【DSE Past Paper】DSE/CE/AL English Past Paper 免費下載

AfterSchool
AfterSchool 2020年07月29日
AfterSchool今日為大家搜集哂歷屆英文Past Paper(CE A-Level DSE都有)!想及早備戰DSE?除咗溫習筆記,唔好忘記操練Past Paper熟習答題技巧都好重要!

DSE英文成績對於入大學甚至將來出嚟搵工都好重要,如果想考好DSE英文,DSE考生們可以透過操練Past Paper去熟習答題技巧 !但邊到先可以搵到最新最齊嘅DSE English Past Paper呢?AfterSchool為大家搜集咗歷屆嘅HKDSE 香港中學文憑試、HKCEE 會考、A Level 高考嘅Past Paper網上資源 ,包括卷一 Paper 1 Reading、卷二 Paper 2 Writing、卷三 Paper 3 Listening & Integrated Skills、卷四 Paper 4 Speaking,另外仲有小編嘅溫書心得同埋操卷攻略,去幫助你哋去拎DSE英文5**!

HKDSE English 英文考核要求

同學需要喺DSE英文科應考嘅四份卷,分別係:

  1. Paper 1 (Reading) Weighting : 20%,考試時間為1小時30分鐘
  2. Paper 2 (Writing) Weighting:  25%,考試時間為2小時
  3. Paper 3 (Listening & Integrated Skills) Weighting: 30%,考試時間約為2小時(實際卷長可能會受試場因素影響);
  4. Paper 4 (Speaking) Weighting: 10%,考試時間約為20分鐘

而英文卷同中文卷都係一樣有SBA,日夜校學生需要交SBA校本評核,SBA佔全科分數15%。自修生無須進行SBA校本評核,自修生SBA嘅分數係根據你英文科DSE考試所得個level,然後再睇全香港考生同你考相同level嘅人嘅SBA分數,再作調整之後,就係你SBA個分。

而喺DSE英文科入面,卷一閱讀理解、卷二寫作、卷三聆聽及綜合都有分Part A同埋Part B;而卷一閱讀理解同卷三聆聽及綜合嘅Part B仲有分B1同B2部分。記住,同學只需要應考Part A (必答)同埋選擇作答 Part B1 或者 Part B2。

B1同B2有咩分別呢?相對而言,B1比B2更加簡單,但係答B1嘅同學要注意,你就算全卷答啱曬都好,你最高只會攞到Level 4;相反你答B2最高就可以攞到5**。不過講到尾,同學應該按照自己嘅能力選擇翻合適嘅試卷。

同學係唔需要B1同B2同時作答,你交卷都淨係交B1或者B2其中一份㗎咋!英文卷操練都係有方法㗎!所以同學唔好淨係盲目咁操練、答題改題啊!

HKDSE English 英文 Past Paper 連答案

以下小編幫大家搵嘅HKDSE英文2012 - 2019 年嘅Past Paper(2020年仲更新緊),有齊哂HKDSE English Paper 1、Paper 2、Paper 3、Paper 4嘅歷屆試題,仲有埋marking scheme㖭,歡迎同學下載〜

HKDSE 英文 Sample paper連答案

由於2012年係第一年HKDSE,考生冇其他試卷參考,於是考評局就設計咗Sample Paper同Practice Paper各一份,畀考生知道DSE考試模式同作答框架,呢兩份卷有哂Paper1-4同埋marking scheme,直至今時今日都仲有參考價值㗎!

HKDSE English 英文 Practice Paper 連答案

HKALE English 英文 Past Paper

除咗DSE Past Paper之外,小編都建議大家可以預留少少時間去做A-Level嘅卷,喺DSE出現之前,AL係當年中七學生考大學嘅公開試,難度會比DSE更困難,但有可能會出現唔再屬於HKDSE英文考試嘅試題(out-syllabus),所以建議同學應儘量揀翻2006-2012年嘅試卷嚟做,會比較貼近DSE嘅考試模式同題型。如果同學有時間、或者想挑戰一下自己能力,都可以選擇操練淨低嘅年份。

HKCEE English 英文 Past Paper

如果同學做哂DSE同AL嘅Past Paper,仲可以操埋HKCEE嘅卷,CE(中五會考)係用嚟篩選有能力嘅中五學生繼續升上中六。同DSE相比,CE嘅Past Paper會對一眾想喺DSE揀做Part B1嘅同學較為有參考價值。同學可以先操練咗2006-2011年嘅CE Reading Paper先,然後先再做Listening同Writing卷。

註:以上嘅 Past Paper 資源轉自其他嘅網頁,AfterSchool 並非相關資源嘅持有人。

溫習DSE英文小貼士及操卷攻略

好多同學都唔知點樣溫英文呢一科以及唔知應該由邊到落手,令到溫習英文科成為一眾考生好困擾嘅事。想當年小編為咗DSE English都下咗唔少苦功,今日就同大家分享吓小編當年係點溫英文啦。

DSE English Paper 1: Reading

小編嗰陣不斷做Reading Paper,做完DSE就會做CE/AL,甚至係其他出版社嘅material。千祈唔好做完份試卷求其剔完答案就算呀,記得每次對卷嘅時候除咗對答案之外,仲要睇吓自己失分嘅地方、點解錯、以及自己同考評局嘅標準答案有咩出入,慢慢你就會捉到考評局想你點答㗎啦〜

小編都有一個貼士,可以幫大家喺做Reading卷嘅時候更快更準。同學喺正式睇文章之前,先快速睇一次題目,而大概估到篇文想講啲咩。而喺閱讀文章嘅時候,可以用唔同顏色嘅螢光筆highlight一啲專有詞(例如人名、數字、組織名等等)同埋特別難嘅字,因為呢啲字有機會係之後問題嘅答案,到時就唔洗嘥時間喺篇文到搵答案。

除咗平時操卷,建議大家睇多啲英文新聞(SCMP、BBC、The New York Times)同埋課外書,雖然一開始會睇得好慢,但只要持之以恆慢慢就可以改善閱謮嘅速度同埋語感。

正如上面都有提及,AL會比CE難而且程度同DSE相若,而AL會比較著重喺Grammar同語感,所以題目大多數都會係summary close同MC題。建議同學可以做咗DSE Past Paper先,然後做2005-2011年嘅AL(幫大家加強語感同理解文章嘅能力),有時間(或者能力相對低嘅同學)可以再選擇做CE Past Paper。

DSE English Paper 2: Writing

小編都試過喺作文嘅時候會格梗塞一啲好難嘅英文字,以為會有豐富詞彙之效,篇文會好靚同埋可以從中加分。的而且確,如果我哋用啱字嘅話,係可以令到篇文嘅質素有所提升。但如果用錯嘅話,會令到考官對文章嘅印象唔好,就好似早幾年好多人都鐘意用“Every cloud has a silver lining”,有機會令到篇文章被扣分,就真係弄巧反拙㗎啦!所以小編建議大家可以整一本vocab book,閱讀嘅時候寫低你唔識嘅英文字佢嘅中英文解釋、part of speech、例句。當你每一日都攞呢本vocab book複習嘅時候,你嘅詞彙就會越來越多,亦都會更加清楚呢個字到底係乜場合先啱用。

仲有一個攻略係,想當年小編每個禮拜都會作兩篇文比英文老師或者係補習老師批改,之後佢哋會再同我講返篇文有啲咩可以改善,例如係唔通順嘅句子,用錯vocab等等。要留意嘅係學好英文科,由其係Writing都唔可以臨急抱佛腳,建議各位同學唔好等到中六先開始瘋狂作文,由中四開始就要keep住每個禮拜都作一篇文呢個習慣,相信三年之後會對你有一定嘅幫助。

至於操卷方面,除咗做DSE Past Paper之外,同學都可以考慮吓做每年CE Writing Paper嘅Task2 同AL Writing Past Paper,CE嘅Task 2要求考生寫250字,同DSE Task 1要求嘅250字以及題型相若,而AL四選一題目同DSE Task2嘅考試模式都好相似,所以小編認為同學可以以CE Task2 + AL四選一題目呢個組合操練。

DSE English Paper 3: Listening

小編認為溫習Listening最緊要係多聽,睇Netflix嘅時候試吓開英文字幕,甚至唔開subtitle,開頭會聽唔切或者聽唔明,但慢慢你就會跟到佢哋嘅語速以及聽得明唔同嘅accent。另外亦都建議大家可以去聽英文電台例如BBC radio,一路聽新聞一路默寫返新聞稿,可以訓練到你jot notes嘅速度㗎!

而係做卷方面,小編建議無論同學揀B1定B2,係Data File搵資料嘅時候都應該用唔同顏色嘅螢光筆間低重點字眼,同埋一啲專有名詞,可以幫你之後做嗰三個tasks都可以慳返啲時間。而時間分配方面建議同學應該按照分數比例去分配時間,平均喺25分鐘內完成一個task,如果字數同分數都多嘅話可以用35分鐘作答。

同學應該要操練哂DSE Past Paper先做AL同CE,CE Part A嘅難度會較為貼近DSE Part A頭三個tasks,而AL Part A因為語速較快同較多資料,難度會比較似DSE PartA後幾個tasks,同學可以由2006年做到2012年,建議同學做完CE再做AL,程度會慢慢加深。

DSE English Paper 4: Speaking

小編認為說話卷最重要嘅訓練方法就係日常生活要多講,試吓放膽同同學得閒用英文對話,練英文說話最緊要係唔好怯以及唔好驚講錯。想當年小編每次上自修堂,都會捉住同學練英文Speaking,久而久之變得唔再驚講英文。除此之外,同學亦都可以參加聯校說話練習,唔單止可以了解到其他學校嘅學生水準,仲可以知道自己喺說話方面有咩地方不足,例如係你嘅發音、Grammar同Vocabulary等等。

 

希望呢篇blog可以幫到大家搵到Past Paper之餘仲可以有少少溫英文嘅頭緒啦。而AfterSchool都有免費嘅DSE資源,除咗Past Paper之外都可以幫大家備戰DSE!搏盡無悔!