一年容易又過去，暑假話咁快差唔多又嚟。首先同考完 DSE 嘅同學仔講聲「辛苦晒」，而家係咪諗緊三個月流流長有咩可以做呢？相信唔少同學都會諗住搵份 Part time / 暑期工/ 兼職工作返吓，如果你都係一份子，咁 AfterSchool 呢篇文就幫到你啦～ Part time 、暑期工和臨時工有甚麼分別？ Photo by Scott Graham on Unsplash 工作時間 首先講吓呢三個工種嘅相同之處。相比長工 (全職)，佢哋嘅工作時間通常都會比較短。 兼職通常返全職時間嘅一半，即係一個星期可能返一至三日，一日返七至九個鐘；亦都有啲 Part time job 係一個星期返五日，每日返四個鐘。兼職每星期返嘅鐘數雖然唔多，但係相比臨時工或者暑期工，通常都會期望你長期返。 暑期工，即係 Summer job，顧名思義就只會需要喺暑假期間返工，唔會預你需要長期返。暑期工可以要求你好似 Full-Time 形式咁，一星期返足五日，又或者兼職咁返一半時間。 臨時工，又稱短期工作、炒散，相對暑期工同兼職嚟講，返工時間更加彈性：可以喺同一個時期返足幾個全日，又或者每星期返一日。臨時工通常會返展覽或者 event，例如動漫節、書展。呢啲情況公司需要大量人手喺某啲日子幫手，所以會聘請臨時工。 工作性質 兼職同暑期工通常都會需要面試，有時候面試會超過一次。 返工前或返工第一日，公司有機會同你簽返一份一式兩份嘅合約，公司同自己都會 keep 一份 臨時工有時係話請就請，唔需要簽約或特別面試。因為唔少臨時工都急住請人，可能喺今個星期，就會搵下星期返到嘅人，或者誇張啲嘅：今日報工，聽日即返。 薪金方面，有啲公司嘅兼職會用現金出糧，或者銀行過數。 中學生兼職影響 透過 Part-time 工作增加收入 Photo by Sharon McCutcheon on Unsplash 相信好多中學生考完 DSE ，都迫不及待想試吓返學生兼職賺錢嘅感覺。賺完錢又可以買自己鍾意嘅嘢。同朋友出街、慶祝或者食飯，都可以唔使用父母嘅錢，體驗吓日後出社會全職工作嘅感覺，相信大家都會體驗到父母日日返工嘅辛勞。 一般學生兼職或臨時工，例如康文署圖書館文員、咖啡店店務員或戲院文員，一個月都有 $3000 - 4000 嘅薪金。不過當然就要視乎你返得多唔多啦！到時就可以用呢筆錢去 Cover 返平時一日三餐嘅錢，或者買吓鐘意嘅嘢，甚至儲起佢都得！ 兼職或暑期工可以培養理財能力 Photo by Michael Longmire on Unsplash 相信大家 DSE 作文都用過「Broaden our horizons」呢個 Phrase，但你又知唔知 DSE 後兼職工作都可以拓闊你對金錢嘅認識？ 無錯！當你辛辛苦苦攞到第一桶金，如果唔好好計劃理財，就只會成為「月光族」：個個月都洗錢洗到一蚊都無剩；而且，當你發現要好辛苦兼職工作幾個鐘，甚至一日，先可以俾得起一餐放題... 相信喺短期兼職或者暑期工裡面，你買嘢或者消費之前都會三思，真係有需要先去買，唔會再做「感性消費者」。 學生兼職能培養待人處事能力 Photo by Headway on Unsplash 作為啱啱考完 DSE 嘅中學生，你可能仲未對交際溝通有足夠認識。但考完 DSE 返學生兼職絕對可以令你嘅待人處事能力更上一層樓！ 無論你返兼職、暑期工定臨時工，你都 Take up 咗一個責任，而你絕對可以從呢份責任入面學到好多！例如做事要有交帶，準時報更，唔好無故唔返工等等。可能你同同事嘅做事方式有啲分別，但都可以學習點樣相處先至會係最合適！ 呢啲寶貴經驗，真係好難從書本課堂上學翻嚟，考完 DSE 嘅你，一定唔好錯過返兼職工作嘅機會啊！ 暑期工陷阱 如果以上嘅好處已經可以令你好想試吓返 Part-time 暑期工，咁你就一定要留意啲暑期工陷阱！ 相信大家都有睇過新聞，都有見過有啲公司會拖糧，甚至欠薪！有啲人知道中學生未返過工，未有任何工作經驗，為咗壓低成本，會特登拖低嗰薪金。有時候仲會好大機會唔小心搵到「伏」工，返工之後唔出糧或者拖糧。 想知第一次搵兼職驚俾人呃點算？記得一路睇到尾，我哋 AfterSchool 會好詳細咁教你點搵工！ 學生兼職有什麼選擇？ 你可能會問，網上面全部嘅工都話請大學生嘅？咁係咪無機會返工喇？當然唔係啦，中學生完 DSE 兼職嘅選擇其實都好多。中學生因為經驗唔多，同時未有主修或者副修，所以會傾向選擇零售服務業或者飲食業嘅工作。 快啲睇睇有咩工種同學仔可以考慮㗎喇！ 兼職店務員 Part time Sales Photo by Hannah Morgan on Unsplash 主要工作：係負責店舖日常運作同銷售，包括 收銀 執貨 處理貨品陳列 留意店舖存貨 定時向經理反映貨存情況 確保貨場陳列整齊同埋擺放嘅貨品整齊美觀 有時要負責店舖整潔同埋顧客服務 例子：Uniqlo Part time，GU 兼職，Sharetea 兼職，Muji Part time 等等。 要求：一般無特別要求。 適合：鍾意同人溝通，參與團隊合作，想試吓提供客戶服務。 做兼職店務員可以畀你訓練自己面對顧客嘅技巧，同埋提高自己嘅溝通能力。 倉務員 / 理貨員 Warehouse Keeper Photo by Nana Smirnova on Unsplash 主要工作：負責收發貨物，包括： 服裝零售倉務 執貨 上架 處理退貨 跟單執貨 將預備出貨嘅貨品整齊排列、分類同埋入箱。 有時需要用手動唧車去搬運貨品， 按照倉務主管嘅安排完成工作。 要求：通常無學歷要求同唔需要有工作經驗。中三程度就可以。 例如：順豐兼職理貨員、Uniqlo 兼職、Ikea part time 等等 適合：有責任心，勤奮，有一個良好嘅工作態度 如果自問辛苦耐勞，又夠力搬貨，就不妨嘗試吓應聘兼職倉務員同兼職理貨員。唔好睇小呢份學生兼職啊！因為你會發現原來執貨要好有系統先得，不知不覺間，自己就會變得更加 Organised 啦！ 侍應 Waiter / Waitress Photo by Nafinia Putra on Unsplash 主要工作：協助餐廳日常運作，例如： 負責店舖樓面運作同清潔 提供優質專業嘅服務俾客人 幫客人點餐落單 提供相應服務 去水吧幫手、傳菜、擺設 例子：快餐店/ 餐廳/ 咖啡店兼職、澳牛兼職 要求：識講流利廣東話，有一般英文同埋普通話能力，識讀寫中文。無特別學歷要求，有啲會要求中五學歷 適合：有禮貌同埋守時，情緒管理，唔怕辛苦 做 Part time waiter 除咗可以鍛煉自己嘅交際同溝通技巧外，仲有機會學到煮食竅門。因為會面對客人嘅要求，所以情緒管理亦都可能係你其中一個得著！ 文員 Clerk Photo by Benjamin Dada on Unsplash 主要工作：一般文書工作，例如： 資料輸入 影印、打印 完成上司分派嘅工作 要求：唔需要高學歷，中學畢業都已經可以。要識得中英文打字，中文通常會希望你會速成或者倉頡為佳。需要識 Microsoft Office 或者 Google 軟件。 適合：想試吓喺 Office 辦公室工作嘅滋味嘅你 坐 Office 冷氣房睇落好簡單，但其實當中嘅苦與樂都係要等你做過先知！如果遇到好嘅上司同事，仲有機會學到佢哋點樣高效率處理文書工作，相信對日後無論係返學定工作，都獲益良多啦！ 唔識打字點算好？而家立即學速成： 【速成教學】6分鐘學會速成輸入法！簡單易學！｜Beginneros 速成輸入法| 教學課程|香港一站式 無障礙資訊平台|無障礙旅遊 補習老師 Tutor teacher Photo by NeONBRAND on Unsplash 除咗以上嘅工種之外，你其實仲可以考慮試吓做補習老師架！ 主要工作：負責教授小學嘅課後輔導班，同埋... 跟進同指導學生做練習溫書 同家長溝通 跟進相關課程嘅查詢 同家長匯報學生嘅學習情況同進度 保持課堂紀律 預備教材 唔想去補習社嘅話，你都可以上網搵吓做1對1補習老師嘅機會。因為網上都有唔少1對1補習老師配對平台。你可以嘗試挑戰 apply 睇吓有無機會幫其他學生補習。 要求：通常中學畢業，某幾科成績較好。 適合：有耐性、有責任感、有愛心 唔識點搵補習學生或者唔知邊度睇兼職招聘資料？睇埋落去你咪知咯！千奇唔好錯過啊！ 香港學生如何尋找兼職或暑期工？ Photo by Eric Rothermel on Unsplash Part Time 招聘網站 唔少人都會用以下幾個比較可靠嘅學生兼職招聘網站，有興趣嘅你可以試試用佢地嚟搵短期學生兼職、臨時工或者暑期工。你都可以使用其他網站去搵工。只需要搵「兼職招聘」或者「暑期工招聘」就會出現好多選擇，例如： 兼職工作| Part Time Jobs - 兼職網 MOOVUP好工速遞 補習行業一啲特別嘅搵工渠道： 私人補習、上門補習導師推介- HKTUTOR.HK 補習個案｜1分鐘為你配對全港過萬好評補習老師｜Tutor Circle HKTA香港導師會，免費補習配對 - HKTA香港人的補習配對平台 Facebook 群組 如果唔想俾人收中介費、或者想快啲搵一啲炒散、Part time或者臨時工，Facebook 群組都係一個選擇，因為當中會有唔同公司定期發送兼職招聘嘅 Posts，例如： 搵工，招聘、求職、請人、兼職、全職| Facebook 香港搵工、全職兼職幫手| Facebook 香港兼職 散工SLASH群組(招聘 求職 請人 搵工 ... - Facebook 招聘 Apps 如果你都係覺得網上搵工嘅過程好繁複同漫長，你可以嘗試吓用兼職招聘 Apps，通常細公司會將短期工作、長期 Part time 甚至炒散嘅招聘資料放上去，仲會提供申請服務。例如： 炒散王(Appstore) (Google Play) Moovup (Appstore) (Google Play) 香港中學生兼職有什麼需要注意？ 清楚中學生兼職的工作安排 喺出糧安排上，考完 DSE 嘅學生一定要留意出糧嘅方式同時間，例如想返兼職工作嘅要清楚公司出糧係用月薪、日薪定係時薪計算，同埋確認出糧嘅時間。有啲短期兼職，或者臨時工，都會用日薪、現金出糧。份份兼職出糧方式都唔同嫁，所以一定要問清楚！ 喺工作時間上，記得要同公司 Confirm 工作職責同工時，保障自己嘅利益，仲可以睇睇自己可唔可以 Handle 到工作範圍，又或者工作係咪自己想做嘅。確認好曬啲資料同責任之後，先至好返兼職暑期工啊！ 了解提供兼職或暑期工職位的公司 Photo by Domenico Loia on Unsplash 唔知大家會唔會擔心招聘兼職嘅公司造假，又或者係「黑店」？其實，喺互聯網嘅幫助下，只要做得多資料搜集，就可以避免中伏~ 以下有幾個建議俾你哋參考： 盡量搵「聽過呢個名」嘅公司。因為出名嘅公司至少都有返相應規模同埋清晰嘅程序，喺見工同埋請你果陣都會同你簽約，有多啲保障~ 上網睇吓係咪真係有呢間公司先，然後再決定係咪真係應聘或者面試。 同可信嘅人講，有咩問題出事都有人幫手，或者可以陪你一齊見工添！ 面試服飾和準備 Photo by M. Braueron Unsplash 喺服飾上，一般嘅兼職，例如兼職店務員、倉務員等等，都無需要著 Formal Dressing，最多都係著 Smart Causal 就可以。但如果想見兼職文員，可能就要著得 Formal 啲，不過都要視乎公司嘅服務同背景！如果唔太肯定，記得要 Email 或者打電話問清楚啊！ 喺面試準備上，一般公司面試官都會有幾個問題想問： 請你用1分鐘 / 2分鐘自我介紹（通常以廣東話自我介紹，但如果想有充足準備，或者係 in 兼職店務員嘅話，不妨準備埋英文同埋普通話；可以簡單介紹自己，點樣稱呼你，同埋點解你會想做呢份工/入呢間公司） 知唔知呢份工嘅工作範圍？（公司想睇吓你係咪真係知道自己嘅責任，以免入職之後發現工作性質同期望嘅唔同。 你覺得自己點解會勝任呢份工作？（公司想睇吓你有咩優點/性格特質符合呢份工嘅要求） 知唔知最近公司有無搞咩活動/最新產品？（公司想知道你有無事先做定功課，知道公司嘅服務產品。） 大家記得一定要準備好先去面試，唔係嘅話就返唔到自己想返嘅學生兼職嫁喇！ P.D. 希望大家都可以搵到自己鍾意嘅工，過一個充實嘅假期！
