人哋話性格決定命運，其實都決定出路㗎！對前路迷惘嘅你，有幾了解自己呢？近年大熱嘅 MBTI 測試，搵到你所屬嘅 16 型人格，仲畀到同你人格相符嘅職業導向參考！快啲一齊同 AfterSchool 睇下你嘅 MBTI 人格，有咩合適嘅工作領域啦！ MBTI 咩嚟㗎？ MBTI 係一個性格分類測試，全名為邁爾斯-布里格斯性格分類法 (Myers-Briggs Type Indicator)，由美國嘅 Katharine Cook Briggs 同佢個女 Isabel Briggs Myers 最先研究。現時主要應用於職業諮詢、團隊建議、戀愛關係、教育學習等。 MBTI 測試有 4 個維度，各維度有 2 個方向，共 8 個方向。 credit: Ouch! (Illustration by Icons 8) 1. 能量來源：外向 Extraversion (E) vs 內向 Introversion (I) 外向型（E）偏向從外界或人群中獲得能量 內向型（I）偏向從自身或獨處中獲得能量 2. 認識世界：感覺 Sensing (S) vs 直覺 Intuition (N) 感覺型（S）著眼當前，透過五感認識世界，鍾意實際嘅嘢 直覺型（N）著眼未來，睇重可能性同預感，鍾意抽象嘅嘢 3. 判斷事情：思考 Thinking (T) vs 情感 Feeling (F) 思考型（T）比較重視事情嘅邏輯，用因果關係思考，較理性 情感型（F）比較重視人嘅感受，注重和諧氛圍，較感性 4. 生活態度：判斷 Judging (J) vs 感知 Perceiving (P) 判斷型（J）做事傾向結構化，鍾意有計劃，有明確嘅目標 感知型（P）做事傾向彈性化，鍾意自然發生，保持開放選擇 MBTI 性格分類 以上列出嘅每個維度各方向，4 個英文字母為一個組合，衍生出 16 型人格。 16 型人格分為 4 個類別，包括： 分析家 / 概念主義者（NT）INTJ、INTP、ENTJ、ENTP credit: 16personalities.com 外交家 / 理想主義者（NF）INFJ、INFP、ENFJ、ENFP credit: 16personalities.com 守護者 / 傳統主義者（SJ）ISTJ、ISFJ、ESTJ、ESFJ credit: 16personalities.com 探險家 / 經驗主義者（SP）ISTP、ISFP、ESTP、ESFP credit: 16personalities.com ㅤ 邊度有得做 MBTI 人格測試？ credit: unsplash @Edi Libedinsky 坊間有好多地方有得做 MBTI test，免費、收費都有。而喺網上，免費人格測試五花八門，版本多到唔知做邊個先至準。想認真做性格測試嘅話，當然要做有權威性啲！ 以下 2 個係小編覺得唔錯嘅 MBTI test 網站，以免費嚟講，分析結果都算幾詳細㗎，有性格優缺點、愛情分析、朋友家人關係、職業建議等。大家不妨去測試下～ 16 Personalities (英文、簡體中文) (小編推介 :D) APESK 才儲 (簡體中文) 注意：受時間、環境、經歷所影響，你測出嘅人格有時可能會唔同！正常嘅！ 「簡易版」16 型人格測驗 另外，網上亦有流傳一個「簡易版」嘅 MBTI 16 型人格測驗，用 4 條問題測出你嘅人格。如果你未有時間做啱啱上面提及嘅 test，可以做住下面呢個「簡易版」先！(最好做詳細版！答得越多問題，結果越準㗎！) * 兩個選擇你都符合嘅話，揀你更傾向嗰個就OK 1. 你傾向鍾意？ （I）獨處 （E）同其他人相處 2. 學習新事物嗰陣，你更鍾意？ （N）了解概念同理論 （S）注重實際用途 3. 做決定嗰陣，你更重視？ （T）邏輯同公平 （F）感情同和睦 4. 你嘅生活方式傾向係？ （J）先做嘢，再玩樂。做事著重結果（P）先玩樂，再做嘢。做事享受過程 順序得出嘅 4 個英文字母，就係你所屬嘅人格。 接落嚟，等我哋一齊睇下你嘅人格到底有咩特質，同埋適合咩職業啦～ MBTI 十六型人格特質、職業參考 介紹咗咁耐，大家應該對 MBTI 有哂基本認識，而家終於講到戲肉啦！ 究竟呢 16 型人格分別有啲咩性格特質？又分別啱做啲咩行業呢？ 分析家 / 概念主義者（NT） credit: 16personalities.com NT 型人獨立、理性、堅持不懈，天生有好奇心，有洞察力，熱衷於研究知識學問。鍾意內省，邏輯思維強，善於客觀分析，成日反覆諗「點樣解決問題先至最好」，而觀點就偏向抽象、多理論。佢哋有獨創性同創造力，多數有明確嘅目標，做事唔容易受其他人干擾，亦會確保自己嘅言行作為都係有意義嘅。技術性、理論性強嘅工種會啱 NT 型嘅人，例如科學、電腦、法律、金融、工程等。 INTJ 建築師 INTJ 冷靜、謹慎、固執，獨立自主，有毅力，做事專心。佢哋重視概念，會客觀分析事物，善於思考，學習能力強，總係會抱住懷疑嘅態度，探索唔同事情「可能會點」、「應該要點」，再不斷作出改進。 由於 INTJ 太認真、講求邏輯，變相唔係好識得講笑。佢哋好少受到情緒影響，會本能地將各種感情化做邏輯思考，有時唔太善於表達情感。 INTJ 好有責任感，對工作要求高，會將理念付諸實行，有相當唔錯嘅領導力，但傾向做獨行俠。佢哋亦非常善於計劃，凡事會有幾手準備，有 plan A 揸喺手仲會有埋 plan B、C、D。策劃類、創造型嘅職業幾啱佢哋，簡單重複嘅工作反而會令佢哋失去耐性。 適合嘅職業／工作類型：金融投資界、研究 (學術、科技等)、建築師、作家、技術專家、管理顧問、數據分析員、財務策劃師、程式編寫員 (programmer)、程式分析員、網絡開發人員 INTP 邏輯學家 INTP 理性、衝動、淡然、隨和，不拘小節，自帶一種看破紅塵嘅 feel，少宅，少冷漠。 INTP 邏輯思維強，有無窮嘅想像力，渴望追求知識。佢哋容易被抽象嘅概念所吸引，諗好多深奧嘅嘢，經常冒出新嘅 idea，但不善以言語表達，用文字表達反而會清楚啲。佢哋鍾意安靜思考，唔鍾意辯論，但高邏輯嘅佢哋，有一種糾正其他人說話漏洞嘅習慣。INTP 比較享受獨處，唔擅長同大群人社交。 投入任何工作之前，INTP 多數會做足準備。佢哋思維清晰，善於分析、解決事情，能夠綜合龐大而複雜嘅資訊，獨自做嘢效率更高。佢哋有好奇心，唔鍾意公式化嘅工作模式，容易對思想狹隘嘅人冇耐性，啱做具有挑戰性、創造性嘅工作。 適合嘅職業／工作類型：建築師、測量師、工程師、律師、學者 (數學、化學、物理、歷史、地理、經濟等)、醫生、法醫、藥劑師、金融投資顧問、風險管理、數據分析員、財務策劃師、技術專家、網絡開發人員 ENTJ 指揮官 ENTJ 率真、熱情、客觀公正、急躁，有高決策力，係天生嘅領導者，強勢得嚟有啲傲慢。 ENTJ 有自信，善於表達，有時會強於表達己見，幾識得說服其他人服從自己。佢哋鍾意抽象思維，享受有內涵嘅談話，對住公眾演講對佢哋從來冇難度。 ENTJ 做事積極、認真、有效率，善於處理複雜嘅事務。佢哋擅長掌握全局，有遠見，好叻做 long-term 計劃或者訂立目標，鍾意發號施令，指揮人哋去做咩，幫助其他人指明方向。為咗想所有嘢跟住佢哋嘅決策而行，佢哋有時會忽略他人嘅感受。ENTJ 高高在上嘅姿態，加上講嘢直接，容易無意間傷害到人哋，令人產生距離感。 適合嘅職業／工作類型：會計、Audit、建築師、工程師、測量師、律師、學者 (數學、經濟等)、經理、顧問、地產業、銷售員、風險管理、數據分析員、財務策劃師、技術專家 ENTP 辯論家 ENTP 性格多變，樂觀、幽默、好勝、有創意、好多計仔。佢哋好享受思維碰撞嘅過程，所以相當鍾意同人辯論，或者玩智力遊戲嗰啲。有時佢哋會思如泉湧，不斷冒出唔同嘅諗法，仲能夠提出令人意想不到嘅點子。ENTP 靈活變通，適應力幾唔錯，好適合具創造性嘅工作，重複又死板嘅工作就唔係太啱佢哋啦。 ENTP 敢於冒險，好奇心重，鍾意學習新嘢同問「點解」，有時小事都會刨根問底。佢哋亦有多元化嘅興趣愛好，咩都鐘意玩下掂下，可以同時玩幾樣嘢而唔覺得攰，不過就容易轉移興趣。 雖然 ENTP 有爆多嘅想法，但唔好嘅就係，佢哋好多時都淨係得個諗字，缺乏執行力，有時仲會過份自信添。 適合嘅職業／工作類型：記者、廣告業、創意指導、演員、主持、影視製作、Marketing、人力資源、地產業、銷售員、風險管理、企業家、創業家 外交家 / 理想主義者（NF） credit: 16personalities.com NF 型人仁慈和善，有同情心，洞察力強，討厭衝突，希望所有人和平相處，亦想人哋鍾意自己。 佢哋以直覺為先，精神上有好強嘅哲理性，鍾意思考抽象嘢，習慣自我反省，成日空想「活着嘅意義」、「點樣令人生更有意義」之類嘅問題。NF 型人富創造力，能言善辯，有感染力，甚至可以影響到其他人嘅價值觀。通常有完美主義，一旦產生矛盾，就會陷入自我懷疑。多數 NF 型人對文學、藝術、音樂、教育、宗教有興趣。 INFJ 提倡者 INFJ 獨立、忠誠、正直、有耐性。佢哋沉靜，有時估唔到佢哋諗咩，有啲神秘。INFJ 善於理解複雜嘅概念，有豐富想像力，鍾意思考，同文字幾啱key。INFJ 直覺好準，具洞察力，對情緒敏感，清楚人哋嘅需要，適合做諮詢類工作。 INFJ 充滿同情心，注重人際關係，有時為咗關心人哋而忘記咗自己。佢哋喺衝突面前容易變軟弱，唔開心好少講出口，會透過自我反省消化情緒。 INFJ 常抱懷疑嘅態度，成日堅守原則，唔易被動搖，有時太理想化。佢哋堅決果斷，有良好組織能力。INFJ 喜好和諧公平，有一顆博愛嘅心，希望工作中每個人嘅貢獻都被看見，並得到成就感。 適合嘅職業／工作類型：編輯、作家、音樂家、設計師 (室內設計、圖像設計等)、藝術指導、學者 (社會科學、心理學等)、老師、諮詢師、輔導員、營養師、健康顧問、人力資源 INFP 調停者 INFP 靦腆、安靜、敏感、誠懇、自卑，理想化。有強烈嘅完美主義，高要求，容易對現實失望，總覺得自己不足，陷入矛盾之中。INFP 好敏感，對情感、人際關係，甚至瑕疵都係。INFP 有豐富嘅想像力，超愛幻想，咩都鐘意問，諗嘢不切實際，有時可以打破常規思想。 INFP 非常重視自己內在嘅和諧，令佢哋有陣時對外在環境唔太在意。佢哋善於觀察，直覺準，洞悉力強，容易體察人哋嘅情緒，擅長傾聽同埋安慰他人。除非價值觀受侵犯，INFP 通常會避免衝突，會聽取唔同嘅意見，但冇興趣支配人哋。 INFP 做嘢靈活有彈性，但有時唔識分次序。適應力強，承受力高，一個人做事都OK。 適合嘅職業／工作類型：編輯、作家、翻譯員、設計師 (時裝設計、圖像設計等)、藝術指導、攝影師、學者 (社會科學、心理學等)、幼教老師、社工、諮詢師、輔導員、人力資源 ENFJ 主人公 ENFJ 自信、開朗、熱情、坦誠、富正義感，鍾意講嘢，天生有種感染力。ENFJ 重視使命同埋價值觀，傾向想搵問題嘅「正確答案」。成日理想化其他人，會想人哋變得更好，有時過度理想化人際關係，容易自我犧牲。 ENFJ 鍾意幫人，鍾意講大道理，同人分享自己知道嘅所有嘢。佢哋對他人嘅行動、反應方面敏感，擅長激勵人哋。ENFJ 自信幽默，識得説服人，會向人提出有價值嘅意見，不過人哋唔採納嘅話，佢哋會唔開心。 ENFJ 重視和諧，亦擅長創造和諧。佢哋積極進取，有幾好嘅合作意識，有凝聚力，受到別人信賴。 適合嘅職業／工作類型：記者、編輯、社福界、輔導員、社工、老師、學者 (人文學科)、人力資源、Marketing、客戶服務、銷售員、演員、廣告業、導演 ENFP 競選者 ENFP 充滿熱情、有活力、浪漫、率性，享受即興。佢哋有好多興趣，著迷有趣嘅事物，鍾意同人哋分享古怪精怪嘅嘢。ENFP 自由灑脫，轉身離開對佢哋並唔困難，成日嚮往遠方嘅自由。佢哋富想像力，有好奇心，敢於嘗試。有浪漫嘅特質，覺得呢個世界充滿神奇嘅意義，鍾意一一探索、領略同欣賞各種意義。 ENFP 善於結識朋友，會不自覺感染到周邊嘅人，同時渴望得到人哋嘅認同。享受交際亦需要獨處。佢哋好情緒化，做嘢睇心情。ENFP 成日忽視規劃，依賴臨場發揮。佢哋不善權衡任務嘅輕重，組織力較差。愉快嘅工作環境對 ENFP 好重要，好大壓力嘅話佢哋會想逃避。 適合嘅職業／工作類型：編輯、作家、記者、演藝界、設計師 (時裝設計、圖像設計等)、藝術指導、攝影師、學者 (社會科學、心理學等)、社工、人力資源、空中服務員 守護者 / 傳統主義者（SJ） credit: 16personalities.com SJ 型人忠誠可靠，循規蹈矩，小心謹慎，有好強嘅責任感、事業心，多數能按時做完工作。呢類人重視禮儀、規則同服從，尊重權威，價值觀保守。有時幾固執，總想做所有事都跟住內心認定嘅準則進行。做事追求公正，獎罰分明。SJ 型人實事求是，好少衝動行事，所以較少做冒險嘅嘢，採取行動確保安全、有全面嘅檢查係基本。正因為做事嚴謹，SJ 型人係值得信賴嘅人選，政府部門同軍事部門會幾啱佢哋。 ISTJ 物流師 ISTJ 理性、安靜、獨立、果斷、固執，做事一絲不苟。佢哋勤力可靠，有責任感，願意承擔，做嘢快手，鍾意事先做好計劃，總係有能力策劃並按序完成好工作。佢哋比較傳統保守，凡事按部就班，有時會俾人感覺死板、挑剔。 ISTJ 有主見，唔輕易受人影響，唔善於解讀情感，唔太鍾意講嘢。佢哋講求邏輯，鍾意清晰、確實嘅事物，天生對數字特別敏感。 ISTJ 多數好樸素、慳家，買嘢講求性價比，好少追求潮流，唔鍾意創新，偏愛舊物。佢哋唔鍾意冒險，唔怕悶，傾向揀返以前做過嘅嘢嚟做，鍾意安全、有把握嘅感覺，好適合高重複性嘅工作。 適合嘅職業／工作類型：會計、Audit、金融證券業、工程師、技術員、律師、採購部、地產業、業務管理部、數據分析員、財務策劃師、統計員、公務員、警官 ISFJ 守衛者 ISFJ 安靜、友善、嚴謹、敏感、忠誠，富同情心，樂於助人。無論係男定女，ISFJ 都會令人覺得佢哋體貼懂事。 ISFJ 細心，注意細節，要求每件事清晰明確。佢哋亦好守規矩，但有時太保守，唔願意試新事物，或者作出改變。鍾意自己靜靜地工作，做事盡責，令人信任。佢哋偏好做幕後功臣，默默耕耘咁付出。佢哋好有忍耐力，捱得苦，會投入並堅持完成份內事，人哋有咩需要唔介意幫手。 ISFJ 對他人嘅感受好敏感，不過自己間唔時會過度悲觀，變得愁眉苦臉，成日呻苦。佢哋好享受去幫人達成目標或願望，所以擅長從事協助型、照顧型工作。 適合嘅職業／工作類型：社福界 (e.g. 社工)、醫護 (e.g. 護士)、老師、人力資源、客户服務、技術支援、財務策劃師、保險經紀、空中服務員、獸醫 ESTJ 總經理 ESTJ 務實、客觀、理智、勤力，有責任感，守信用。佢哋行事決斷，追求效率，可以喺好短時間內作決定或完成任務。ESTJ 思想傳統，非常重視規矩，認為「紀律就係紀律」，所有規則都應該被嚴格遵守，係個幾強勢嘅人格。佢哋固執、講求權威，希望所有嘢都喺自己控制之內，甚少聽取人哋嘅意見。 ESTJ 比較現實，唔鍾意抽象嘅理論，鍾意學習即刻用得返嘅 skills。佢哋鍾意有條理，可以記住好多細節位。ESTJ 講嘢好直接，同時客觀、唔會感情用事，但容易忽略人哋嘅感受，有時會令人有壓力。ESTJ 有領導才能，好適合做管理有關嘅工作。 適合嘅職業／工作類型：管理層、業務顧問、項目經理、保險經紀、Audit、政府部門、軍事部門、工程師、藥劑師 ESFJ 執政官 ESFJ 友好、熱情真摯、和靄可親，鍾意講嘢，通常幾受歡迎。佢哋交遊廣闊，重視人際關係，愛好和諧，總能夠好快同其他人打成一片，擅長做聚會搞手。ESFJ 細心，注意細節，容易知道他人想要咩，並滿足佢哋嘅需要，有時甚至會顧住理人哋，而唔記得咗自己嘅需要。 ESFJ 份人現實，凡事講求實際，目標明確，安排井然有序。有強烈嘅責任感，工作投入並且高效率。不過就有啲傳統，會唔願意作出改變。佢哋鍾意同他人共事，善於引導，發現人哋嘅才能。同 ESTJ 一樣，ESFJ 適合從事管理工作，不過佢哋更加有親和力。 適合嘅職業／工作類型：零售業、人力資源、Marketing、銷售員 、客戶服務、地產業、活動籌委、治療師、護士、社工、輔導員、幼教老師、獸醫 探險家 / 經驗主義者（SP） credit: 16personalities.com SP 型人擁有冒險精神，咩都想試，鍾意尋找刺激嘅事物。只要嗰樣嘢有趣，佢哋一定唔會放過機會去了解。呢類人觀察力強，適應能力強，到任何新環境都能應對自如。佢哋份人比較實際，好少講理論知識，行動上傾向符合經濟實惠。SP 型人愛好自由，唔鍾意被規則束縛住。相比急忙嘅生活節奏，佢哋鍾意優哉游哉，與世無爭，慢慢享受當下。SP 型人多數有 art sense，對顏色、結構、線條敏感，鍾意藝術、表演、體育等。 ISTP 鑑賞家 ISTP 冷靜、理性、有保留、務實，少少孤僻，不過充滿好奇心，係天生嘅製作者。善於觀察同分析，並透過創造、解難、反覆嘗試等自身經驗，探索新事物以及當中嘅邏輯原理，所以好識得為問題搵解決辦法，亦鍾意幫人同分享自己嘅經驗。 ISTP 係典型嘅行動派，享受自己動手去做，對事物「如何運作」感興趣，喺數字、機械方面具有天賦。 ISTP 做事注重結果，係會想即刻睇到成果嗰種人。佢哋傾向活在當下，重視現實同實用性；同時好需要大量嘅自主權，唔鍾意被外界束縛，唔適合高紀律性嘅環境，反而技術程序方面嘅工啱佢哋多啲。 適合嘅職業／工作類型：工程師、機械師、測量師、建築師、數據分析員、財務策劃師、程式編寫員 (programmer)、程式分析員、系統分析師、商業設計師、地產經紀、企業家、木工師傅、電工師傅 ISFP 探險家 ISFP 和善、害羞、安靜、謙虛、敏感，平易近人。佢哋有主見，但如非必要都唔會同人爭論，好少對其他人強加己見，係典型和平主義者。 ISFP 甚少做領導者，多數傾向做協調者。佢哋為人低調，無咩慾望去影響身邊嘅人，只想做好自己本份，有時會缺自信。佢哋做事唔會衝動，大多安於現狀，唔會因過於急切而破壞現況，重視過程多過成果。 ISFP 渴求自由，唔鍾意被束縛，享受私隱空間，鍾意跟住自訂日程辦事。用「慵懶」形容ISFP 就最合適不過，佢哋追求舒適嘅生活，事事都要求和諧、舒服同有美感，對細節好講究，有一定嘅藝術天賦。 適合嘅職業／工作類型：藝術家、音樂家、作曲家、設計師 (時裝設計、珠寶設計、室內設計、動畫設計等)、建築師、園景師、化妝師、護士、幼教老師、社工、輔導員、獸醫 ESTP 企業家 ESTP 好動、活躍、率直、現實、活在當下，識得審時度勢。佢哋份人務實，適應力強，通常高效率，重視過程，有促成事情嘅能力。佢哋有好強嘅應變能力，適合改變迅速嘅工作環境。 ESTP 係一個問題解決者，好叻為現場實時提出問題嘅解決方法。有時會不擇手段，無視眼前或未來嘅困難，諗盡辦法，用最有利自己嘅方式完成當前嘅任務。佢哋鍾意一針見血，唔鍾意複雜嘅概念、冗長嘅理論解釋。 ESTP 口才了得，知道對咩人講咩話，好識將說話包裝到好好聽，係人聽到都會開心舒服，容易得到他人嘅喜愛。佢哋善於交際，去到邊都識到朋友。 適合嘅職業／工作類型：記者、體育、Marketing、服務業、銷售員、保險經紀、旅遊代理、貿易、金融證券業、企業家、自由工作者 ESFP表演家 ESFP 友善、隨和、包容力大，充滿熱情同活力，好鍾意玩。ESFP 擅長建立人際關係，鍾意識朋友，有廣闊嘅社交圈子。佢哋天生有種幽默感，令佢哋可以成為群體入面嘅「開心果」，或者係全場焦點，出奇地人見人愛。 ESFP 適應力強，能夠有彈性地適應唔同嘅人同環境。ESFP 具創造力，相比自己一個做嘢，佢哋傾向鍾意與人共事。 ESFP 非常隨性 (尤其物質上)，會洗錢如流水，時間管理仲有啲差添。佢哋熱愛生命，享受周圍找尋樂趣，咩都試，唔會俾自己有悶嘅空間。所以，重複而枯燥嘅工作唔啱佢哋，有多樣性嘅會吸引佢哋多啲。 適合嘅職業／工作類型：幼教老師、社工、護士、零售業、人力資源、活動籌委、設計師 (時裝設計、珠寶設計、室內設計等)、園景師、表演者、攝影師、導遊、空中服務員 MBTI 人格測試嘅可信度？ credit: unsplash @Dipqi Ghozali 話就話 16 型人格測驗做嘅題目越多，出到嚟嘅人格結果就會越準，但標準嘅 MBTI test 唔單止係答幾廿條問題咁簡單，專業嘅 MBTI 測試係需要做埋面談㗎！MBTI 專家會透過觀察測試者嘅言談、狀態、反應等等去判斷佢嘅人格，而標準 16 型人格測驗得出嘅結果，可信度當然會比齋做問卷高好多！ 雖然 MBTI 測試嘅可信度一直受到外界質疑，部分原因係測試採用「二分法」作答，要求測試者二選其一，但係而家唔少 MBTI 16 型人格測驗網站喺設計作答選項嘅時候，已經分咗 scales (例：極度認同、認同、中立、不認同、極度不認同)，所以改良咗嘅 MBTI 人格測試，可以話係更加可信㗎啦！ 每個測驗都有佢嘅缺點，無可能 100% 準確。人嘅性格本來就有好多灰色地帶，更加唔好話用二分法去區分。喺 MBTI test 嘅 4 個維度入面，任何人都冇可能只係單一屬於某個 trait。比如你可以同時係內向 + 外向嘅人，而測試人格出到嚟，你係被歸類為內向，定係外向，關鍵就係在於你喺邊一面嘅比例高啲！ credit: unsplash @Дмитрий Хрусталев-Григорьев Anyway, MBTI 都只不過係用嚟分析性格嘅測試，從而幫你更深入了解自己。的確，每種人格都有佢相對合適嘅職業路向，但並唔代表適合所有人！ 上面提到嘅，不妨可以當作未來出路嘅參考～ 希望你睇完會對「大個做咩」冇咁迷惘，早日搵到啱自己嘅方向啦！小編祝大家順利啊～
