DSE 中文卷一閱讀理解向來會被同學視為洪水猛獸，覺得難以處理，常見原因如下： 睇唔明閱讀材料，唔明白作者到底寫緊咩 唔識唔同題目嘅答題框架，寫咗一大段，但都拎唔到分 唔識十二篇範文技巧及溫習方法，然後甲部分數已經比其他同學拉開咗好大距離 文言文部分睇唔明，唔識解題 白話文唔識分段，經常拎唔足分數 覺得中文閱讀卷題目太多，唔可以喺限時之內完成 解答呢啲問題之前，同學仔需先知道 DSE 中文卷一嘅考試模式同計分關鍵。今次就等 AfterSchool 同大家全面拆解 DSE 閱讀理解甲部十二篇範文、乙部文言文、白話文技巧心得及溫書方法，仲會分享以 Past Paper 操練 DSE 中文閱讀理解技巧。希望可以助大家攻破 DSE 中文卷一，向5**之途邁前一步！ DSE 中文卷一考試模式 DSE中文卷一考嘅就係同學嘅答題技巧、對文本嘅深層次理解，以及中文基礎概念喺閲讀材料中嘅運用，例如寫作手法以及修辭手法等。 閱讀能力嘅評分標準，即評估學生喺理解、分析、感受、鑑賞、運用唔同策略等能力嘅高低。 DSE 中文閱讀理解分數比重 根據考評局 2024 資料，DSE 中文卷一總分所佔嘅比例為 40%，考試時間為 1 小時 30 分鐘，考試以筆試形式進行，學生需要作答全部試題。 中文卷一分為甲、乙兩部分，甲部考核十二篇範文，佔全卷 30%；乙部考核一篇文言文篇章及一至兩篇課外白話文篇章，佔全卷 70%。設題方式包括問答、選擇、填表、填充等。 DSE 中文卷一嘅比重，注定佢對中文科總體成績嘅關鍵性作用。但同學千祈唔好畀佢嚇窒，因為比起卷二中文作文，閱讀理解已經算係可以喺短期內透過技巧同操練提升成績嘅考卷。 歷年 DSE Cut Off 等級 2021/79 (%) 2020/85 (%) 2019/88 (%) 2018/100 (%) 2017/90 (%) 2016/84 (%) 2015/86 (%) 2014/86 (%) 2013/92 (%) 5** 54 (68) 56 (66) 59 (67) 71 (71) 57 (63) 51 (61) 50 (58) 49 (57) 52 (57) 5* 51 (64) 54 (64) 55 (63) 67 (67) 52 (58) 48 (57) 47 (55) 46 (54) 47 (51) 5 48 (60) 50 (59) 52 (59) 63 (63) 49 (54) 47 (56) 45 (52) 44 (51) 44 (48) 4 44 (55) 44 (52) 46 (52) 56 (56) 43 (48) 40 (48) 38 (44) 37 (43) 38 (41) 3 38 (48) 37 (44) 40 (46) 50 (50) 38 (42) 36 (43) 33 (38) 32 (37) 32 (35) 2 34 (43) 31 (37) 33 (38) 47 (47) 31 (34) 29 (35) 27 (31) 25 (29) 25 (27) 以上 DSE Cut Off 數據可以睇到，近年加入十二篇範文嘅考核後，中文卷一高分段嘅 cut off 有明顯上升。 當中原因就係，高分段嘅同學仔對於12篇範文掌握程度較高，喺甲部獲取嘅分數亦相對較高，所以整體卷一嘅高分段 cut off 提升咗。 去到呢度，相信大家都明白熟習十二篇範文係同學向高分段衝刺嘅必經之路。 中文卷一時間分配 甲部十二篇範文 (文言指定篇章) 15-20 分鐘 乙部文言文 <20 分鐘 乙部白話文 50 分鐘 卷一甲部：十二篇範文 千祈唔好喺呢度浪費太多時間，答案要簡而精，直中問題中心，唔好同題目糾纏。呢一部分最理想係用 15-20 分鐘內完成，你要留返足夠嘅時間畀往後嘅文言文及白話文。 卷一乙部：文言文 建議同學做咗文言文部分先，其實文言文嘅題目類型比較淺白直接，好多都只係要求同學喺原文句子中搵答案，然後再將佢譯成白話作答。文言文呢一部分最多只可用 20 分鐘完成。 卷一乙部：白話文 剩餘嘅 50 分鐘全部用喺白話文，因為白話文嘅題目篇幅以及閱讀材料都相對較長，需要更多時間去完成。 中文卷一甲部：十二篇範文 (技巧及溫習重點) 首先，我哋可以將12篇範文分為以下4大類，可以幫助各位掌握考核及溫習重點。 4 類範文考核及溫習重點 人物傳記 範文：《廉頗藺相如列傳》 人物傳記主要透過記敘事件刻畫人物嘅性格特徵，以塑造人物形象。傳記可以為以「第一人稱」為主角嘅自傳，亦可以好似〈廉頗藺相如列傳〉，係由他人所寫嘅人物傳記，以第三人稱記敘同人物相關嘅事情發生。 譬如《廉頗藺相如列傳》一文中，作者透過完璧歸趙嘅故事，突出藺相如嘅機敏勇敢；又以「負荊請罪」嘅故事刻畫廉頗勇於認錯嘅形象。 遊記 範文：《岳陽樓記》、《始得西山宴遊記》 作者一般會透過寫作遊歷過程中嘅所見所聞，借景抒情，帶出自己嘅志向同埋觀點。 《岳陽樓記》中，作者透過描寫岳陽樓嘅景色，帶出「不以物喜，不以己悲」嘅高尚情操，以追隨古仁人為目標，藉以勉勵自己同埋好友滕子京。 喺《始得西山宴遊記》中，柳宗元以遊山玩水嘅方式排解憂鬱，最終喺發現西山後豁然開朗。佢藉記敘前往西山嘅過程，以及描寫西山之上所看見嘅景色，以西山自況，表達自己不願與世俗同流合污嘅心志。寧願同大自然融為一體，達致物我兩忘嘅境界。 詩詞 範文：詩三首：《山居秋暝》、《月下獨酌》、《登樓》；詞三首：《念奴嬌．赤壁懷古》、《聲聲慢．秋情》、《青玉案．元夕》 作者一般會選擇喺詩詞中描寫景物，再藉此回憶過去或展望未來，帶出自己嘅感受。因此詩詞中最重要嘅係知道作者從中表達嘅「情」，以及作者喺該首詩詞中透過乜嘢景物帶出自己嘅感情。 論說文章 範文：《師說》、《勸學》、《六國論》 對於論說文而言，最重要嘅就係中心論點、分論點、論證過程及論據。十二篇章中嘅議論文亦如是，考生須掌握論說文中作者嘅主要觀點，例如《師說》就係「學者必有師」；《勸學》嘅中心論點就係「學不可以已」；《六國論》嘅中心論點就係「六國破滅，非兵不利，戰不善，弊在賂秦」。 清楚作者嘅中心論點後，就要溫習作者點樣論證中心論點嘅合理性，亦要記得作者選用咗邊啲例子去增強文章嘅說服力。 十二篇範文需要背誦原文嗎？ 好多同學仔都會問，係唔係必須背誦原文？答案係肯定嘅，但係同學需要有技巧咁背，因為需要同學引錄原文嘅題目唔多，如果你自問範文嘅內容思想，手法運用等都未掌握好，就唔好將時間全部傾注喺背文句上面啦！ 同學可以首先背誦同文章要旨、論點有直接關連嘅文句先，詩三首、詞三首亦都建議同學全部背誦。 延伸閱讀：【八篇建議篇章】DSE中文建議篇章攻略（溫習內容+詳細技巧） 掌握文章結構、文章主要內容 呢一部分係考評局出範文問答嘅主要來源，同學必須清楚記得每一篇文章嘅結構，以及文章每一部分嘅主要內容。而家就教大家疏理文章結構同主要內容。 同學可以將呢12篇範文分為議論文，抒情文，敘事描寫文三類。 議論文體：留意文章嘅中心論點、分論點，以及文章所運用嘅論據同論證手法。 抒情文體：注意文章係借事抒情定借景抒情，要清楚文章係點樣透過事/景去抒發感情。 敘事描寫：清楚文章嘅敘事脈絡，了解文章點樣透過唔同事件去反映唔同人物嘅性格。 剩低嘅詩詞類範文，承接上文所講背誦原文嘅重要性，詩詞更加係必須背誦，要清楚每一個句子嘅意思，謹記作者透過詩詞表達嘅感情。 課文問答答題技巧 - 善用答題框架 到咗做題階段，就要記住唔同題型或提問詞所需要嘅答題框架。例如問論證手法嘅題目，答題框架一般係「論證手法名稱+文中內容如何運用該論證手法+突出論點」。大家要清楚了解該論證手法嘅定義，然後將該論證手法相關嘅文章內容，嵌入答題框架。 所以喺呢部分，了解唔同寫作手法以及修辭手法嘅基本定義，係解決課文問答嘅關鍵，係拯救仲攬住一大疊 notes 死記硬背嘅同學嘅救命稻草。因為，當你完全明白答題框架，又完全掌握文章嘅內容，你就可以唔需要強行背誦，都可以寫出滿分答案。 不同範文之間的比較閱讀題 呢一部分相對進階，考驗嘅係同學仔融會貫通嘅能力。但一般考核嘅重點都係每篇文章最重要嘅部分，例如主旨、中心論點，以及抒發感情之間嘅相似性。同學需要完全掌握每篇文章嘅中心思想、表達嘅感情，先可以順利完成呢類問答。 重要提醒：同學喺作答嘅時候，尤其係見到有比較性質嘅題目，必須要同時寫出兩者嘅相同特徵，並引用相關文章內容進行解釋，唔可以缺少其中一種，否則答案就會唔完整，唔可以拎晒全部分數！ 其實，DSE 中文範文真係一個準備充足就可以輕鬆搶分嘅環節，最重要嘅係多呢幾分就已經攞到Level 5以上嘅入場券！ 延伸閱讀：【十二篇範文】DSE中文範文溫習精讀筆記(內容+問答重點) 中文卷一乙部：文言文 (技巧及溫習重點) 掌握文字詞義、詞性 掌握文言文嘅唔同詞性有助於考生去推測文言句子中唔同字詞嘅詞義。文言文中嘅常見詞性包括代詞、副詞、助詞等虛詞（分類有爭議，此處不詳述），亦都有同學所熟悉嘅名詞、動詞、形容詞等實詞。 掌握呢方面嘅語法知識，見到文言句子，就可以更快咁反應到呢個詞語係乜嘢詞性，會唔會出現名詞作動詞用、動詞作形容詞用嘅情況？定係純粹係個冇特別意義嘅虛詞？例如「今王鼓樂於此」一句，如果有意識到「鼓」字喺該句係名詞作動詞用，先可以更加準確咁，將個「鼓」字亦作敲擊，而唔係「鼓（樂器）」或其他奇怪嘅譯法。 語譯 語譯係文言文入面必考嘅題型，因此絕對唔可以忽視。除咗要靠平時積累多啲唔同嘅文言字詞，亦要學識文言文嘅句式結構、唔同嘅詞性幫助自己推測陌生詞彙嘅意思，過程中唔好怕錯。 好多同學可能喺唔識譯之後就成題放棄，或者畀一個唔識嘅字詞嚇一嚇，就覺得篇文好難，後文都唔識解。但其實就算唔識，用邏輯推理猜測下，將可能嘅結果寫入去，唔好怕錯，亦有機會答啱。 而且經過思考再寫落去嘅文言解釋，對自己嚟講都係尤其印象深刻，下次見到都會識得用返，所以語譯唔好怕錯都係好重要嘅一點。 當然，除咗唔好怕錯，喺考試度要用邏輯靠上下文去幫助語譯之外，更加好嘅方式就係平時提前做準備，多啲睇文言文，睇之餘亦都可以喺隔離寫低自己嘅白話文語譯，最後再上網睇返其他人嘅譯文，幫自己創造一個文言文嘅語境。 當平時累積咗足夠多嘅語譯經驗嘅時候，考試嗰陣自然就手到擒來啦。而同時，同學亦應該多啲學習文言嘅語法特點，對於我哋面對詞彙量不足，需要推測文意嘅時候，語法分析將會有好大幫助。 中文卷一乙部：白話文 (技巧及溫習重點) 分段、段落大意 呢種係分數最多，但同學最無信心完成嘅題目。每年同學從中得到嘅分數都會偏低。 原因有兩個： 唔識分段嘅技巧，唔識分析文章段落間嘅聯繫，導致分段部分已經炒咗車。 唔識概括文章內容，搵唔到每一個層次嘅敘事脈絡，甚至唔知道段意嘅範式。 畀同學嘅建議： 分段方面，要先學識喺每一段入面搵關鍵字，可能係嗰一段出現嘅人物，亦可以係嗰一段嘅論述對象，然後再睇返下一段有無類似嘅關鍵字。 其次，如果係敘事性文章，可以根據事情發展嘅起承轉合嚟分開唔同部分；又可以根據時間、地點、主要人物嘅轉變嚟分開唔同嘅部分。 再者，如果係議論文，就根據唔同嘅分論點嚟將文章分開唔同部分。 當然，我哋為一篇文章去劃分結構段，其實係理解該文佈局嘅過程，換言之，同學對於寫作手段嘅全面掌握，譬如文段嘅結構作用、寫作手法等，都會影響到我哋理解作者點樣就住大小層次逐層論述或者抒情。 內容大意方面，要記住一點：記住唔同文體嘅內容大意格式係唔一樣嘅。但一般中文卷一會喺表格部分提供一個例子，所以同學緊記要跟返佢所畀例子嘅格式寫，唔好自由發揮。當然呢部分都可以提前準備一下，通過對Past Paper嘅整理，同學亦可以預先整理好一套答題框架，配合文章嘅唔同體裁，以唔同嘅措詞同框架歸納段意。譬如係，段落大意一般佔三分，咁即係要有三個攞分關鍵位。 記敘抒情文嘅段意概括公式可以係：「作者在段落中記敘之事 + 事件細節（時地人）+ 作者在段落中流露出嘅情感。」 議論文嘅段意概括公式可以係：「作者嘅論點 + 作者嘅例子 + 解釋例子如何論證作者觀點。」 呢個公式唔一定每一個分段嘅段落概括都適用，但至少有一半以上都可以套用呢個模板去概括。其實段落大意都係睇分數做人，如果該段段落大意佔三分，淨係寫兩個重點，邊有可能拎得齊分數？如果寫字速度夠快，又唔確定自己嘅概括係咪足夠精確，寫多兩句作大包圍其實都無妨。 其次，要識得揾中心句，如果某一段冇一個清晰嘅中心句，就可以透過人物、時間、地點呢啲敘事要素去搵返嗰個層次嘅主線出嚟。而歸納嘅時候，同學必須注意，一個自然段可以包涵多過一個層次嘅內容，歸納必須精準而全面。 寫作手法、修辭手法 呢一類問答係需要同學對各種寫作手法以及修辭手法有深入而透徹嘅理解，因爲理解咗手法先會知道自己要喺閲讀材料入面搵啲咩。記熟唔同手法嘅定義，為你答題提供一個框架，方便你將閲讀材料入面嘅相關內容填返入個框架度。緊記一定要引用文本為依據，唔可以空口講白話！ 同時，同學亦要記得修辭手法嘅唔同定義，先至可以準確分辨到作者用咗乜嘢手法，答啱左先可以再論佢嘅作用，所以定義一定要熟記。 同樣，唔同修辭手法喺文章入面嘅作用都要記得，每個修辭手法之所以會用喺文章度一定有佢嘅深意。考同學分辨作者用咗乜嘢修辭手法、有乜目的都係卷一入面幾乎年年都出嘅題目。 同學可以提早為呢類型題目作準備，背誦哂各種修辭手法嘅大概作用，再喺題目中套用考試篇章嘅內容作解釋，基本上就可以穩攞修辭手法作用嘅幾分。 以下係 DSE 常考嘅修辭手法定義同作用例子： 修辭手法 定義 作用 比喻 根據事物的相似之處，把某一件事物比作另一事物。 把抽象的事物具體化，將深奧的道理變得淺白。 比擬 分為擬人以及擬物。擬人：把物件當作人來寫，賦予人的思想、性格和行為特徵。擬物：把人當作物件/動物來寫，或把某物件當作另一物件來寫，賦予另一物件的特徵。 移情於物，可使描繪的物件「人格化」，形象更生動。啟發想像，使文章更活潑有趣。 排比 把三句或以上結構相同，意思相見、字數相若的句子，排列在一起。 形成節奏感，增強氣勢。強調內容，以表達強烈的感情。 襯托 以相似或相反的事物襯出本體。正襯：以特點相似的事物襯托本體。反襯：以特點相反的事物襯托本體。 突出本體，使描繪的事物形象更鮮明。 反語 字面上的意思故意與實際表達的意思相反。 吸引讀者注意力，製造幽默效果。揭露弊端，製造諷刺效果，表達強烈不滿或憤慨之情。 借代 在沒有本體和喻詞的情況下，直接以一個能夠代表本體的東西去替代本體。 使語言簡潔具體，生動且形象化，能夠喚起讀者的聯想。 誇飾/誇張 強調或突出對象在某方面的特性，可以是誇大、縮小或時間線上的超前誇張。 體現了作者強烈和豐富的感情或感受。 雙關 同一個句子中隱藏兩個層面的意思，一個可能是現實中的表象，一個可能是作者隱藏在內心的感受。有時一語相關亦可收諷刺之效。 令語言產生風趣幽默，有生動活潑的效果，同時可令表達更含蓄。 通感 用不同的感官寫其他感官所接收的訊息，例如將視覺所見形容作味覺，將聽覺所聽見的描寫以視覺寫出。 朱 自 清 《 荷 塘 月 色 》 ： 「 微 風 過 處 ， 送 來 縷 縷 清 香 ， 彷 彿 遠 處 高 樓 上 渺 茫 的 歌 聲 似 的 。 」 這句便是用隱約的樂聲（聽覺）去形容清香的縹緲（嗅覺）。 （有時通感會和比喻一同出現。） 透過豐富生動的接觸，使抽象、難以形容的事物、情感得以形象化，加強感染力。 延伸閱讀：DSE 中文修辭手法大全 進階題型 - 綜合全文題目 呢類問答一般會問文章嘅主旨，例如全文所抒發嘅感情、貫穿全文線索嘅象徵意義等。呢類題目分數一般較高，需要同學寫嘅要點亦相對較多。 同學首先要搵返題目入面嘅關鍵詞，例如文章嘅線索又或者一啲同感情表達相關嘅字眼，然後喺閲讀材料度搵返有出現相關字眼嘅段落，再從中篩選同題目有關嘅內容，咁樣就可以避免因爲睇漏咗相關內容而錯過要點。 進階題型 - 換詞語類題目 換詞語？ 即係問「如果將原文某個詞語換成其他詞語，表達效果是否更佳？」。 呢種題目第一步已經要寫出原本詞語同埋替換詞語嘅準確意思，對於中文底子較弱嘅同學嚟講，佢哋好難會寫到一個詞語嘅準確意思。而詞語意思上面嘅微細差異，好多時就係關鍵嘅比較點，所以會要求同學有一定嘅中文底子。 再者，要結合文章嘅語境進行分析，簡單嚟講，就係要去理解詞語所在嘅句子，甚至係上下一兩句句子都要睇埋，然後透過引用返文本內容去解釋語境，再分析原文詞語喺表達語境上面嘅作用，再同題目畀出嘅詞語作比較，一般比較得出嘅結論都係題目詞語唔可以準確表達出原文嘅意思。 「可唔可以答同意替換原文詞語？」 唔係100%唔可以，但係會比答不同意嘅難度大一百倍！ 因為，我哋嘅固有認知就係作者寫落去嘅文辭一定係最佳選項。考評局所選取嘅閲讀材料都係來自早已成名嘅作家，佢哋寫出來嘅文章係經過多年嘅歷練，遣詞造句嘅功力都係經過千錘百煉，所以佢哋會選擇嗰個詞語一定有原因。 不過都唔係100%唔可以挑戰佢哋嘅遣詞造句，但可能要寫返篇論文，追溯到語言學呢啲層面了......其實我哋嘅目標都係拎返個高分姐，咁就唔好為自己嘅人生增加難度啦~ DSE 中文閱讀理解操練技巧 按文體操練 Past Paper 因為每年 Past Paper 都有唔同文體，會牽涉唔同嘅寫作手法、解題框架。如果大雜燴咁一齊操練，有可能會令自己混淆唔同嘅解題框架。 所以建議同學將 Past Paper 嘅文本內容分成議論文同埋敘事抒情文兩大類，然後再分開操練。令自己先集中掌握一種文體嘅解題技巧，再去操練其他文體，按部就班咁鞏固解題技巧係最有效益嘅溫書方法。 詳細理解文本內容 其實一篇閲讀材料會有好多可以出題嘅位置，但由於閱讀卷篇幅有限，所以有好多位置都無機會出喺卷度畀大家作答，但唔代表唔係重點。所以，做完 Past Paper 嘅題目之後，都要再睇返文章，睇下自己有無乜嘢位置仲未十分了解，再細讀文章，解決呢個疑慮。呢個練習絕對可以令你對文本理解能力大大提升！ 善用 Marking Scheme 考評局出嘅 Marking Scheme 最有參考價值嘅位就係文本依據，仲有對文本依據嘅分析。同學如果試下研究，就會發現好多答案其實都係從閲讀材料所得，得分點都基本存在喺文本依據入面。 Marking Scheme 入面嘅文本依據，其實就係話畀同學聽邊度可以搵到答案，以及特定提問詞需要喺邊個位置搵答案。識得跟住 Marking Scheme 搵答案，就等同如虎添翼。 不過，考評局畀出嘅參考答案好多時都係經過重述，好難喺入面搵到文本字句嘅影子，然後就會畀同學一種「答案要靠自己創作出來」嘅錯覺，亦唔會知道個答案係點建構出嚟。所以，睇參考答案係睇考評局點樣建構答案，睇返答案嘅句子結構，對往後答題好有幫助。 今日呢篇文，希望可以幫助同學理解甲部十二篇範文、乙部文言文/白話文題型嘅出題思路同練習方法！
