【Retake DSE 攻略】重考 DSE 如果想 retake 升 grade 必睇!

AfterSchool
AfterSchool 2019-7-9 33,712
重考 DSE 真係咁容易?AfterSchool 同大家分享重讀中六 retake 成功升 grade 嘅關鍵 ! 入面仲有 DSE combine cert 合併成績嘅小貼士㗎!

重考 DSE 你需要一個計劃!

重考 DSE 好多人都會諗過,因為 retake DSE 對於好多人嚟講係一個新希望,但係如果 retake DSE 唔識好好規劃其實會導致 retake 成功機會大減㗎!Afterschool 將會分享重考 DSE 要考慮嘅重點,,令你 retake 升 grade 無難度! 

 
重考 DSE 意義

重考 DSE 對於好多學生嚟講係一個貼地嘅選擇,因為屋企無辦法負擔海外升學費用,而重讀中六應考本地考試可以有多一年時間好好準備。
好多學生選擇 Retake DSE 因為覺得 Asso 、 HD 係新嘅考試制度,自己難以適應,面對新嘅考試制度有未知風險,而且要同其他同學合作做好多projects,團隊合作顯得重要。相反 DSE 係自己熟識嘅考試制度,比較得心應手,只要做好自己,就可以拎到好成績,唔似 Asso、HD 受組員影響成績!
 

DSE combine cert 有咩注意?

重讀中六可善用 DSE 合併成績優勢

重讀中六係可以 DSE 合併成績,combine兩年嘅成績,就算你第二年考差咗,JUPAS 都只會計你考得最好嘅一次㗎咋!
假設你第一年考到 4 5 3 4 5 ,第二年只係重考中文、英文、數學分別攞到lv 5、lv 5*同lv2, 中文計lv 5(第二次考),英文計5*(第二次考),而數學科就可以計考得比較好嘅第一年成績lv 3, 最終分數變成 5 5* 3 4 5 ,所以大家重考 DSE 可以好好善用 DSE combine cert 嘅優勢, 咁就可以更容易入到心儀大學㗎啦!
重讀中六記得留意部分大學學科合併成績會扣分,睇清楚心儀大學同學系對重考 DSE 學生嘅安排!
詳情可以睇下另一篇 AfterSchool 寫嘅 中六備戰時間管理Time Management攻略 㗎!
 

Retake DSE : 應該揀重讀定自修

重讀
重讀即喺學校重讀中六一年,擁有學校資源好好準備 retake DSE。

重考 DSE - 重讀好處

Photo by Kiwihug on Unsplash 
Photo by Kiwihug on Unsplash 
學校重讀中六一年會比較有學習氣氛,因為同學之間互相扶持,如果重讀中六嘅學生遇到問題都都可以即時向同學及老師請教,短時間解決問題,仲可以搵老師改作文試卷!Retake DSE 仲有一大班同學陪你考 DSE,讀書都讀得開心啲!
 

重考 DSE - 重讀壞處

重讀中六學生要跟據學校學習進度做功課同SBA,如果本身已經做過,仲要做多次㗎.......重讀中六仲要照樣上堂、測驗考試、補課同參加學校活動, 佔用你大量溫習時間,重考 DSE 反而少咗自己溫書嘅時間!
自修
自修即係自己彈性安排溫書時間,學習進度唔再受學校安排影響。
 

Retake DSE - 自修好處

自修 DSE 可以有足夠學習時間,唔需要跟學校學習進度而重做已經做過哂嘅課題及 Past Paper , 同時亦可以針對自己學習弱點改善。自修 DSE 仲可以多咗時間做運動,增強抵抗力,病痛都少啲, 學習效率仲好咗添!
 

Retake DSE - 自修壞處

自修想有好成績最終都係要靠自律,成年自己一個讀書好易心散迷惘,無老師又無同學仔同你渡過呢一年,一個唔小心就怠惰咗一年,重考 DSE 最尾 grade 就無升過仲可能跌咗!
 

重考 DSE 必勝攻略!

Retake DSE 成功先要了解入讀目標大學嘅要求

Photo by Alexander Redl on Unsplash
Photo by Alexander Redl on Unsplash
Retake DSE 唔係容易嘅事,深入了解入讀目標大學嘅要求,知道自己同目標分數嘅距離,策劃出適合自己嘅溫書計劃,一步一步向目標邁進,知道自己要點做就會更容易可以達到目標 retake 升 grade 㗎啦!
詳情可以睇下另一篇 AfterSchool 寫嘅一文睇盡 JUPAS Admission Score 、收生要求㗎!
 

重讀中六配合適當運動可改善學習效能

Retake DSE 如果想學習效能提升可以一星期抽30分鐘做運動,運動能夠將氧氣更有效送入大腦,血液流動更快,大腦可以思考更快,思緒更加清晰,學習效能更好!
Retake DSE 情緒穩定好重要,運動可以減壓,減輕壓力帶來嘅不適,運動令你可以專注當刻,減低過份沉溺喺唔開心同擔憂
 

Retake DSE 定期回顧做錯嘅題目

重讀中六可以準備一本錯題薄,將自己做過嘅功課、練習錯題整理,有助於針對自己學習弱點改善,令學習嘅時候更加有方向,而唔係死做爛做
重讀中六期間,做過嘅題目銀河沙數,今日做完下星期可能就唔記得……一本錯題薄可以令你記得自己做錯嘅題目,可以寫出自己解題有章礙嘅原因,對於做錯嘅題目,喺補習筆記同課本搵出相似嘅題型,嘗試思考作答,如果能輕易解答,代表著你己經掌握咗。如果都係解答唔到,代表著對於呢個錯題你需要整理更加深入同完善,以免下次犯同樣錯誤導致 retake 失敗!
 

DSE 溫習時間表安排

重考 DSE 返學日安排

放學後可以趁有空檔休息,可以係番緊屋企途中同朋友傾計上網relax 下。小編之後會去補習,補習後可以做學校功課再溫陣書。溫陣書之後食晚餐休息,之後再做功課、溫書或者做運動。夜晚11點就上床訓覺,咁先夠睡眠時間!
 

Retake DSE Study Leave 安排

Study Leave 係 重考 DSE 重頭戲,小編建議同學仔要早起身溫書!咁先有多d 時間溫書, 期間可以就著科目重要性分優先次序溫習,最好習慣7.30am起身同11.00pm瞓覺,咁就可以有一個健康嘅心理時鐘重考 DSE !
詳細 DSE 溫習時間表安排可以參考AfterSchool中六備戰時間管理Time Management攻略㗎!
 

重考 DSE 嘅心理質素你Ready未?

Retake DSE 讀書心理質素

Photo by bruce mars on Unsplash
Photo by bruce mars on Unsplash
Retake DSE 需「過五關斬六將」
好多學生會覺得讀書只係用嚟應付考試,所以都唔夠動力讀書,當遇到困難就好易放棄。小編覺得可以「打爆機」為目標,每一條試題都係一個難關,越過所有難關就當贏咗。小編每答對一題題目就會產生滿足感,令到自己更加有動力努力讀書,考好 DSE !
 
Retake DSE 「不與他人比較」
與朋友比較成績,只會為自己添加不必要嘅壓力。讀書學習嘅過程中,一定會有人讀書好過自己,差過自己,如果太過著重自己同朋友嘅距離,反而會令自己難以專心讀書。小編曾因覺得技不如人,成日感到自卑。負面情緒對自己學習無半點正面幫助,小編常因自卑而失去學習動力……其實只要抱著做好自己嘅心態,無須理會其他人嘅表現,重考 DSE 好成績自然會屬於你!
 

Retake DSE 考試心理質素

Retake DSE 「相信自己係最強」
小編每當因考試而緊張嘅時候,就會覺得如果因為緊張而拖垮自己嘅考試表現係一件可惜嘅事!相信自己一直嘅付出一定係無白費,同自己講付出過後一定會拎到好成績!每當遇到唔識嘅題目,有兩種諗法,第一種諗法係「我唔識其他人都唔會識」, 而唔係「其他人識得我唔識」,保持自己自信心,自然可以考好個試!第二種諗法係「公開試有機會出錯題目」,以往 DSE 都有題目出錯,唔需要因為一兩題而影響考試士氣!
 

Retake Dse 失敗嘅致命傷

重讀中六切忌拍拖 Retake DSE

Photo by Markus Spiske on Unsplash
Photo by Markus Spiske on Unsplash
中學生心智未定,男女關係處理尚未完善,缺乏經驗,容易產生爭執,為雙方帶來負面影響,而拍拖往往係分散注意力嘅最強武器,嚴重影響考試表現。重讀中六溫習時間有限,仲要同另一半傾電話,食飯,睇電影會耗費唔少時間,導致溫書時間少咗,重考 DSE 都考得唔好!分手導致考試一敗塗地例子多的是……公開試成績係人生大事,直接影響你讀大學嘅機會同前途!
 

溫書切忌自修室成群結黨

同學都鐘意三五成群去自修室溫書,好多時候都會花咗大量時間傾計,拖慢咗大家嘅讀書效率。就算一日花八個鐘係自修室讀書,讀書效率都不如一個專心在家溫書3個鐘嘅同學!小編建議同學儘量獨自溫習,唔好係自修室三五成群咁溫書,學習效率真係一般!
 

重讀中六切忌經常同朋友互傳短訊

唔少同學鐘意同朋友互傳短訊,雖然傳送短訊所花時間唔多,但係幾分鐘就覆一次短訊會分散專注力,影響讀書效率。小編建議溫書期間可以關咗手提電話,溫書過後先開番電話。如果真係好難關咗手提電話,小編建議可以用蕃茄工作法,每溫書25分鐘,就休息5分鐘,咁樣就唔會分散專注力,改善讀書效率!
詳細嘅蕃茄工作法可以睇 AfterSchoolDouble溫書效率嘅方法㗎! 
 

Retake 補習揀咩 course 好

Retake DSE最好就搵唔同 resource 去學,以免只係集中溫單一嘅資源, AfterSchool 本身都提供唔少免費資源,包你一定學到嘢!AfterSchool 都提供唔少高質免學費限時優惠課程,只要你留心上堂,重考 DSE 入大學指日可待!
重考 DSE 嘅你將會遇到好多困難,retake 成功需要你堅持到最後!俾啲掙扎!
 
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool