協恩中學 (Heep Yunn School)、協恩小學同協恩幼稚園 (Heep Yunn Kindergarten) 一直被視為傳統名校，多年嚟都受唔少家長嘅青睞。究竟協恩轉直資前後嘅收生安排有咩分別？協恩中學排名幾多？協恩中學學費又貴唔貴？今日 AfterSchool 就同大家講講協恩中學嘅歷史背景、教學模式、教學配套同師資，以及協恩中學面試，幫助想了解協恩多啲嘅你！ 協恩中學 (Heep Yunn School) 學校簡介 位於九龍城嘅協恩中學（英語：Heep Yunn School）創立於 1936 年，係香港聖公會轄下嘅基督教直資女子中學，亦係香港補助學校議會 22 間成員學校之一，屬於傳統名校。協恩中學 Band 屬於 Band 1A，學校排名長期處於全港頭十。同時，協恩中學係一間直資中學，協恩中學學費（初中）為每年 3 萬 2 千港元，而高中嘅 Heep Yunn School Fees 為每年 3 萬 5 千港元。 Heep Yunn 校訓係「協力藉恩，信主愛群」。學校推行全人教育，同時非常注重學生喺德、智、體、群、美、靈六方面發展，以及同學嘅中英語文能力。 提起協恩，唔少人都會諗起佢哋學生驕人嘅學業成績同各方面嘅傑出表現：截至 2018年（第33屆），協恩中學喺香港傑出學生選舉一共出產 5 位傑出學生；而協恩喺 2014 年亦出產考獲 8 個 5** 嘅超級狀元陳詠妍。 作為歷史悠久嘅傳統名校，除咗畢業生喺中學文憑試考獲驕人成績，Heep Yunn 亦出產唔少社會各界嘅名人。香港作家西西、前港大學生會會長及前學聯常委梁麗幗、以及香港女子乒乓球代表，獲得 2020 東京奧運女子乒乓球團體賽銅牌嘅杜凱琹都係協恩校友！ Heep Yunn School Address 學校地址： 香港九龍靠背壟農圃道1號 學校聯絡方法： 電話：2711 0862 傳真：2715 3755 電郵：hys-mail@hys.edu.hk 網址：www.hys.edu.hk 延伸閱讀：2021 全港最新中學排名 + 選校指南 協恩中學歷史背景 協恩中學最早嘅起源可以追溯到 1886 年：當時，英國聖公會傳教士莊思端女士創立咗一間名為飛利女子學校嘅女子漢文學校，目的係為華人基督徒嘅女兒教授基本知識。學校喺二十世紀初，因為教會要喺校址開辦聖約翰寄宿舍，所以由原址般咸道聖保羅書院遷校至巴丙頓道 4-6 號。喺 1924 年，飛利女子學校連同喺 1918 年因為汕頭大地震受損而遷入飛利巴丙頓道校舍嘅聖士提反女子中學，一同遷往列堤頓道 2 號，而飛利女校亦喺呢個階段開設中學部。及後喺 1936 年，飛利女校同另一間位於宋王臺嘅聖公會女校：維多利亞女校合併創立新校，亦即今日嘅協恩中學，校址位於靠背壟農圃道。 由兩校合併嘅協恩中學，校訓係「協力藉恩，信主愛群」，相當反映校名「兩校協作以見證神恩」嘅意思。 Heep Yunn School 教學模式 Heep Yunn 著重同學嘅英語能力，所以學校以英文為主要教學語言。學校為初中同學提供嘅科目包括中國歷史、中國語文、家庭生活教育、普通話、地理、宗教、家政、數學、歷史、法文、科學、綜合人文科、視覺藝術、英國文學、英國語文、西班牙文、電腦、音樂、體育，而高中嘅科學就分拆為化學、生物、物理、組合科學、綜合科學，亦都多咗通識教育、經濟、企業會計與財務概論、英國文學、視覺藝術、旅遊與款待。 除咗學業成績之外，協恩亦希望同學喺課外活動方面都有所發展：學校截至 2018-2019 學年共有 23 個運動隊伍、4 個樂團、4 個合唱團 (其中兩個分別係同九龍華仁書院 WYK 同埋拔萃男書院 DBS 合作嘅男女混聲合唱團)、普通話學會、中文同英文辯論隊、2 個劇社、編委會 (Editorial Board)、女童軍以及逾 60 個分別同語文 (Language)、人文研究 (Humanities)、視覺藝術 (Visual Arts)、科學 (Science)、社會服務 (Social Service) 同埋領袖訓練 (Leadership Training) 有關嘅活動。 協恩中學非常著重同學嘅中英雙語能力，所以為同學提供大量課室以外嘅語文練習機會。Heep Yunn 每年都會出版一本名為《思齊 Vintage》嘅校刊，而校刊係由校內一個由學生擔任嘅編委會(Editorial Board) 負責編輯同埋設計。除咗校刊之外，編委會每年都會負責出版一本叫做《Flourish》嘅小冊子，裡面紀錄協恩中學同學每學年所得嘅所有獎項同埋獎學金。除此之外，學校為咗喺學校推廣寫作文化，所以喺學校出版中文版校報《聚曦》以及英文版校報《Gatherine》。協恩中學為同學提供咁多中英文寫作機會，難怪協恩同學喺 DSE 中文同 DSE 英文都屢獲佳績！ 校方希望同學可以喺呢啲活動當中，激發創新同創意，並且培養個人嘅責任感同投入感，同時學習同其他同學互相支持。同學亦都可以根據自己嘅能力同興趣，選擇自己有興趣嘅課外活動，令自己喺學業之外都可以學習同其他人溝通嘅技巧、搞活動、體驗社會等等。 協恩校方咁支持同學多方面發展，唔怪得之協恩籃球隊人才輩出，而協恩更加被稱為「籃球學校」！ Credits: 體路 Sportsroad 教育配套和師資 師資方面，協恩教學人員共有 92 人，當中接近全部老師具有教育文憑同學士學歷。Heep Yunn School 更加有超過一班老師有超過 10 年教學年資！ Credits: Schooland 協恩中學每級有 5 班，全校共有 30 班。學校佔地 11,000 平方米，一共有六幢建築物，分別係本部大樓、小禮拜堂、新翼大樓、圖書館、金禧樓以及多用途教學大樓。 戶外設施方面，協恩校舍有一個 25 公尺泳池、兩個多用途運動場、小花園、停車場同埋草坪。其他設備則有禮堂、飯堂、學生活動中心和多用途教室、劇院、演講室等 19 間特別室、32 間課室同埋 3 層高嘅室內體育館。 Heep Yunn School 亦有支援有特殊教育需要學生嘅設施，包括暢通易達升降機、暢通易達洗手間同埋視像警報系統。 協恩中學面試 協恩中學通常喺每年 9 月到 12 月接受下學年中一入學申請。喺正常情況下，所有申請人均會獲得首輪面試機會，所以想入讀協恩嘅同學，除咗要考取好成績，唔好唔記得要及早準備面試啊～ Heep Yunn 期望取錄點樣嘅學生？協恩中學指出校方期望取錄謙虛而且懂得感恩、「唔怕捱苦」同埋信任學校嘅學生。同時，校方希望喺面試睇到同學嘅表達能力同思考方法，所以就算同學唔適答問題，都記得要盡量估同埋嘗試表達自己嘅睇法，唔好太緊張。 家長可以點樣同女兒準備協恩面試？校方指出，家長可以喺日常同女兒相處嘅時候，了解多啲女兒嘅興趣同埋個人期望，並且俾機會女兒多啲練習用英文表達自己嘅睇法。 另外，隨住協恩中學喺 2012 年 9 月由津貼中學轉為直資學校，學校同之前有聯繫嘅 — 協恩小學嘅關係亦都面對轉變，而雙方嘅聯屬關係已經喺 2017 年 9 月結束。喺 2017 年 9 月或之後入讀協恩小學嘅小一學生，唔會再獲保證能夠直升協恩中學。所以協恩小學嘅同學喺升讀協恩中學方面係冇特別嘅優勢嘅～ 注意：協恩係直資學校，所以學校唔參加教育局嘅「中學學位分配辦法」，而有興趣申請入讀協恩嘅同學記得要留意住協恩嘅招生時間表！ 延伸閱讀：【中學面試必睇貼士】自我介紹、中學面試題、必學面試技巧一覽 相關新聞/評價 協恩中學係 Band 1A 嘅傳統女名校，相關新聞除咗圍繞 Heep Yunn 同學喺學業方面嘅出色表現，亦有唔少關於協恩籃球隊嘅報導。除此之外，協恩受移民潮影響，學校較高學生流失率嘅事件亦都喺新聞上略有提及。 名校專訪系列 德望學校 GHS｜庇理羅士女子中學 BPS｜聖保祿中學 SPSS｜培正中學 PCMS｜英華書院 YWC｜協恩中學 HYS
