【轉校必睇】中學如何轉校?申請程序一文睇晒

AfterSchool
AfterSchool 2020-9-4 2,487

為咗子女有個更好嘅學習環境,唔少家長都會諗到轉校。但中學轉校申請有咩手續?轉校原因又點寫?AfterSchool為你整理咗詳盡嘅轉校指南,幫你子女入最合適嘅中學!
 

中學轉校有好多原因:學習成績跟唔上、校園人際關係唔融洽、想有更大發展空間等等⋯⋯良好嘅校園環境對子女成長影響深遠,但轉校都唔係一個輕鬆嘅決定。為咗幫子女轉校,相信好多家長都好頭痕。今日AfterSchool就同大家講吓中學轉校申請有咩手續、轉校原因點寫、需要注意嘅事項等等,希望幫到學生成功入到最適合自己嘅中學,享受健康愉快嘅校園環境。

 

中學選校注意事項

詢問子女意見

中學轉校之前,首先要物色一間最適合子女嘅學校。除咗學校成績、校風之外,子女嘅性格、能力、意願都係好重要嘅考量。雖然子女可能對揀一間「好」學校冇咩概念,但詢問子女嘅意見可以幫助照顧佢哋嘅情緒,同時俾佢哋知道自己都有份參與在其中、感到被重視,而唔係俾家長「強行」做決定。

另外,轉校建議喺低年級(中一至中三)嘅時候進行,一嚟子女可以喺升學之前更容易追上學習進度,二嚟可以減低對舊校唔捨得嘅情緒,過渡得更容易!

 

學校資訊

為咗更詳盡地了解唔同學校嘅資訊,家長可以多啲留意心水學校嘅新聞同近期表現,或者瀏覽家庭與學校合作事宜委員會嘅「中學概覽」,清楚知道學校嘅基本背景資料、學費、設施、課程框架同未來方針等,可以更快搵到符合理想條件嘅中學!有機會的話,家長亦可以帶同子女參觀校園、出席開放日,對學校有更全面的理解。

另外,AfterSchool之前亦有整理好2020年全港中學排名同選校指南,俾各位家長可以參考。

如果喺中學轉校上遇到特別問題,家長可以帶埋子女親臨就近嘅區域教育服務處,尋求學位安排支援服務上嘅服務。屆時會有職員會根據個別情況,協助子女中學轉校上嘅問題。

 

申請轉校手續

揀完心水學校,唔好心急開始退學手續住!建議家長先向心儀學校申請學位,待該校提供學位之後,先向舊校申請退學。AfterSchool今日就教大家點寫好轉校原因、清晰了解成個中學轉校流程!

 

申請要求和表格

每間學校都有唔同嘅收生準則同手續流程。家長應先瀏覽心儀中學嘅官方校網,獲取相關資訊後,再填妥及遞交學校申請表。普遍而言,入學申請表可以喺校網下載,除咗個人資料、學生近照外,大部分都學校都需要近期成績表、參與過嘅課外活動同獲得過嘅獎項。

 

轉校信/自薦信

透過轉校信,家長可以幫子女向中學自薦成為插班生。轉校信並非必須,因此家長應因應學校嘅申請要求而寫。

轉校原因又點寫呢?你可以解釋子女目前就讀喺中學所遇到嘅問題、報讀嘅中學點樣改善呢個問題,或者其他適合子女就讀嘅原因,例如學校嘅教育方針、教學內容、上課環境、校園設施等等。家長表現出自己對學校嘅認識之餘,同時語氣亦誠懇、謙遜就OK!內容長度亦唔需要太長,兩、三小段已經足夠。

而子女個人成績、課外活動等就唔需要喺信內詳細說明啦~因為學校要求附加嘅文件,包括子女成績表同獎狀等,都足夠充份話到俾人知相關內容!

 

入學試

唔同學校會因應自身唔同嘅評選程序嚟進行收生。一般嚟講,經初步遴選後,合格者會被安排參加入學試(通常為筆試),以測試學生嘅綜合學習同理解能力。唔同學校嘅入學試有唔同指標,例如國際學校測試科目通常為英文、數學,而本地學校就會考埋中文。

假如有意想子女轉校到國際學校,建議家長可先評估子女的英語能力、並加強訓練,增加入學機會。

 

面試

除筆試外,子女亦需要參加面試,甚至會見家長,以了解家長嘅教育理念、對子女嘅將來規劃等。為考核兩文三語能力,學生有機會需要以英文同普通話進行對答。除咗表達能力之外,老師亦會留意學生禮儀、性格同應對。所以只要學生表現自信、敢於表達自我,就可以留下良好印象啦!此外,學校都會考慮學生對轉校嘅意見同感受。假如考生表現抗拒,無疑會有負面影響。所以轉校之前,家長要聽下子女點諗先啦!

咁轉校有咩常見面試問題呢?除咗自我介紹、轉校原因之外,對答環節大多都係關於日常生活、個人興趣/習慣方面嘅問題,亦有機會要學生朗讀文章、看圖作句等。另外,亦有唔同的時事題、思考題,希望知道學生對議題嘅諗法和意見。不過,學生都唔需要咁緊張,好多時候都唔係要你答到一百分嘅答案,只要有自信、對答流暢,平時留意多啲身邊事物就可以啦~

 

退學信

開心收到offer,就要幫子女進行退學手續啦!家長可以上返就讀學校嘅網頁睇返退學手續程序。一般嚟講,退學信冇指定格式,但亦有部分學校對此有特別要求(例如以搬遷為由嘅學生必須包括屋企地址)。除咗表達對舊校多年教育嘅感謝之意外、內文亦可包括學生退校原因同子女將會轉到嘅新學校。內文唔使長篇大論,簡單交代就足夠。態度友善、誠懇為佳!

 

中學轉校常見收生條件

各中學對轉校生都有唔同要求,而每個指標都佔唔同比重。常見指標包括成績、操行、課外活動同面試表現。某啲學校如果子女有兄弟姊妹已經於該校就讀,亦有機會加分。

大多學校會將較大比重放在面試/筆試表現上,因為可更直接、全面了解學生想法和能力。而成績方面,主科(中、英、數、常)嘅成績有較大影響,乙級或以上嘅表現為佳。為達到全人發展,課外活動包括體育、音樂、藝術、服務或其他專長都可以增加額外分數。所以,子女可以在轉校前讀好成績,或發展更多興趣、裝備自己。

 

若轉校成功,亦要多加留意子女適應新學程體系能力,例如提前學習銜接課程或制定個人的學習計畫,避免子女出現難以適應的問題。

最後祝大家可以成功入到心儀嘅中學、有一個愉快充實嘅校園生活!

 

免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool