聖保祿中學 (St. Paul’s Secondary School) 係跑馬地傳統女校，一直以純樸校風同埋優異成績見稱。今日 AfterSchool 就同大家一齊睇睇佢嘅歷史、教學模式、收生程序等等，等大家更加全面咁了解跑馬地 St Paul。想對 SPSS 有更多認識嘅你，記得要睇到最尾！ 聖保祿中學——學校簡介 聖保祿中學成立於 1960 年，係由沙爾德聖保祿女修會創立嘅一間天主教補助學校。學校位於跑馬地雲地利道 18 A，係一間資助學校，直屬小學係聖保祿天主教小學，而佢嘅香港姐妹學校包括聖保祿學校同埋藍田聖保祿中學。 聖保祿中學畢業生公開試成績優異：每年超過 70% 學生獲得本地學士學位取錄，而唔少學生更加入讀「三大」；大約 15% 嘅畢業生就選擇海外升學。喺學業氣氛濃厚嘅環境下，難怪喺 2014 DSE 出產黃曉晴、徐詠然呢兩位 7 科 5** 狀元！ 聖保祿中學亦不乏其他界別嘅優秀學生，例如佢哋喺香港傑出學生選舉當中出產 4 位傑出學生！喺課外活動方面，St Paul 嘅籃球隊、花式跳繩隊、交通安全隊、管弦樂團、合唱團、泳隊、英語辯論隊等等都喺各方面比賽屢獲殊榮！ 除咗在讀學生，聖保祿中學亦都出產唔少各個界別嘅社會名人，包括政界嘅毛孟靜、陳肇始，演藝界嘅湯洛雯、李靖筠，重有代表港隊出戰 2016 里約奧運、2020 東京奧運、並喺 2020 東京奧運刷新亞洲泳手紀錄，歷史性為香港奪得雙奧運銀牌嘅何詩蓓！ Credits: Instagram @siobhanhaughey01 SPSS 歷史背景 聖保祿中學嘅成立係作為聖保祿學校 (SPCS) 嘅延伸，目的係滿足當時社會越來越多女性需要接受科學教育嘅需求，成為香港最早提供科學科目、電腦科畀高中及初中學生嘅女校。由於喺 1960 年代，聖保祿學校冇開辦理科課程，所以唔少該校嘅理科生轉到聖保祿中學修讀理科預科！ 另外，聖保祿中學由創校以嚟非常著重學生嘅品格發展，並發展出一套「保祿人精神 (Paulinian Values)」。除咗校訓嘅「為一切人，成為一切」，學校重希望同學可以以良知 (Conscience)、自信 (Confidence)、勇氣 (Courage)、創意 (Creativity)、責任心 (Commitment) 等回饋家庭、工作同社會。 St. Paul’s Secondary School 教學模式 St. Paul 著重英語教學環境，所以除咗中文、中國文學、中國歷史同埋初中嘅家庭教育科之外，全部科目都以英文作教學語言。除咗有外籍老師任教之外，初中學生重會每星期上英語會話堂，提升說話能力同溝通技巧。 另外，SPSS 高中同初中開設嘅科目都唔同。低年級嘅包括科目：中國語文、英國語文、數學、通識教育/公民與社會發展科、中國文學、英國文學、中國歷史、經濟、宗教、地理、歷史、生物、化學、物理、資訊及通訊科技、視覺藝術；而高年級就多咗數學延伸部分 （代數與微積分）、企業、會計與財務概論同埋倫理與宗教～ 除咗學業成績之外，聖保祿中學同樣希望學生喺其他活動有所發展，所以為同學提供唔少校內課外活動，包括初中英文朗誦及話劇比賽 (Verse and Play)、布上畫比賽 (Painting on Fabric)、班際跳繩比賽、班際跳舞比賽、班際中英辯論比賽、班際即席演講比賽、才藝表演 (Talent Quest)、學生電影反思日 (Student Reflection Day) 等等，為同學提供唔同機會去發展所長！ 近年，STEM / STEAM （即係科學 Science、Technology 科技、Engineering 工程、Arts 藝術、Mathematics 數學）逐漸成為教育嘅大趨勢，所以 St Paul 亦都引入 STEAM 教育，包括舉辦烏克麗麗 (ukulele) 製作工作坊，希望同學透過親身實踐，可以明白樂器嘅發聲原理，乃至背後嘅科學原則，學以致用，並令 STEAM 融入日常生活。 師資與教學配套 Source: Schooland 聖保祿中學一共有 30 班，除咗各班課室、操場同禮堂之外，仲有小教堂、STEAM Room、魚菜共生房 (Aquaponics Room)、3D 影印房、多個科學實驗室、多媒體學習室、圖書館、家政室、電腦室、小組教學室、音樂室、視藝室、舞蹈室、社工室、面試室、校園電視台。擁有咁多設備，一定可以幫助學生嘅全能發展！ St Paul 中一收生程序 聖保祿中學身為一間 Band 1A - 1B 嘅學校，全港排名大約 30，入學競爭自然唔細。喺中學派位，直屬中學可以為其直屬小學保留最多 85% 學位，所以唔少聖保祿天主教小學嘅學生都「直升」中學部。 但係，由於聖保祿中學 (SPSS) 同聖保祿天主教小學 (SPPCS) 並唔係屬於「一條龍學校」，所以小學部同學都要考到一定成績，先可以成功升上中學部。所以，就算喺小學部嘅同學，都未必一定升得上中學部㗎！ 申請之前，家長不妨上校網睇睇學校嘅中一收生程序同準則。根據過往經驗，聖保祿中學中一學位總數為 180，當中自行分配學位佔 54 個學額，小六同學每年一月可以遞交申請。要喺眾多小學生中脱穎而出，喺自行分配學位階段考入聖保祿，就一定要經過面試：同好多其他傳統女校一樣，聖保祿中學非常著重學生嘅品行、禮貌等等。要考入 Band 1 名校，學業成績同埋課外活動經驗當然亦都同樣重要，而呢 4 個都係同學能唔能夠考入聖保祿嘅重要因素。 雖然跑馬地 St Paul 嘅統一派位校網係灣仔區，但係學校同樣招收唔少嚟自東區嘅 Band 1 小學生。自問成績唔錯、品行良好嘅同學絕對可以一試！ 跑馬地聖保祿中學——相關新聞/評價 聖保祿中學校風良好，好少外界對學生嘅負面評價。不過喺 2013 年，學校曾經申請轉為直資但不獲教育局批准，原因係各持份者未能為學校係咪轉直資達成共識。校方而家無限期擱置轉直資計畫。另外，喺 2019 中六最後上課日，一名聖保祿中學老師因為學生喺校外影相留念，疑似造成阻塞所以報警，事件引起社會關注嗰位老師嘅處事手法、學校嘅校規、乃至香港教育制度嘅弊病。校方其後發表聲明，指「相關老師對倉猝報警一事深表歉意」，並容許該屆學生喺指定日子返學校影相。 不過與此同時，聖保祿中學校風純樸，網上不乏關於 St Paul 面試嘅討論、同埋港隊泳手何詩蓓嘅報導，而大眾對聖保祿中學學生嘅評論正面。 名校專訪系列 德望學校 GHS｜庇理羅士女子中學 BPS｜聖保祿中學 SPSS｜培正中學 PCMS｜英華書院 YWC｜協恩中學 HYS
