【德望學校 Good Hope School】名校專訪系列 - 黃大仙區「一條龍」直資英文女校

AfterSchool
AfterSchool 2020-10-5 2,204

【德望學校 Good Hope School】名校專訪系列 - 黃大仙區「一條龍」直資英文女校

德望學校(ghs)一直為傳統名校,由幼稚園、小學到中學分部都受唔少家長青睞。除咗banding之外,今日AfterSchool同大家一齊睇下佢嘅歷史、教學方式同其他特點,幫大家更全面了解德望!

提到德望,好多人都會諗起佢學生出色嘅學業成績,或者標誌性嘅綠色校裙。提提大家,德望並冇參加教育局的「中學學位分配辦法」,而佢2020年中一收生階段自訂為10月10號至30號。對德望有興趣嘅你,快啲趁呢個機會了解多啲啦!

 

學校簡介

黃大仙區嘅德望中學(Good Hope School) 創立於1954年,係一間Band 1A嘅直資天主教女校。由加拿大聖母無原罪傳教女修會創辦,設有中學部、小學部同幼稚園部,即俗稱「一條龍」嘅架構。學費方面,中一至中三每年嘅學費為$35,000,而高年級每年則為$45,000,分十期繳交。同其他 59 間直資中學比較,都唔算特別平㗎~

 

德望係傳統名校之一,分別喺2013年和2018年誕生一名超級狀元同狀元,喺2018年更有學生被選為香港傑出學生!課外活動方面,學校喺校際音樂、朗誦節同田徑比賽等比賽都表現突出。其中唔少得嘅就係有成六十年歷史嘅德望學校合唱團,除咗喺本地同海外唔同嘅音樂比賽中奪魁,去年五月更衝出香港,喺只有由大會邀請先有資格參加嘅「第四十屆保加利亞瓦爾納國際五月合唱比賽」中參勇奪四個大獎,包括全場總冠軍!

 

地址:九龍牛池灣清水灣道303號(中學部)

           九龍牛池灣扎山道381及383號(小學暨幼稚園)

 

歷史背景

德望呢個名聽落相當典雅,但其實點黎?喺二十年代,「聖母無原罪傳教女修會」(The Missionary Sisters of the Immaculate Conception)開辦第一間學校——德信學校。去到五十年代,香港經歷難民潮,政府希望辦多啲教育事業,於是應政府鼓勵下,決定開辦第二間學校——德望學校。由於天主教強調「信、望、愛」三大德行,第一間學校名為「德信」,第二間就命名為「德望」。到了七十年代,仲喺同佢區開辦咗「德愛中學」!

 

學校價值觀方面,學校注重培育學生品德,強調學會做人比成績更重要。德望的價值觀包括「愛、希望、喜悅、感恩」,其實並唔係亂排㗎!修女會會祖Mother Délia認為,世界有愛,就有希望,有希望就有喜樂。學校希望每位學生都可以秉持呢幾項價值,畢業後會懂得感恩,回饋母校同社會。

 

雖然德望係一間女校,但其實曾經喺1975年左右接收過男學生㗎~當時學校為私立,學費比較貴,同時又開辦中六,所以就多咗學位接收男學生。直到約八十年代,德望先轉做女校。所以喺1976年學生會合照內,可以見到左上角有兩位男同學添!

(資料來源:明周文化)

 

教學模式

德望著重營造英語學校環境,所以除咗中文、中國文學及中國歷史由中文授課外,其他科目都係以英文授課。學校亦聘請多名外籍教師,更全面提升學生英語水平。

 

另外,初中(中一至中三)同高中(中四至中六)所開設嘅科目都唔同。低年級嘅科目包括中國歷史、中國語文、倫理及天主教教育、化學、商業與經濟、地理、數學、歷史、物理、生物、科技與生活、綜合科學、英國文學、英國語文、視覺藝術、信息及通訊科技、通識教育、音樂、體育、法文、德文、專題研習;而高年級嘅就多咗倫理與宗教、數學延伸單元修讀,不過就少咗德文同法文學啦~

 

近年STEM 教育為勢所趨,即係科學(Science)、科技(Technology)、工程(Engineering)及數學(Mathematics)。與別不同嘅係,德望學校加入藝術(Art)和設計元素,成為「STEAM」,因為校長認為德望女生數理能力強,唔會比男生仔遜色,希望藉此可以令科技變得更有趣、加強女學生對科學嘅興趣。為此,該校老師更遠赴澳洲取經,探討當地學校點樣實行 STEAM 教育。依家德望將STEAM 教育喺專題研習上施行,例如俾學生研究同製作針對唔同人士需要嘅飛機艙、餐飲和椅子設計,認真活學活用!

音樂科方面,學校除咗設有合唱團,亦有管弦樂團同中樂團,啱曬學生對音樂唔同範疇嘅興趣。另外,德望喺體育方面同樣做得出色。學校體育課程的涵蓋範圍十分廣泛,除咗唔同嘅球類活動之外,更有跳舞、體操、射箭,甚至障礙賽、跳彈牀等等,幾乎每一種運動都有。難怪培養到俞雅欣、姚潔貞呢兩位傑出運動選手!

 

師資和教育配套

師資方面,目前德望教學人員約有 110 人,大部分都係學士同教育文憑畢業,當中喺2015年2004年更分別有7位同5位老師榮獲頒行政長官卓越教學獎,師資水平獲得一定肯定!而喺將近170位老師和非教職員中,有十九位都係舊生。佢哋畢業後,仍返嚟作育下一代、回報當年母校之恩,真係體現咗德望價值觀裏嘅最後一樣——感恩!
 

(資料來源:Schooland)

 

德望全校共有 36 班,而位於清水灣嘅校舍則佔地約13,676平方米。除咗課室、室內外操場同禮堂之外,仲有游泳池、科學實驗室、圖書館、閱讀室、多媒體學習中心、音樂室、視覺藝術室、科技及生活室、戲劇室、宗教室、學生共用空間、升學及就業輔導室、社工室、飯堂及校園電視室。設施咁齊備,相信可以幫到學生進行全人教育、發掘更多天賦潛能。

 

收生程序

德望身為一間Band 1A嘅名校中學,入學競爭自然大。德望除咗中學部,亦設有幼兒園及暨小學部,為私立學校。該校學生喺升中嘅時候可以獲得優先考慮,但同樣需要經過面試,每年亦有大部分學生由小學部直升至中學部。不過就算子女唔係就讀德望嘅幼稚園同小學,亦唔需要灰心!德望中小其實雖然係直屬關係,但都唔係百分百直升,校方亦表明唔會劃分特定數目嘅學額予德望學校小學部學生。

 

申請之前,家長不妨先上校網睇一睇佢嘅中一收生條件同程序。德望收生大致分兩輪遴選機制,初步遴選就係睇學生嘅個人履歷,佔75%,當中學業成績同操行、課外活動就各佔50%同25%;通過初步遴選嘅學生就會獲邀參加兩輪面試,比重佔25%。今年入圍嘅學生,就會喺12月23號或之前會收到通知!

 

第一輪面試需要以英文同普通話作答,主要係測試解難同溝通技巧,有家長就透露老師會俾一張題目咭學生,等佢哋先就主題思考一下,然後就有關題目發揮。校長Mrs. Laura Green表示希望招收到反應快同有創意嘅學生,對唔為面試而準備「完美答案」嘅學生最感興趣。所以家長毋需幫囡囡設計埋答案,等佢哋自由發揮最好!而第二輪面試就由係同校長、副校長同其他老師會面,主要都係傾吓計,例如家庭旅行嘅經驗,或是學習心得等。

 

相關新聞/評價

德望校風良好,好少有對學生負面嘅評價。不過喺2010年就曾經爆出過「審計風波」,被揭發行政同財政上嘅管理混亂:包括冇跟隨教育署指引,將剩餘款項做定期或儲蓄存款,而係將部份款項用作投資;又以股東名義,向一間有限公司借出二十五萬多,當中有二十萬係「償還無期」。另外,學校亦被發現無用報價或招標方式甄選食物部營辦商,更一度將幾項未經認可開支項目,記入政府經費帳。

 

不過與此同時,亦唔難搵到關於德望學生喺體育、藝術等各比賽中奪取佳績嘅新聞。今年好多中一入學申請講座因為疫情而取消,對德望有興趣嘅家長,希望呢篇文幫到你地了解多啲德望啦!

 

***小編私心介紹「溫書好地方

唔知大家對溫書嘅環境有冇要求呢?小編自己就幾高要求嘅!想當年,為咗享受一個安靜舒適嘅溫書環境,小編真係行遍港九新界。

不過大家唔使學小編周圍走啦,因為你哋好好彩,小編近排發掘到一個非常正嘅溫書地方,準備同大家開心 share 下!(慳翻啲時間溫書啦~)

除咗去圖書館自修室、cafe 之外,大家其實可以去 focus 溫書!focus 位於旺角彌敦道,交通位置非常方便。除咗基本設施同服務 (e.g. 無限 Wi-Fi、獨立充電位),佢哋仲會提供打印服務、零食、飲品同埋即磨咖啡!呢個共用空間為大家喺旺角鬧市入面,提供一個寧靜嘅空間集中工作、自修,又或者放鬆休息下

P.S. 佢哋而家做緊「首次體驗優惠」,平時仲有學生優惠,價錢非常抵,大家真係要去試下!(詳情可以去 focus 官網睇睇)


獲取首次體驗優惠

免費 DSE 電子報
定期為 30,000+ 中學生送上實用 DSE 資訊和資源
AfterSchool

AfterSchool