【小一叩門】2024 小一派位第 3 階段全攻略(連小一叩門信範本格式)

AfterSchool
AfterSchool 2023-11-13 41,919
AfterSchool 為大家整理咗呢篇小一叩門程序懶人包,包括截止日期、小一叩門信中英文範例格式、面試貼士等等。立即點擊睇更多資訊!
小學係小朋友成長學習嘅重要環境,所以家長為小朋友所選嘅學校,對佢地將來影響深遠。假如統一派位時,小朋友不幸被派到非心儀嘅小學,好多家長都會選擇去叩門,務求讓小朋友可以入讀最合適佢地嘅學校。
當中叩門信就相當於一張小學入場卷,只有寫好叩門信,小朋友先有機會獲得面試機會,甚至入讀該學校。 今次 AfterSchool 小編就特別整理咗最新小一叩門嘅資料, 包括家長常見問題、叩門日期及所需文件、撰寫小一叩門信中英文範本格式、孩子叩門時必備面試貼士等,等各位可以喺叩門前做好準備,把握最後一次機會覓得心儀學校!  

小一叩門程序

小一叩門係小一派位嘅最後一個程序,如果同學係自行分配學位及統一派位階段都派唔到心儀小學嘅話,就需要把握最後一次機會前往叩門爭取被取錄嘅資格。
一般而言, 6月初放榜後和9月開學後首周均可叩門,但6月機會遠高於9月,因較多家長早已把握此黃金機會將申請信送到學校,故於放榜前後2日交信為最佳的時間!
但請留意,家長不論是否滿意派位結果,都要先行到該小學註冊學位,再考慮是否到其他學校叩門!事關若然學生無去註冊,便會視為放棄學位論,而個學位將會再度被分配給其他學生!

叩門所需準備文件

家長記得盡早睇清楚心儀學校嘅安排,下載同填好有關表格,準備以下文件嘅正副本:
  1. 小朋友出世紙
  2. 家長身份證
  3. 派位表格
  4. 幼稚園成績表
  5. 證件相
  6. 領洗紙
  7. 證書/ 獎狀
  8. 貼足郵票的回郵信封
想增加成功率絕對唔少得「叩門三寶」
  1. 申請信:用英文寫,電腦打印,最緊要清楚易讀、簡明扼要,一般3-4 段文字就可以
  2. 推薦信:如果識啲校監、名人、牧師,當然最好搵佢哋,但呢啲重量級人物相對都難搵。所以大多家長都會搵返幼稚園校長,咁就記得最遲喺5月前主動問吓校長;如果子女跟啲好出名好勁嘅老師學嘢,都可以請老師幫手寫推薦信。
  3. 個人檔案:一般都係放返基本資料、學業成續、參與過嘅活動同專長、以及比賽嘅獎項同證書副本。

選擇叩門學校留意事項

  1. 留意學校可以提供幾多小一叩門嘅位:一般每班可以酌情收多1個學生(叩門位),加每班1個重讀位;有啲傳統名校經教育局准許,叩門位可以收小一總人數嘅10%,再加每班1個重讀位。所以舉個例,如果某傳統名校有5班小一,每班30人,「150人×10%+5人」,即係小一全級最多可以提供20個叩門位。
  2. 留意有無「111」限制:有啲學校只會接受曾經喺「自行分配學位」及「統一派位(甲部及乙部)」以果間學校作為第一志願嘅申請人(俗稱「111」)
  3. 可以不受校網限制:叩門可以揀所屬校網以外嘅學校,不過由於小一叩門位有限,所以搵小一叩門學校嘅時候,除咗考慮個人喜好、嗰間學校嘅學額數量之外,亦應諗埋該學校是否屬於熱門校網,如果係嘅話競爭度會上升。
  4. 可以嘗試直資和私校:唔少家長視私校offer為「買保險」,喺大抽獎塵埃落定後,或者會有部分學生因獲其他學校取錄而放棄私校學位,由於全港共有36間私立小學,所以派位唔理想嘅同學不妨向心儀私立學校查詢,並提交申請。

叩門面試技巧

小一面試多數都係會問及中英數嘅學科問題,或者以近排發生嘅事例如疫情做切入點問一啲簡單問題。如果申請信提及過小朋友有獨特才能,例如唱歌、跳舞等,都有機會要小朋友即時表演。家長都要了解學校教學方向、點解希望子女入讀同對學校嘅期望。
以下係一啲常見嘅面試問題:
1. 「平時得閒/疫情期間,你鍾意做啲乜?」
首先,校方通常都喜歡問小朋友的興趣。我會鼓勵同學不要只輕輕帶出活動名稱,例如:「我鍾意游水同打波。」 其實,比較好的答案是需要有更多說明,譬如說:哪一位家人陪小朋友進行活動、活動的地點以及有沒有參加表演或比賽,甚至一些難忘的經歷和喜歡這個活動的原因等等。
2. 「你鍾唔鍾意睇英文故事書?」
大部分小朋友都會回答:「我鍾意睇英文書架。」在這個時候,校方便會追問:「咁你最鍾意邊本故事書啊?可唔可以講個內容比老師聽?」 如果同學未能說出書名或很清楚表達內容,面試的表現就大打折扣。
3. 「你鍾唔鍾意玩電子產品?」
在面試中,老師可能會問小朋友對於電子產品的興趣,例如會否玩IPAD或用爸爸媽媽的手機去看短片、玩遊戲。 很多同學都會回答:「我鍾意玩架。」校方亦會追問小朋友,究竟每日或每星期,會用多少時間去玩這些遊戲。 有時候,同學對於時間的概念掌握得並非很好,可能會回答:「每日用一、兩個鐘玩囉。」那麼,校方便會覺得小朋友對於時間管理不是太好,可能會因為玩電子產品而忽略其他活動。
4. 「點解你想喺我哋學校讀書?」
我了解很多家長為了小朋友的將來,會去很多學校叩門。正因如此,很多小朋友基本上連學校名、甚至校長的姓氏也不知道。其實,這些基本的資料一定要緊記。再者,家長一定要讓小朋友了解,為什麼父母會認為這所學校適合他們。
5. 「點解你唔鍾意原本讀嗰間學校呀?」
我曾遇過一個小朋友,他說:「因為爸爸媽媽覺得之前間學校唔夠叻,佢想我再叻啲,所以就考小一叩門面試喇。」 其實呢種對答方式並不恰當,因為校方會覺得來這所學校讀書只是家長的意願,而非小朋友自己的興趣。


叩門信(求位信)重要嗎?

叩門信(亦叫求位信/ 申請信)就相當於一封打工仔搵工嘅 Cover Letter,透過遞信向公司表達自己想入職嘅意願。喺為小朋友叩門嘅時候,除左遞交申請表格同相關文件之外,好多時候都會需要附上一封叩門信。當自行分配學位以及統一派位嘅時候,小朋友都未能入讀心儀嘅小學時,呢封叩門信嘅用意就喺表達佢想入讀該學校嘅意願同誠意,並希望學校可以提供一個面試機會。
 

家長們要幾時準備好叩門信?

每間學校嘅叩門程序不一,有啲小學喺統一派位前已經可以開始叩門,有啲則喺派位當日先開始接受申請,部分小學更表明不接受叩門申請。因此各位學生家長應提早了解各校收生方式,以免白費力氣、「摸門釘」,甚至錯失叩門機會。就算覺得小朋友統一派位嘅成功率好高,喺派位結果公佈前,家長亦應至少選擇一間小學及準備叩門信,以作後備之用。
 

點寫好小一叩門信?

語言文字:中文定英文?

雖然好多人認為叩門信用英文書寫比較好,但其實語言並非叩門信嘅重點。文字方面,叩門信嘅表達最緊要流暢清晰、簡明扼要,因此家長應選擇以較擅長嘅語言去書寫信函。若用英文書寫,應注意所用嘅文法是否有錯;若用中文書寫,則應注意句子嘅結構成分(如有沒有出現語病)。當然,各位亦要避免出現錯別字。

內容重點:寫咩好?

叩門信並非越長越好,一般3 - 4段便可。整體而言,叩門信內容應包括以下三大範疇:
入讀原因:認同該校教育理念 (宗教、學習模式、品德教育、課外活動)、小朋友嘅意願......
自我介紹: 講述小朋友嘅獨特之處 (優點)、學術成就、課外活動成績......
孩子可如何對學校發展有幫助:如何回饋學校、幫助學校在校外比賽取得佳績......
喺寫叩門信之前,家長應該做好資料搜集,尋找各學校嘅校訓同特色。內容從頭到尾都應該以其為主題,包裝一下內容。
 

編排格式:參考網上樣本範例Sample?

雖然網上有很多叩門信範例樣本 Sample,但家長都不應過分依賴,甚至直抄原文,因為這樣只會顯得毫無誠意。編排格式方面亦應以簡單明瞭為目標,例如小朋友嘅學業成就可按學科分類並以表格顯示。由於小學每年都會收到數以百計嘅叩門信及portfolio,家長應盡量將重點突出 (如用粗體/ 橫線顯示),以最簡單直接嘅方式,將小朋友嘅優點擺在學校眼前。
 

小一叩門信常見問題

小學叩門信係咪手寫有誠意啲?

除非家長對硬筆書法極其有信心,否則一般建議用電腦打字和列印。電腦打印不但整齊乾淨,而且簡單易讀。另外,由於小朋友有機會前往多間小學叩門,叩門內容應按照該校特色而有所變化。所以,利用電腦撰寫信函更能方便家長喺基礎內容上作修改同變更。
 

除左叩門信,仲有啲咩要準備?

其實喺寫叩門信之前,家長們應先了解心儀學校嘅叩門程序。每間小學各有不同嘅收生程序,有些只需遞交申請表格(不用叩門信),小朋友通過面試即可。如果學校表明會收叩門信,家長亦要準備好其他文件。除左身分證明文件、成績表及派位表格外,家長亦可以準備推薦信、小朋友的個人檔案portfolio 同比賽獎項/證書副本。所以做好事前準備同調查,可以減低前往叩門時出錯嘅機會。
免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool

AfterSchool 是一個針對DSE而設的網上補習平台,課程涵蓋多個 DSE 科目,讓同學足不出戶就可以享有優質教學。註冊用戶人達 50,000 人,當中超過四分之一學生為應屆文憑試考生,是全港最大型網上補習平台。