英文作為 DSE 其中一個主科，無論係對同學仔升學，定係以後求職都係非常之緊要，所以唔少人由小學開始已經會選擇補習嚟提升自己嘅英文能力。但係市面上嘅補英文方式有咁多種，究竟邊個好？邊個先係最啱自己？AfterSchool 為大家搜羅咗多間中學英文補習社、英文補習名師，仲會介紹各種補習方式嘅優缺點，絕對可以幫大家篩選出最適合自己選項目！
目錄
英文補習有幾重要？
Credit: pexels @Pixabay
同學可唔可以入到心儀嘅學科，DSE 嘅成績往往都係最重要嘅。而現時各大專院校唔少學科收生嘅計分方法，都會計算 4 科核心科目嘅成績，可見英文作為主科嚟講有幾咁重要。英文科喺某啲課程嘅計分方法入面，甚至會佔更大比重，例如 City U 嘅創意媒體學院（School of Creative Media, JS1041），英文就有 2 倍嘅加乘，所以英文科成績絕對係不容忽視。
根據考評局嘅資料，2021 年 DSE 英文科只有 9.1% 嘅考生得到 Level 5 或以上嘅成績，25.7% 攞 Level 4 或以上，52.5% 攞 Level 3 或以上，即係超過 9 成學生都卡住咗喺 4 以下，甚至將近 5 成人都淨係攞到 2 或以下，連入讀大學嘅門欄都達唔到。
無論係想保住 Level 3 入大學，定係想喺英文科奪星，考生嘅英文能力都係非常重要。然而，英文水平絕對唔係考死操爛操 Pastpaper 就可以提升得到。而 DSE 英文補習正正就可以提供更多資源，幫大家喺有限嘅時間內，有系統咁學習更多嘅詞彙，同埋每份卷嘅作答技巧，應考英文自然更加得心應手。
HKDSE 英文補習社、名師/老師邊個好
Credit: pexels @mentatdgt
市面上有咁多個中學英文補習老師，究竟揀邊個好？AfterSchool 就為大家整理左 5 個不同嘅選擇，同埋佢地嘅學歷背景、學生評價、教學方式等。
Mr. J English (AfterSchool)
英文補習老師 Mr. J English 喺 DSE 考得英文 5**，以 6 科總共 38 分嘅佳績，考入香港大學工商管理學學士及法學士 HKU BBA Law 雙學位。佢擁有七年 DSE 英文教學經驗， 共有 9,000 多名學生，超過 3,000 多名學生英文成績獲得顯著提升。Mr. J 仲係一位資深辯論教練，具備 Oral 及論證技巧。
喺總共一萬多個嘅學生評價入面，佢獲得 4.7 星嘅分數，更加有超過 7 成學生俾咗 5 星嘅評價。同學認為 Mr. J 嘅教學好有效率，每一分鐘都可以學到有用嘅技巧，幾乎每堂都會超時教新字。而且仲會將教授嘅技巧分類，令同學學得更加有系統同清晰，溫書嘅時候更加清楚邊啲先係重點。
Mr. J 有各種課程提供包括拔尖嘅 5** MASTERCLASS，專門提升 Grammar 能力嘅 The Grammar Conquest，同埋常規課程 The Foundation，價錢 $850-950/期。
Calvin Sun (嘉勳教育)
英文補習老師 Calvin Sun 喺 CE 同 A Level 都考到頂尖嘅成績，入讀咗神科港大工商管理及法律 BBA(Law) 課程，並且以優秀成績成為嗰一科第一屆嘅畢業生。佢教過嘅高中生已經超過 12 萬，有過萬歷屆 DSE 考生都係攞到 Level 5 以上驕人嘅成績。而且，佢曾經多次為唔同機構撰寫大型模擬試題目，並協調日校英文教師進行評卷工作，因此佢對考試要求瞭如指掌。
作爲英文補習名師，Calvin Sun 其實好唔好？根據市場調查結果，有 97% 學生認為 Calvin Sun 嘅課程可以幫助佢哋提升考試成績。佢獨家嘅「句構學」可以提升同學閱讀能力及準繩度；又有「命題法」幫助大家代入出卷員嘅思維；仲會教授「Logic Line Analysis」，令同學可以掌握得分要訣，喺短時間內有顯著嘅進步。
除咗嘉勳教育之外，仲可以喺現代教育、英皇教育到報讀到 Calvin Sun 嘅課程，價錢為 $700/4 堂。
Billy Ng (遵理學校 Beacon College)
Billy Ng 畢業於香港中文大學，佢嘅教學團隊亦都係由新制會考 / 高考 / 文憑試狀元，以及港大中大英文一級榮譽畢業生所組成。
Billy Ng 作爲近代比較新嘅中學英文補習老師，補佢究竟好唔好呢？同學認為 Billy Ng 上堂提供嘅練習份量足夠，每兩堂就會俾功課，例如係 MC Cloze、Proofreading，上堂會再對答案，可以幫助消除 Grammatical Mistakes 同埋訓練預感。而且每次學習技巧前一兩堂，同學都需要做曬 Pastpaper 預習咗先，聽書嘅時候會吸收得更加好。
同學可以喺遵理學校、同英皇教育報讀 Billy Ng 嘅課程，價錢為 $800-850/4 堂。
Kris Lau (現代教育)
英文補習老師 Kris Lau 係英文系英語教學碩士，擁有 15 年任教大型補習社英文補習班嘅經驗，亦曾經擔任唔同講座，包括學友社、SWA 學生福利聯盟嘅英文科講者。佢喺 2011 年仲獲邀請，前往牛津大學 University of Oxford 進行碩士級嘅學術交流。
唔知補 Kris Lau 好唔好？佢喺修讀碩士課程期間，向高考閱卷員和出卷員收集數據，進行學術研究，並編寫學術論文。2010 年參加過 DSE 英文考評會議，攞到考試評分準則、各卷重點等嘅第一手資料。Kris Lau 仲多次貼中作文題目。
喺現代教育報讀 Kris Lau 嘅常規課程，學費係 $800/4 堂。
Patrick Chan / P Chan (遵理學校 Beacon College)
唔少同學都會想知，擁有超過 30 年教學經驗嘅中學英文補習名師 P Chan 究竟好唔好？佢畢業於 HKU 英文系，並取得榮譽文學士及香港大學碩士學位，全港所教學生人數超過數十萬。P Chan 亦都曾經多次接受媒體專訪，例如《有線電視》、《新城電台》，分享佢嘅教學心得。而且由 2012 年開始至 2018 年，P Chan 每年 Writing 都會貼中題。
P Chan 係以 Double Lesson 形式上堂，每次補習都係上兩堂，每堂上大約 70 分鐘，所以每堂都可以學到唔同嘅分卷同埋豐富嘅文句。上堂前除咗 Notes 之外，都會派一份空白嘅筆記簿，同學需要一邊上堂一邊抄低一啲有用嘅 Vocab、句子，並且不停重覆，有助加強記憶。同學就算平時好少複習返筆記嘅內容，都會記得字詞嘅用法。
喺遵理學校報讀 P Chan 嘅課堂，價錢一般係 $810-820/ 期。
各種英文補習方式優缺點
網上補習
Credit: pexels @Katerina Holmes
優點：
- 可以彈性選擇上堂時間、地點，隨時隨地學習
- 課程配套完善，可重複播放影片
- 疫情期間不用出門更加安心
缺點：
- 上堂容易分心，同學需要自律
- 欠缺即時互動
大型補習社
Credit: pexels @Thirdman
優點：
- 英文補習老師學歷較高，教學經驗豐富
- 資源配套充足，大量筆記練習
- 分校多，較方便
- 課程較有條理
- 較清楚普遍學生的問題
缺點：
- Video 班缺乏互動，單向教學
- 學費較昂貴
- 公式化教學，未能根據學生水平作出調整
- 具有距離感，難令同學投入
- 為了吸引同學報讀其他附加課程，而只在常規課程內教授有限的技巧
中、小型英文補習班
Credit: pexels @Artem Podrez
優點：
- 人數較少，互動性較高
- 可以根據學生程度進行分班
- 通常靠學生口耳相傳，教學質素更有保證
缺點：
- 資源及配套比大型補習社少
- 比起私人補習較少個人化指導，難以對症下藥
- 師生關係未及私人補習親近
私人一對一補習
Credit: pexels @Anastasia Shuraeva
優點：
- 更能因材施教，進行針對性的教學
- 補習時間地點更靈活
- 師生關係更親近
- 補習老師一般較年輕，更清楚近代考試模式
- 可根據個人喜好選擇適合的老師
- 家長可以在補習期間從旁觀察
缺點：
- 補習費用較昂貴
- 導師質素參差
- 資源不及補習社豐富
自學英文
Credit: pexels @Tima Miroshnichenko
優點：
- 自行安排學習日程，彈性極高
- 可按照個人程度學習，能夠針對自己的不足進行改善
- 成本較低
缺點：
- 需要自律
- 太多不同種類的教材，難以篩選出適合自己的
英文補習每份分卷可以點補？
Paper 1 Reading
Credit: pexels @Vincenzo Malagoli
針對 DSE English Paper 1，中學英文補習老師一般會教同學各種答題技巧，例如點樣可以搵到文章嘅重點，又答得中 Marking Scheme。有啲補習老師仲會分析 English Reading 卷嘅出題趨勢，等同學了解英文卷一考核模式，避開考評局嘅出題陷阱，同時可以熟習唔同類型嘅文章同題目。
Paper 2 Writing
Credit: pexels @picjumbo
而 DSE English Paper 2 主要要學習各種文體嘅格式、語境，例如係常見嘅 Formal Letters, Letters to the Editor, Articles, Reports, Proposals 等，用合適嘅 Tone 去完成文章。英文補習老師亦會教授唔少好用或者靚嘅 Vocab 同句式，例如係一啲連接詞或者句子結構，令大家考英文卷二時使用嘅詞彙更豐富更多變化，避免成日使用重複嘅詞語，可以寫出一篇出色嘅 DSE English Writing 文章。
Paper 3 Listening
Credit: pexels @Andrea Piacquadio
為咗幫同學喺 DSE English Paper 3 攞到好成績，中學英文補習老師會喺堂上面進行聆聽練習，訓練大家嘅英文聆聽能力，仲會講解常見題型同埋英文卷三失分位，教大家點樣分辨正確答案。而喺 Paper 3B，補習老師會教同學點樣精確咁答中考評局 Marking Scheme 嘅 Points，同埋點樣運用各種詞彙句式，將呢啲 Points 通順咁寫成配合唔同語景嘅文體，例如係 Letter, Eail, Report 同 Proposal 等等。
Paper 4 Speaking
Credit: pexels @fauxels
喺 DSE English Paper 4 方面，英文補習老師主要係透過分析考評局英文卷四嘅要求，話比同學知考 English Speaking 嘅時候具體流程係點，同埋教大家有啲咩思考方向可以有助諗出論點，同埋表達自己意見嘅方式。部份老師仲會重覆訓練同學嘅 Speaking 技巧 及 Group Discussion 技巧，令我地喺考英文 Oral 時，點樣每次喺發言時都能回應到其他人嘅觀點，同時再發表自己嘅睇法同論點。
搵英文補習老師要注意啲咩？
英文補習的目標
Credit: pexels @Engin Akyurt
雖然大部分中學生都有補習，但係有啲同學仔只係出於一種「人補我又補」嘅唔執輸心態先去補習，並唔清楚自己補習嘅原因同目標。但如果同學可以了解自己究竟點解需要 DSE 英文補習，例如上堂聽唔明、唔識作答嘅技巧，同埋想透過補習做到啲咩，咁樣就會更加事半功倍，唔怕補英文補到好迷惘，又嘥錢嘥時間。
首先，同學可以了解下自己邊份英文分卷最弱、最想改善，再去選擇返適合自己嘅導師，針對自己嘅弱項作出改善。如果盲目跟隨朋友去補習，但係每次上堂都唔知自己為咗咩而補習、想學啲咩，最尾只會導致補習上堂唔認真聽，返屋企唔會複習筆記，練習又唔做，導致補習成效低，無法提升英文能力。
而且，補習方式有咁多種，有面授課程，有 Video 班 ，又或者係網上補習、私補英文，有時真係唔知揀邊個好。但每個人嘅性格、學習習慣都唔同，人地覺得好嘅又未必適合自己。同學喺搵英文補習老師之前要了解自己嘅需要，究竟係鍾意比較個人化嘅教學，定係想要更豐富嘅資源配套；鍾意互動性較強嘅 Live，定係鍾意隨時可以停低嘅 Video。
英文補習老師背景
Credit: pexels @Katerina Holmes
喺搵英文補習老師嘅時候，相信同學都會揀一啲學歷較高、喺公開考試攞過 Level 5 或以上成績嘅導師。DSE 英文成績好嘅補習老師或者已經可以令同學成績進步，但喺大學主修英文系嘅導師，會擁有更加多同英語有關嘅專業知識，例如係英國文學同語言學。佢哋對語言嘅理解更透徹，同學想知更多嘅時候，佢哋都可以解釋得更深入、唔會流於表面，對同學嘅學習同考試可能會有更佳嘅影響。
但相信大家都好清楚，即使英文補習名師自己學識淵博，又或者喺公開考試攞到好成績，但唔代表佢就會教得好、識得教。除咗補習老師嘅師資之外，教學經驗、年資，都有機會影響到同學嘅學習。如果老師有豐富嘅教學經驗，佢哋會更容易理解到一般同學嘅需要同弱點，更清楚知道應該要用咩教學方式去幫助佢哋進步。
同學仔揀 DSE 英文補習名師嘅時候，可以參考下其他學生嘅評價，例如問吓身邊嘅朋友又冇推薦，又或者上討論區，聽下唔同學生嘅意見，諗下呢位英文補習老師可唔可以提供到合適嘅支援俾自己，教學風格適唔適合自己等等。不過，好唔好其實都好主觀，補習呢啲都係人夾人。有啲英文補習社或者網上課程都有提供試堂，同學可以親身體驗吓，睇下邊個老師、邊種補習方式先係最啱自己。
英文補習費用
Credit: pexels @cottonbro
DSE 咁多科，如果補全科嘅話其實都係一筆幾大嘅開支。所以除咗考慮英文補習老師嘅背景同埋補習模式，同學都要根據返屋企嘅經濟能力揀返一個最啱自己嘅補習方式去補英文。
價錢方面嚟講一般英文補習一對一最貴，$130-300/hr，大型補習社同網上補習最平，平均 $100-170/hr，而中小型補習社就係中間大概 $150-$250/hr。
英文補習時間表、上課地點
Credit: pexels @Bich Tran
同學越高年級就會越忙，除咗功課越嚟越多、越嚟越難，仲有唔同嘅補課，可以補習嘅時間其實好有限，絕對係分秒必爭。所以同學搵中學英文補習嘅時候，應該選擇合適嘅課程時間同地點，咁先可以好好利用到課餘時間而有得休息。
同學仔可以留意下學校或者屋企附近有咩英文補習社，如果唔使跨區補習嘅話，咁就可以節省來回嘅時間。但如果補習社嘅上堂時間咁啱撞咗自己嘅時間表，咁就可能就要考慮其他補習社嘅課程啦。同學搵私補英文老師嘅話，都可以提出地區、上堂時間等要求，更加彈性。當然，透過 Video 網上補習，仲可以唔受時間地點限制，隨時隨地咁上堂。
不過就算有時間上堂，大家都要確保自己有足夠精力去上堂吸收知識。唔少英文補習社都會選擇喺同學仔放學之後，即刻開始英文補習班。但有部份同學啱啱喺學校落堂，連休息一陣嘅時間都冇就緊接住補英文，往往都攰到冇精神去吸收英文補習班嘅內容，到最後又要自己返屋企睇筆記，先知上堂教咗啲咩。同學可以揀一啲自己比較有精神嘅時間補習，並預留時間俾自己堂與堂之間休息。
