小學係小朋友學習品德、守秩序、同其他人相處，以及學習語言同其他基礎知識嘅地方，而小學六年亦都係小朋友寶貴嘅成長階段。喺香港嘅競爭文化下，連小一面試都變成小朋友之間競爭嘅場地，而「名校效應」就令唔少家長用盡千方百計，都想將自己嘅子女送入心儀嘅學校，希望增加小朋友將來升上 Band 1 名校中學嘅機會。 坊間普遍準備小一升學係由小朋友 K3 開始（甚至更早)，而家長普遍好緊張小朋友嘅小學面試。有見及此，AfterSchool 小編整理咗小一面試嘅要點，包括選校時要注意嘅地方、小一面試 Tips、面試自我介紹、小一面試題目一覽等等。希望各位準小朋友都可以獲派心儀小學！ 升小一準備 小一選校資料搜集 喺一切報名程序開始之前，家長可以事先上教育局網站睇睇自己有興趣報讀嘅小學，同埋小學嘅所屬校網，選擇心儀學校，做定小一選校嘅第一步資料搜集。 未清楚想揀咩學校？AfterSchool 全港小學概覽幫到你！裏面除咗有香港 Top 100 小學排名，重有分區小學排名！未揀定學校嘅你一定要睇睇！ 清楚升小程序 升小程序主要分為兩部份：(1) 小一自行分配學位；(2) 統一派位（小學派位，或稱「大抽獎」）： 小一自行分配學位 根據教育局，家長可以申請一間官立或者資助小學，然後學校會根據教育局所定嘅準則分配學位。 如果家長係喺學校工作（不論職位），子女都必獲學校取錄； 其他申請同學根據「計分辦法準則分配」嘅學位，越高分越容易獲學校取錄。小一面試表現往往都喺呢部份佔分好重，所以家長可以繼續喺度睇睇面試貼士、小一面試問題等等，增加子女喺小一自行分配學位階段考到心儀小學嘅機會！ 延伸閱讀：2023 小一自行分配學位懶人包 + 必睇攻略 統一派位 未能喺自行分配學位階段得到學位嘅同學，就會進入「統一派位」嘅階段。教育局會根據 (1) 校網、(2) 家長選擇、 (3) 隨機號碼 分配小一學位。 統一派位（小學派位）結果通常喺每年六月公布。 延伸閱讀：教育局小一入學統籌方法 延伸閱讀：2022 小一統一派位程序懶人包 + 必睇攻略 面試小貼士 Credit: unsplash @Carl Heyerdahl 面試衣著要求 面試嘅第一印象非常重要，相信各位家長都好清楚。小朋友可以選擇著整齊幼稚園校服，或者斯文得體嘅便服。 小一面試大部分都需要家長陪同出席，甚至一齊參與面試，所以家長都緊記要穿著適合嘅衣著。雖然出席小朋友嘅學校面試衣著唔需要太正式，但過分休閒嘅服裝，例如拖鞋、熱褲、吊帶背心呢啲就要盡量避免。 如果家長打扮得得體，令校方覺得家長尊重場合，而且有誠意想俾小朋友入讀呢間學校，都會令小朋友嘅入學加分㗎！ 面試表現 Dos and Don’ts 面試往往係小朋友能唔能夠考入心儀小學嘅最重要因素：小一面試表現好嘅小朋友，往往都會為校方留下好嘅印象，成功入學機會大增！ 小編整合各種面試表現，家長可以及早灌輸呢啲俾小朋友，令小朋友可以喺小一面試嘅時候有理想嘅表現！ ✓ ✖ 小朋友 + 家長：保持禮貌 小朋友 + 家長：保持笑容 小朋友 + 家長：準時到達面試場地 / 登入面試網站 小朋友 + 家長：衣著整齊得體 小朋友：情緒穩定，唔會突然哭鬧/發脾氣 小朋友 + 家長：準備好小一面試問題答案，令校方覺得家長同子女都有為小一面試做好準備 小朋友：唔回答老師問題，十問九唔應 小朋友：唔用言語回答老師嘅問題，淨係點頭或者擰頭 家長：過分吹捧自己嘅小朋友 家長：回答問題嘅時候，問一句答一句，而且答案不加以解釋 以上綜合咗小一面試理想嘅表現，但係小朋友畢竟都只係小朋友，做唔足都係人之常情。家長可以鼓勵小朋友喺面試嘅時候講多啲嘢，或者預先教定小朋友點樣回答小學面試問題，但過分催谷小朋友、或者強迫小朋友要達到自己嘅標準都未必係明智之舉！ 面試自我介紹 小學面試自我介紹可以講啲咩？ 姓名 歲數、出生年月日 幼稚園名稱、最鍾意嘅幼稚園科目 家庭（兄弟姊妹、家人名稱、家人職業、住邊區） 平時鍾意做啲咩 / 個人興趣 疫情下嘅小一面試 影片面試注意事項 Credit: unsplash @truss 由於家長可能係第一次同小朋友做 Online Interview（影片面試），所以可能會有不可預知嘅 Techinical Problem。 家長可以預早登入面試網站（例如 Zoom），並且設置好 Wi-Fi、電腦嘅鏡頭同收音功能，確保唔會因為網絡問題而遲到，影響面試老師對小朋友嘅印象。大家亦都可以花心機選擇屋企一個適合進行面試嘅角落，務求俾老師一個乾淨、整潔嘅感覺。 另外，由於喺影片面試嘅時候，小朋友同老師係唔會有真人嘅互動，而係望住個屏幕進行對答，所以小朋友未必適應呢種交流模式。 家長可以事先同小朋友練習影片面試，例如爸爸可以喺屏幕嘅另一邊飾演面試老師，媽媽擔任家長嘅角色，再進行模擬面試，令小朋友喺正式面試之前有機會嘗試面試嘅感覺。 小一面試 — 家長都要出席？ 唔少人都有一個疑問：明明小學想收嘅人係小朋友，點解家長都要出席小一面試？ 透過同家長嘅交談，學校可以知道家長嘅教育方式、家長同學校嘅教育理念是否一致，同埋家長有冇誠意俾小朋友考入呢間學校（例如喺小朋友嘅重要日子，即小學面試，會唔會幾忙都抽空出席）。 同時，學校亦都可以喺呢個面試機會，睇睇家長同小朋友嘅互動、相處模式同關係，增加對小朋友背景嘅了解。 其實學校明白家庭教育對小朋友發展嘅重要，而小朋友喺品德、成績等方面嘅發展，好大程度取決於家庭教育，所以家長嘅教育方式、教育理念會係學校決定是否取錄呢嘅學生嘅一大準則。 小學面試題目一覽 Credit: unsplash @sigmund 個人篇 小朋友你叫咩名？ 你有冇英文名？ 你今年幾多歲？ 你嘅出生年月日係幾時？ 你住邊度 / 邊區？ 你最鍾意食咩？ 你有冇手提電話？你通常用手提電話/平板電腦/電腦嚟做咩？ 家庭篇 你屋企有咩人？ 屋企電話幾多號？ 平時你放假會同屋企人會做啲咩㗎？ 你最鍾意嘅屋企人係邊個？點解嘅？ 平時邊個會幫你喺手冊度簽名？ 邊個同你檢查功課？ 邊個教你做功課？ 幼稚園篇 你讀邊間幼稚園㗎？ 你最鍾意上邊堂？ 返學最鍾意做咩？ 你最好嘅朋友係邊個啊？點解你鍾意同佢玩嘅？ 平時邊個帶你返學、接你放學？ 平時你係點樣返學㗎？ 閱讀篇 你平時有冇睇書㗎？ 你鍾唔鍾意睇書？ 你最鍾意邊本中文書啊？ 你最鍾意邊本英文書啊？ 你最鍾意嘅故事角色係邊個啊？ 常識篇 一個月 / 今個月有幾多日？ 一星期有幾多日？ 一日有幾多個鐘？ 一個鐘有幾多秒？ 疫情期間，我地要點樣保持個人衛生？ 去完廁所要點樣做？ 一年有邊四季？ 過馬路嘅時候，我地有咩要留意？ 中秋節嘅時候，我地會點慶祝？ 你可唔可以講幾個地鐵站名俾我聽？ 情境篇 如果你喺條街度盪失路，你會點做？ 如果爸爸媽媽遲咗接你放學，你會點做？ 如果你唔小心打爛一個爸爸媽媽好鍾意嘅花樽，你會點做？ 如果有陌生人請你食糖，你會點做？ 如果要走火警，我地有咩要做，有咩唔可以做？ 如果有一件玩具，你同細佬都好鍾意，你會點做？ 小一面試班好與壞 Credit: unsplash @kimberlyfarmer 平時同小朋友練習小一面試嘅時候，小朋友都坐唔定，又唔肯乖乖答問題？ 教極小朋友講啲「標準面試答案」，佢都唔肯記，又或者記極都記唔入腦？ 唔少家長喺呢個時候，都俾「小一面試班」吸引，覺得呢啲面試班可以幫到小朋友練習面試，考到心儀學校嘅同時，又唔會因為面試練習而破壞親子關係。 但係，小一面試班有各種好處同壞處，小編整理咗啲面試班 Pros and cons，家長可以參考吓，再考慮子女有冇需要報讀。 小一面試班好處 面試班壞處 小朋友可以有面對面試官嘅經驗，到真正小一面試嘅時候會冇咁緊張，表現亦都會比較穩定，例如會突然大哭嘅機會會減低 面試班提供大量小一面試題目範本 面試班導師會引導小朋友答出面試標準答案，而經過重複練習之後，小朋友會自自然然喺小一面試嘅時候講到理想嘅答案 面試班往往將機械化嘅答案灌輸俾小朋友，或者要求小朋友重複練習回答小學面試問題： 但機械化答案係面試嘅大忌，亦都會令小朋友大大減分 家長要點樣同小朋友準備？ Credit: unsplash @goodmood77 小一入學競爭激烈，家長通常都好緊張小朋友喺小一面試嘅表現。究竟家長可以點樣有效同小朋友準備小學面試？ 第一，家長可以及早向小朋友灌輸面試表現 Dos and Don’ts。例如，家長可以及早訓練小朋友要有禮貌、控制情緒等等。呢啲訓練唔只對小一面試有效，重可以訓練小朋友平時嘅表現。 第二，家長可以喺平時事先同小朋友練習必問小學面試問題、引導小朋友畀答案。小朋友喺多次練習之後，就會記得要點答，之後可以喺面試嘅時候得體地講出答案。 小一叩門面試 Tips 除咗以上嘅面試要點之外，會去叩門面試嘅家長同小朋友記得要注意一下嘅 points： 事先做好決定去邊幾間小學叩門 （例如事先計畫好行程，例如點去唔同嘅學校） 做好叩門資料搜集，睇清楚自己想叩門嘅學校嘅叩門安排，避免浪費時間去唔接受叩門嘅學校度叩門 練習小學面試問題、面試自我介紹 帶齊所需文件（包括小朋友身分證正副本、家長身分證正副本、派位表格、幼稚園成績表、證件相、領洗紙、證書獎狀、貼足郵票嘅回郵信封、小一叩門申請信、Portfolio、幼稚園推薦信等等） 叩門申請信同 小一 Portfolio 都唔好抄範本 (Template)，並且睇清楚學校係咪收 portfolio （如果學校表明唔收 小一 Portfolio，但家長照交，反而會造成反效果！） 申請信：記得留 contact，避免因為學校無法聯絡家長而錯失入讀機會 小一叩門面試更可以考慮搵返之前申請過嘅學校叩門，以表誠意，增加入讀機會 延伸閱讀：小一叩門信攻略：點寫叩門信先可以增加子女面試機會？ 延伸閱讀：中學面試攻略——必學面試技巧、中學面試題目、Interview 自我介紹 小學面試 Q&A 小學面試可以點準備？ 家長可以喺日常生活中同小朋友練習一下面試必問問題，令小朋友習慣同大人對答，同時保持禮貌，唔會怯場。 升小面試自我介紹有咩要講？ 小朋友可以簡單介紹一下自己，包括自己嘅中英文名、歲數、有咩同住家人、就讀幼稚園名稱等。雖然要為面試做準備，但係喺面試嘅時候「背答案」會令學校對小朋友大大扣分！ 小一面試班有咩好處、壞處？ 雖然小一面試班可以為小朋友提供一個練習面試嘅環境，令小朋友喺不斷練習好，能夠答出面試「標準答案」，增加入學機會；但係「機械化答案」係面試嘅大忌，而唔少小學都講明唔希望收到一啲只係識「背答案」嘅小朋友。所以，喺報讀小一面試班之前，記得要好好衡量課程嘅利弊先啊。 面試系列 中一面試｜小一面試 https://unsplash.com/photos/4R6pg0Iq5IU
