【英華書院 Ying Wa College】名校專訪系列 — 深水埗直資傳統男校

AfterSchool
AfterSchool 2021-8-27 979
英華書院喺2021 DSE出產一名 DSE 狀元! 想知多啲英華書院排名、英華書院 Banding、英華書院面試等最新資訊? AfterSchool 同你一文介紹 Ying Wah College!
直資男校唔係有好多間,AfterSchool 小編今日同你介紹位於深水埗區嘅一間傳統名校,Banding 屬於 Band 1B 嘅英華書院 (Ying Wa College)

英華書院學校簡介、英華書院排名

位於深水埗區嘅英華書院 (Ying Wa College) 係一間直資基督教男校,全港排名大約 48-70。英華書院 Banding 係 Band 1B,而學校嘅辦學宗旨係「承傳基督精神,實踐全人教育。共建青年之家,培育社會棟樑」。學校係香港補助學校議會 22 間成員學校之一,仲係香港現存歷史最悠久嘅學校,亦都係香港傳統名校之一,而英華書院評價一直都不俗。英華書院係一間「一條龍」學校,結龍小學係英華小學,而英華書院同位於港島區羅便臣道嘅英華女學校 Ying Wa Girls’ School(英華女校)係姊妹學校。
學校喺 2008 年正式「轉直資」,全年學費大約 $22,288。校方本著「實而不華、卓而不傲」嘅精神,將學校定位為「平民直資」。
Ying Wa College 一共出產過兩個公開試狀元,包括 1997 年香港中學會考「10A狀元」曾申翹,同埋 2021 年香港中學文憑考試「7 科 5**狀元」,現於香港中文大學修讀內外全科醫學士課程 — 環球醫學領袖培訓專修組別升學嘅程朗。
直至 2018 年 (第 33 屆),英華書院喺香港傑出學生選舉共出產 3 名傑出學生,而許冠傑、梁錦松、張舉能、周耀輝、黃修平、王宗堯,同埋喺 2021 年東京奧運為港歷史性奪得第二面奧運金牌嘅張家朗等知名人士都係英華校友!
學校地址
九龍深水埗英華街1號
學校聯絡方法
電話: 23368838   傳真:23361920
電郵: mail@yingwa.edu.hk
 

學校歷史背景

Credit: unsplash @deleece 
Credit: unsplash @deleece 
英華書院 (Ying Wa College) 舊稱係 Anglo-Chinese College,於 1818 年由倫敦傳道會傳教士馬禮遜喺馬六甲成立,1843 年遷至啱啱開埠嘅香港。學校辦學團體係中華基督教會香港區會,而學校校訓為「篤信善行」Steadfast Faith Beneficent Deeds,而英華書院 Banding 一直都係 Band 1。
由於 Ying Wa College 係香港有最長歷史嘅學校之一,而且學校喺漢學、華語翻譯、新教在華傳教、香港開埠及教育、華文報刊出版同埋印刷方面嘅歷史都息息相關,所以學校嘅辦學過程都被視為香港基督教史同香港教育史當中嘅重要一環。直至今時今日,英華校內仍然存有當年由馬禮遜牧師所翻譯嘅聖經,而唔少同類型展品都喺學校校史館裏面展出。
英華書院有超過 200 年歷史,但係校舍現址歷史唔夠 20 年?冇錯!YWC 喺 200 年間曾經多次停止、恢復辦學,並且曾經先後喺港島堅道、般咸道、旺角弼街及九龍塘牛津道設立校舍,直至 2003 年先遷至西九龍填海區深水埗現址~
 

英華中學教學模式

英華書院作為一間 Band 1 英文中學,除咗中文、中史、中國文學、通識、視藝、宗教同埋體育之外,所有其他科目都係以英文授課。英華初中提供中國歷史、中國語文、宗教教育、普通話、視覺藝術、設計與工藝、通識教育、體育、地理、數學、歷史、經濟、綜合科學、英國語文、電腦及資訊科技、音樂;而高中就有埋中國文學、數學延伸單元一、數學延伸單元二、企業會計及財務概論、資訊及通訊科技;不過高中課程就冇咗普通話、設計與工藝,而綜合科學亦都分拆為化學、生物同埋物理。
英華書院共有五個社,亦即何福堂社 (Hoh Fuk Tong)、梁發社 (Leung Faat)、米憐社 (Milne)、馬禮遜社 (Morrison) 同埋鈕寶璐社 (Noble)。英華當然唔少得學會啦,學校出名嘅學會包括攝影學會電腦學會交通學會等。
喺學業方面,學校為高中同學提供 2X 及 3X 選修科目 (Electives) 嘅選擇,同學可以根據自己嘅興趣同能力,喺學校提供嘅 14 嘅選修科目裡面自由選擇 2-3 個選修科目。喺主修科目方面,學校亦都著重培育同學語文能力。
喺生涯與職業規劃方面,英華各級都設有完備嘅生涯教育課程,並且以工作坊形式進行嘅生涯規劃堂,以提升同學嘅自我認識同埋對升學嘅認識。學校鼓勵同學為自己嘅未來作充分知情嘅選擇。同時,透過學校強大嘅校友網絡,學校高中更加設有校友做導師嘅師友計劃,俾同學更認識各行業嘅發展。
 

Ying Wa College 師資與教學配套

2021 年新學年,陳狄安先生上任為新英華書院校長。師資方面,英華書院教師大約有 90 人,其中大約 90% 老師持教學文憑,而 100% 教學人員持學士學歷。年資方面,大約 60% 老師有超過 10 年嘅教學經驗!
Credit: Schooland
Credit: Schooland
英華書院每級 5 班,全校共有 30 班,校舍佔地 13000 平方米,為同學提供禮堂、校史室、電腦室、電腦輔助教學室、中文學習室、英文學習室、音樂室、樂器練習室、實驗室、工藝室、學生活動中心等。並有足球場、籃球場、健身室、室內游泳池、飯堂、暢通易達升降機以及觸覺引路帶等多項設施。
 

英華中一收生程序

英華書院 Ying Wa College 屬於「一條龍學校」,結龍小學係英華小學 (Ying Wa Primary School),而「一條龍」學校嘅小六學生可以選擇直接升讀結龍中學。
英華係一間直資學校,所以學校唔接受中一自行分配學位申請,亦都唔參加中學學位分配辦法嘅統一派位。喺報名時間方面,根據過往經驗,學校每年大約十月至十一月會接受下學年中一入學申請,有興趣入讀英華書院嘅同學一定要留意住校網嘅消息公布!
英華書院係直資學校,每年學費超過 $20,000,對於基層家庭嚟講,直資學校學費可能真係一個負擔,令有能力考入英華嘅同學放棄呢個機會。不過,同其他直資學校一樣,英華書院設有學費全免,或者減免一半學費。有需要嘅學生(包括來自綜援家庭嘅學生、同埋領取學生資助辦事處財政資助嘅學生)可以申請學費減免。想知多啲學費減免嘅詳情,可以去英華書院學校網頁了解更多。
P. S. 英華小學都係直資學校,全年學費 $18,000。
延伸閱讀:全港小學排名

英華書院面試

根據英華校網,小六同學嘅成績、操行要有乙等以上,先至有面試機會。想入讀英華書院嘅外校小四、小五同學一定要加油啊!
英華作為一間 Band 1 名校,當然唔會只係睇同學嘅成績同操行。根據英華校網,學校中一學生嘅取錄準則係「教育局成績次第、學業成績、課外活動、操行及態度、面試表現」。小六同學可以根據呢啲準則,審視一下自己成功考入英華書院嘅機會喇。
得到英華書院面試機會之後,相信小六同學同家長一定會好好準備面試,務求增加成功考入英華嘅機會。AfterSchool 喺網上搜羅咗英華書院面試題目,同學可以思考一下呢啲問題嘅答案,當係為英華書院面試做準備~
  • 你認為視象教學可否取代到校上學?
  • 你覺得現今的女生是否比男生強?請你形容你學校男生和女生相處的情況。
  • 你對背誦及朗讀課文的學習模式有何看法?
  • 我們應否說善意的謊言?
  • 假如你是班會主席,你會分別舉辦甚麼活動來提高班內的閱讀及學術風氣?
Credit: unsplash @Ian Schneider 
Credit: unsplash @Ian Schneider 
除咗直升學生(英華小學直升)之外,學校有大約 50 嘅外校生學額,競爭真係相當大。想喺芸芸小六同學之中脫穎而出,成功考入英華書院,除咗要有優良嘅校內考試成績同埋操行,仲要係英華面試表現得好,留個好印象俾學校面試老師!

英華書院評價 / 新聞

英華書院排名中上,校風淳樸,而且學生成績不裕,多年嚟都未見有負面新聞。Ying Wa College 嘅新聞主要都係英華書院 DSE 2021 狀元程朗嘅報導,當然唔少得關於香港劍擊奧運冠軍張家朗喺奧運奪金之後嘅訪問。學校嘅 Ying Wa Cry 亦都相當出名,大家喺英華嘅 Sports Day、Swimming Gala  等體育盛事都會聽到 Ying Wa College 同學大叫「Ying Wa, Ying Wa, Wa Wa Wa!」;喺學業方面,有家長指出學校「唔係硬催谷學業、多功課型嘅中學」,可見外界對英華書院評價都相當正面!

名校專訪系列
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool

AfterSchool 是一個針對DSE而設的網上補習平台,課程涵蓋多個 DSE 科目,讓同學足不出戶就可以享有優質教學。註冊用戶人達 50,000 人,當中超過四分之一學生為應屆文憑試考生,是全港最大型網上補習平台。