【物理治療】如何成為物理治療師?各大專院校物理治療課程一覽

AfterSchool
AfterSchool 2021-11-25 211
物理治療作為神科之一,同學仔究竟有幾了解Physiotherapy呢科?Afterschool為大家整理好各大院校嘅物理治療師課程、物理治療出路、物理治療師嘅人工!
物理治療師目前喺市場上都仲係供不應求,而且收入可觀,因此物理治療學 (Physiotherapy)呢一科一向係唔少同學心目中嘅「神科」,但大家又知唔知原來除咗 Polyu 同東華之外,原來仲有其他大專院校都有提供物理治療課程。
Afterschool 就同大家一齊睇下究竟點樣先可以成為物理治療師,同埋應該點樣揀啱你嘅院校啦!
    

如何入行成為物理治療師?

Credit: unsplash @ryansnaadt
Credit: unsplash @ryansnaadt
想喺香港成為一個專業嘅物理治療師,就必須要完成指定嘅物理治療學士學位課程 (Bachelor of Physiotherapy),然後再喺香港物理治療師管理委員會註冊,先可以執業。
但係呢啲本地指定嘅學士課程學額有限,加上收分高,有唔少有興趣入行嘅同學仔都可以選擇到海外升學,修讀獲認可嘅 physios 學位課程,佢哋嘅入學要求普遍都比香港嘅低。一般而言,只要海外畢業生完成相關嘅臨床實習,成功喺當地註冊,返嚟香港之後再遞交返所有海外專業學歷相關工作經驗證明,經審查之後就可以返香港執業㗎喇。
 

物理治療係讀啲咩?

Credit: unsplash @thisisengineering
Credit: unsplash @thisisengineering
Physios 雖然同職業治療、言語治療一樣,都係建基於醫學嘅非藥物治療方法,但係佢係利用人對物理刺激所作出嘅生理反應嚟達到治療嘅目的,例如係透過電、水力、冷凍、熱能、光波、磁力、運動等等嘅各種媒介,再去配合應用生理、心理、病理和解剖科學,去治療患者,為佢哋止痛,同時幫助佢哋恢復身體嘅活動能力,改善同加強佢哋嘅日常生活或者工作能力。由初生嬰兒到長者嘅各個社會階層人士,都可以係物理治療師嘅服務對象,以照顧社會不同嘅需要。
 

香港各大專院校獲認可之物理治療課程

Credit: unsplash @priscilladupreez
Credit: unsplash @priscilladupreez

Polyu Physiotherapy (JS3636)

Poly  嘅 物理治療學(榮譽)理學士課程 (JS3636),係全港唯一一個獲教資會資助嘅學士學位課程。 2021 年有 299 個報名 JUPAS 嘅申請者將 Polyu pt 擺喺 Band A 頭 3 志願,但學額只係得 150 人,平均約 5.99 人爭一個學額。
佢嘅收生門檻比較高,會睇考生嘅 BEST 6,入學嘅平均分係 39.6 分,中、英文、組合科學(生物及物理)、Bio 或者 Phy 會係佔最高比重嘅科目,如果具備良好嘅中、英文溝通能力仲會獲優先考慮。申請嘅同學同時亦要符合 Physios 培訓的體格要求。
 

公開大學 物理治療 (JSSU55)

都會大學(公開大學)嘅 物理治療學課程 (JSSU55),屬於 SSSDP 資助計劃,學費較貴,首年學費係 $165,050,四年嘅總學費係 $660,200,獲資助嘅話學費會減免為 $88,010 一年,成個課程都要交 $352,040 學費。
雖然學費唔平,但係喺 2021 年,Band A 嘅報讀人數總共有 242 人,而首年嘅學額只得 40 個,每個學額嘅競爭人數係 6.1 人,比起 Poly pt 更為激烈。中、英文、組合科學(生物、物理)、Bio 同 Phy 呢幾科喺計分時都會佔較高嘅比重。
Credit: unsplash @anniespratt
Credit: unsplash @anniespratt
 

東華 物理治療 (JSST05)

除咗公立大學以外,香港都有其他專上學院可以修讀物理治療學課程,例如東華學院嘅 物理治療學(榮譽)理學士 (JSST05)首年學費比起 MU 平少少,係 $157,120。佢同樣屬於 SSDP 資助計劃,學費扣除資助之後每年要俾 $80,080。
2020年東華物理治療新生入學取錄嘅平均分係 4C+1X 24分。2021 年截至 5 月 31 號,JUPAS 嘅 Band A 報讀人數係 417 人,而首年學額只有 50 個,即係平均 8.3 人爭一個學位。Physics、Biology、組合科學(含生物/物理)達 Level 3,或者英文達 Level 4 嘅同學仔,會獲得優先考慮。佢嘅收生分數都唔算好低,舊年 BEST 5 嘅平均分都有 19 - 22
 

明愛 物理治療 (JSSA03)

明愛專上學院亦有開辦​ 物理治療學士課程​ (JSSA03),佢嘅學額只有 50 個,但係 2021 年有 251 個 JUPAS 申請人都將呢一個課程擺喺 Band A,即係平均 36.4 人爭一個學額,係競爭最激烈嘅 physios 學士學位課程。想完成呢個課程,同學需要進行 6 次、共 1,050 小時嘅臨床實習。
明愛嘅物理治療課程亦喺除咗 Polyu pt 以外學費最平嘅課程,同學每年要交 $154,350 學費,由於佢屬於「指定專業/界別課程資助計劃」,扣除咗資助金額之後,合資格嘅學生每年只係需要交 $77,550。如果同學仔 BEST 5 考獲 22 分或以上首年學費仲會獲得全數豁免
Credit: unsplash @neonbrand
Credit: unsplash @neonbrand
 

Poly Master of Physiotherapy

Poly 喺 2021-2023 年會每年開辦 Master of Physiotherapy 課程,修讀嘅學生需要完成 2 年嘅全日制課程,總共分為 6 個學期,當中包括 2 個 summer semesters,加埋要喺醫院同埋社福機構完成至少 1,000 小時嘅實習,畢業後就可以成功獲得註冊物理治療師嘅資格,比起 4 年嘅學士課程更快。
報名人必須持有學士學位,並且已經完成人體生理學 (Human Physiology) 及人體解剖學 (Human Anatomy) 各 3 個 credits,曾修讀心理學、營養學、人體運動學等醫護相關課程嘅報名者會獲優先考慮。
Physios 碩士課程嘅學額只有 48 個,每個獲取錄嘅學生都需要交共 64 萬學費,但如果入學之前同非政府社福機構成功簽訂畢業後為其連續服務 3 年嘅承諾書,就可以獲得成個課程嘅全額學費資助
 

物理治療師前景

Credit: pexels @canvastudio
Credit: pexels @canvastudio
本港嘅人口老化問題持續,對醫療系統嘅需求亦不斷上升,但係醫療人手長期短缺,物理治療師嘅就業市場持續有空缺。根據《醫護人力規劃和專業發展策略檢討報告》推算,到 2030 年香港嘅物理治療師會有 933 個空缺,所以讀 physios 嘅同學仔絕對唔需要擔心出到嚟搵唔到工,近十年嘅物理治療課程畢業生就業率達至百分百
同學仔可以因應個人興趣同埋有意服務嘅對象,選擇喺不同性質嘅機構工作,例如公營或私營健康組織、醫院、康復中心、體育學院、健身中心、長者院舍、社區活動中心等等,或者私人執業。
 

物理治療師人工

Credit: unsplash @towfiqu999999
Credit: unsplash @towfiqu999999
讀物理治療課程同學仔啱啱修畢業出嚟,已經可以入職二級物理治療師,起薪點係 14 級,即係每月 HK$30,235,頂薪點更可以高達港幣每月 HK$48,860,同其他學系嘅畢業生相比,收入已經係非常可觀
 二零二一年四月一日之薪級表
 起薪點(MPS)/ 薪酬(HKD)頂薪點(MPS)/ 薪酬(HKD)
物理治療總主任40/ $93,71044/ $110,170
高級物理治療師34/ $74,51539/ $89,845
一級物理治療師25/ $51,09533A/ $74,515
二級物理治療師14/ $30,23524/ $48,860

物理治療 Physiotherapy Q&A

物理治療係讀啲咩?
物理治療係建基於醫學嘅非藥物治療方法,利用人對物理刺激所作出嘅生理反應嚟達到治療嘅目的,例如係透過電、水力、冷凍、熱能、光波、磁力、運動等等嘅各種媒介,再去配合應用生理、心理、病理和解剖科學,去治療患者,為佢哋止痛,同時幫助佢哋恢復身體嘅活動能力,改善同加強佢哋嘅日常生活或者工作能力。
點樣可以入行做物理治療師?
想喺香港成為一個專業嘅物理治療師,就必須要完成指定嘅物理治療學士學位課程(Bachelor of Physiotherapy),然後再喺香港物理治療師管理委員會註冊,先可以執業。亦有唔少有興趣入行嘅同學仔會選擇到海外升學。一般而言,只要海外畢業生完成相關嘅臨床實習,成功喺當地註冊,返嚟香港之後再遞交返所有海外專業學歷及相關工作經驗證明,經審查之後就可以返香港執業㗎啦。
香港有啲咩獲認可嘅物理治療課程可以讀?
香港目前只有一個獲教資會資助嘅 physios 學士學位課程,就係 Polyu Physiotherapy (JS3636),佢嘅收生門檻比較高。公立大學入面,仲有公開大學都有物理治療學課程 (JSSU55)可以俾同學選擇,佢屬於 SSSDP 資助計劃,學費較貴。而東華物理治療(JSST05)同埋明愛​物理治療(JSSA03)呢兩個由專上學院開辦嘅學士課程,佢哋同樣屬於「指定專業/界別課程資助計劃」。

如果已經擁有其他學士學位,就可以考慮下 Poly Master of Physiotherapy,完成 2 年嘅全日制課程。如果入學之前同非政府社福機構成功簽訂畢業後為其連續服務 3 年嘅承諾書,仲可以獲得成個課程嘅全額學費資助。
物理治療師嘅前景係點?
物理治療師嘅就業市場持續有空缺,近十年嘅物理治療課程畢業生就業率達至百分百,同學仔絕對唔需要擔心出到嚟搵唔到工。畢業之後,仲可以因應個人興趣同埋有意服務嘅對象,選擇喺不同性質嘅工作,例如公營或私營健康組織、醫院、康復中心、體育學院、健身中心、長者院舍、社區活動中心等等,或者私人執業。
 
每間院校嘅課程都有各自嘅特色,有興趣投身物理治療師呢個行業嘅同學仔可以按照返自己嘅分數,去揀返適合嘅物理治療課程。小編祝大家都可以順利讀到心儀嘅院校,成為專業嘅物理治療師啦~
 
 大學學科資訊系列
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool

AfterSchool 是一個針對DSE而設的網上補習平台,課程涵蓋多個 DSE 科目,讓同學足不出戶就可以享有優質教學。註冊用戶人達 50,000 人,當中超過四分之一學生為應屆文憑試考生,是全港最大型網上補習平台。