀心理學要有咩條件？能力？入學要求？ credit: unsplash@Daniel 你可能會問，心理學有冇咩入學要求？ 答案係冇嘅。每間院校都冇特別列明，但有啲計收生分數嘅時候，英文科會有 weighting，可見揀得心理學嘅英文都唔可以太差。 讀心理學，除咗要背一大堆學者名、心理學理論、術語、實驗研究方法，仲要閱讀大量學術文獻，並將當中相關嘅整合、分析，寫成一篇篇嘅心理學論文。 或者你會話，睇文獻、寫論文呢啲難唔到文科仔嘅！ 讀心理學，文科底當然有著數啦，但如果你怕數字 / 生物科嘅話，你會讀得好辛苦。因為心理學都涉及數理，包括統計學 (SPSS 會係幫你分析數據嘅朋友！)，仲有生物心理學、神經心理學嘅一堆腦部及神經系統嘅名詞。 有咩心理學出路？ credit: unsplash @JESHOOTS.COM 臨床心理學家 (Clinical Psychologist) 臨床心理學家 (CP) 一般喺醫院或非政府機構 (NGO) 做，幫助有情緒健康、精神困擾問題嘅人；亦都有部分 CP 係私人執業嘅。 想做呢方面嘅專業嘅話，基本學歷要求係完成臨床心理學碩士。港大、中大都有開設成為註冊 CP 指定嘅臨床心理學碩士課程，但要入到一啲都唔容易，競爭可以話係非常之大！收生名額少，報讀人數多，GPA 低嘅話，真係連面試嘅機會都無。所以，要行呢條路，請準備青春同恆心！ 教育心理學家 (Educational Psychologist) 教育心理學家 (EP) 嘅服務對象一般為小朋友同學生，幫助處理佢哋嘅學習、情緒健康問題。 想做呢個專業，情況同做臨床心理學家一樣。基本入場就係港大心理學系提供嘅教育心理學碩士學位，而競爭一樣咁大。有意報讀教育心理學嘅話，亦都可以先報讀 PGDE (學位教師教育文憑課程) 同儲下教學經驗，有總好過冇嘅！ 學術研究 唔想做應用心理學家嘅話，你可以選擇做學者型、教學研究型心理學家。成為呢類心理學家，前提係要先取得心理學哲學 Ph.D (博士學位) 資格，之後喺大專院校教書同做研究。Lecturer、professor 就係佢哋啦。 credit: unsplash @Dan Dimmock 同心理學相關嘅工作 冇諗過要成為心理學界嘅專業人士，但又想從事同心理學有關嘅畢業生，有啲會選擇喺各大院校做研究助理 (Research Assistant)，主要負責唔同嘅研究，工作內容不外乎係收集 data、分析數據、寫文。 有啲會選擇喺非牟利機構做項目主任 (Project Officer)，主要協助、統籌唔同嘅活動，工作內容就視乎返機構本身。 完全唔相關嘅工作 唔少畢業生會當心理學 degree 係 general degree，從事 BBA / 其他行業嘅工作，例如好多人會做 HR (Human Resources)，因為心理學有個 field 係講關於人力資源嘅。 credit: unsplash @Kelly Sikkema 講到尾，讀書最緊要有興趣！心理學係一門有趣嘅學科，出路都有唔少選擇，但要成為心理學家嘅話，未來條路會相當大競爭同漫長 (讀碩士係基本！)。揀讀心理學之前，現實啲諗，要考慮唔少嘢㗎！如果你對心理學有興趣、有耐心又堅持到，不妨考慮下佢！ 大學選科系列： Social Science 社會科學 | Psychology 心理學｜Speech Therapy 言語治療｜Nursing 護理學｜Social Work 社會工作｜HKU BA 港大文學士｜Linguistics 語言學｜PGDE 教育文憑｜Early Childhood Education 幼兒教育｜Sociology 社會學
