【青少年與家人關係】唔識處理家人關係?5 個改善家庭人際關係嘅方法

AfterSchool
AfterSchool 2021-6-23 1,447
每個青少年都曾經為人際關係問題而煩惱,當中包括同家人嘅關係。AfterSchool 小編整合咗 3 個改善同屋企人關係嘅方法,幫助希望改善同父母關係嘅你!
人際關係係一個我哋會不斷面對嘅課題,亦都係青少年時期嘅我哋必定要過嘅一關。香港中學生成日會面對好多壓力同煩惱,包括學業、升學嘅壓力、同朋友相處嘅煩惱、同埋家庭關係,而同屋企人嘅關係往往都係我哋需要用一輩子時間學習嘅一樣嘢。
喺成長過程中,我哋逐漸花更多時間喺朋友同自己身上,同時花越來越少時間同家人相處。隨住我哋開始長大,我哋更容易同爸爸媽媽有爭執,短期內可能令大家唔開心。長期而言,我哋同屋企人可能逐漸疏離。AfterSchool 小編今日就分享吓改善家庭人際關係嘅方法:溝通、尊重、遷就同關心。

點解要處理好同家人嘅關係?

每個人都會有各自要處理好同家人關係嘅原因,而當中最大嘅原因可能係想珍惜雙方關係。
對於呢個主觀嘅問題,每個人都有自己嘅答案,而或者每個人都需要自己思考一下。小編覺得屋企人對自己重要,所以想同佢哋保持良好、和睦嘅關係,開心嘅時候可以為大家覺得開心,難過嘅時候亦都有人可以為大家分擔。唔知大家有啲咩自己嘅原因,想處理好同屋企人嘅關係呢?
credit: unsplash @insolitus
credit: unsplash @insolitus

我哋要點樣同家人相處?

有效溝通係所有成功嘅人際關係重要一環!

無論係要處理邊一種人際關係,有效溝通都係決定一段關係成功與否嘅重要因素。人同人相處嘅時候必定要經過不斷嘅磨合,而我哋都需要令對方知道我哋嘅諗法,而呢樣嘢就一定要透過溝通去解決。
喺同父母嘅關係裏面,就算我哋已經逐漸大個,父母可能都會覺得我哋仲係好細個,覺得我哋都未能夠為自己做決定。但係,青少年期嘅我哋會開始想得到更高嘅自由度,而父母往往未必同意畀更多自由我哋,造成摩擦,影響關係。
如果唔想影響我哋同父母嘅關係,但又想令佢哋聽多啲我哋嘅心聲,又可以點做?假設喺考完試嘅一個夜晚,我哋想約朋友出街食飯。呢個時候,父母直接唔批准我哋喺夜晚出街。
與其同父母爭執,質疑點解其他同學都可以同朋友出夜街,但唯獨自己唔得,不如嘗試同父母講清楚自己嘅諗法,包括自己想同朋友出街放鬆吓;講清楚出街嘅細節,包括同行朋友嘅名、你哋相約嘅地點、你會幾點出去、幾點返屋企等等。
呢啲溝通可以令父母唔需要過分擔心我哋嘅安危,同埋明白我哋已經長大,有管理同照顧好自己嘅能力,而且做嘢有分寸同有交帶,值得得到佢哋嘅信任。
不過,大家都要緊記,喺溝通之前,大家都一定要有願意花時間、心力去溝通嘅決心,咁就可以踏出成功嘅第一步~
credit: unsplash @Nathan Dumlao
credit: unsplash @Nathan Dumlao

互相尊重

可能我哋都試過,對身邊親近嘅人「以熟相欺」,即係似住同某個人相熟,喺言語上唔禮貌、胡亂發脾氣;或者唔尊重對方,將對方唔想再提嘅事不斷重複提起,然後以一句「講笑咋嘛」帶過;同埋忽略對方感受等等。
「以熟相欺」嘅出發點未必唔好,可能係因為我哋覺得家人會覺得無所謂,「都係講吓笑啫,咁認真做咩喎」,或者覺得咁樣先係相熟嘅人嘅相處方式。
但係,呢啲睇落小事嘅「講笑」,累積起嚟,往往就為將來嘅關係破裂同疏離埋下伏線。同家人嘅相熟唔係放肆嘅理由——同同其他人嘅相處一樣,我哋都需要本住互相尊重嘅原則,同屋企人相處。

同家人互相遷就

除咗對屋企人嘅基本尊重之外,家庭成員之間如果可以互相遷就,大家嘅關係都會變好。各個家人嘅興趣同生活習慣可能好唔同,所以雙方一定要互相遷就,家庭人際關係先可能變好。如果家庭兄弟姐妹有唔同嘅需要,例如大家都需要用電腦,但係屋企只有一部電腦,咁大家就要記得互相遷就、互相禮讓。
另一方面,喺一段健康、對等嘅關係裏面,雙方遷就嘅程度都應該係對等嘅。任何一方過度遷就另一方,都會對呢段關係唔好㗎。所以,處理人際關係並唔容易,我哋要學識攞嘅平衡,咁先可以維持到一段健康嘅關係!
credit: unsplash @Helena Lopes
credit: unsplash @Helena Lopes

關心多啲家人

互相關心往往都係令每段關係得以長久嘅重要因素,因為關心一個人可以畀到對方被愛嘅感覺。簡單至「你今日好似好攰喎,尋晚係咪瞓得唔好啊」、「你近排好似有啲唔開心喎,係咪發生咗啲咩事啊,有咩事你都可以同我講㗎喎」等等,都足以令家人感受到被珍惜同被愛嘅感覺。
但係我哋都要留意:過度嘅關心唔單止唔會令對方好過啲,甚至會令對方增添壓力,同樣對段關係唔好。喺關心屋企人嘅同時,我哋同時要畀空間對方,否則關心就好容易變成控制。

Shall We Talk? 每日預留 10 分鐘俾家人

細個嘅我哋總係會花好多時間同家人一齊,而且喺生活上遇到嘅所有事,我哋都會一一同爸爸媽媽分享。但隨住我哋長大,我哋開始會花更多時間喺自己同朋友身上,包括要溫書、同朋友相處,之後花越來越少時間同家人相處。
另外,我哋可能都唔會再咁願意同屋企人敞開心扉,令我哋好容易同爸爸媽媽之間開始有隔膜:父母又唔知道我哋嘅生活概況,我哋又唔明白父母嘅擔憂,令雙方嘅關係開始疏離。
如果我哋可以每日花 10 分鐘,放低手提電話,同家人寒暄一下,講吓自己今日做咗啲咩,有發生啲咩開心、唔開心嘅事,家人都會感受到佢哋對我哋嘅重要性。自自然然,我哋同家人嘅關係就會改善。
 

珍惜家人要及時!

credit: unsplash @Kin Li
credit: unsplash @Kin Li
大家由細到大都應該聽過唔少次要孝順爸爸媽媽,可能大家都有盡力對家人好,但好似無論幾努力都好,家人之間似乎永遠都有啲拗撬,令大家都唔開心。
小編曾經聽過一個講法:同家人嘅相處機會同時間係永遠都唔會夠,尤其是同父母嘅相處係要多幾多都唔會夠。每個人都有各自想珍惜家人嘅原因,喺思考呢嘅問題嘅時候,大家都要緊記:長大後嘅時間真係會過得越來越快,眨吓眼我哋就會投身社會做嘢,建立自己嘅家庭,過自己嘅生活;眨吓眼父母就會退休,亦都好快變老。
如果大家想好好珍惜家人,咁就由今日開始,每日都關心一吓屋企人、同佢哋分享吓自己生活上嘅事。我哋每個人都有改善同屋企人關係嘅能力!
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool

AfterSchool 是一個針對DSE而設的網上補習平台,課程涵蓋多個 DSE 科目,讓同學足不出戶就可以享有優質教學。註冊用戶人達 50,000 人,當中超過四分之一學生為應屆文憑試考生,是全港最大型網上補習平台。