【DSE Past Paper】DSE/CE 中文Past Paper 免費下載

AfterSchool
AfterSchool 2020年07月30日
AfterSchool為大家搜集哂歷屆中文Chinese DSE同CE Past Paper,希望可以幫同學好好備戰DSE!

中文科一向被稱為「死亡之卷」,經歷過幾次嘅「大改革」之後唔少同學都嗌哂救命。呢個時候每位 DSE 考生最需要嘅就係透過操練Past Paper熟習答題技巧 !為咗幫你慳翻搵Past Paper嘅時間,AfterSchool今次就幫大家搜集哂全港 HKDSE 香港中學文憑試同HKCEE 會考嘅Past Paper網上資源, 涵蓋卷一 (閱讀)、卷二 (寫作)、卷三 (聆聽及綜合能力)、卷四 (說話),仲有marking scheme!

HKDSE 中文評核模式

考評局將DSE中文卷主要分為兩個部分:公開考試(DSE)+ 校本評核(SBA)。同學需要迎戰嘅有四份卷,包括:

  • 卷一(閱讀能力)佔全科24%,考試時間為1小時30分鐘;
  • 卷二(寫作能力)佔全科24%,考試時間為1小時30分鐘;
  • 卷三(聆聽及綜合能力)佔全科18%,考試時間約為1小時30分鐘(實際卷長可能會受試場因素影響);
  • 卷四(說話能力)佔全科14%,考試時間為25分鐘

校本評核(SBA)則有分為兩個部分。因為每間學校嘅校本評核方式都唔同,所以AfterSchool無法喺呢度詳細介紹,大致上會分為兩個部分:

  1. 必修部分:閱讀活動(佔全科6%的分數)
    閱讀活動並唔係每間學校都係一樣嘅,有啲會叫同學寫閱讀紀錄;有啲都會叫同學寫長達1000字左右閱讀報告。部分學校都會提供建議書單比同學~
  2. 選修部分(兩個單元)(兩個單元共佔全科14%的分數)
    1. 日常學習表現(通常都係計功課分)
    2. 單元終結表現

HKDSE 中文 Past Paper 連答案

以下係HKDSE中文 2012 - 2019 年嘅Past Paper,有哂中文科 卷一、卷二、卷三、卷四嘅歷屆試題,仲有埋marking scheme㖭,歡迎同學下載〜

HKDSE 中文 Sample paper 連答案

以下係考評局分別喺2012,2016同2018年出嘅Sample Paper同答案,目的係幫考生熟習試卷嘅新題型同模式,相信都可以幫到備戰DSE嘅大家。

* 2012年係第一年DSE,考評局為咗幫第一屆考生有參考,就準備咗呢份sample paper
* 2016年嘅卷三綜合能力,由卷三聆聽及卷五綜合結合而成。
* 2018年嘅卷一閱讀新增咗12篇文言文範文部分,佔試卷分數30%。

HKDSE 中文 Practice Paper 連答案 

考評局除咗有準備Sample Paper外,仲有準備Practice Paper同埋marking scheme俾一眾考生,以下分別係有2012同2016年Practice Paper連答案。

HKCEE 中文 Past Paper 連答案

如果同學做哂DSE Past Paper但仲想操多啲Past Paper鞏固自己嘅答題技巧嘅話,可以做埋CE啲試卷,佢嘅題型同模式其實同HKDSE都有好多類似嘅地方。以卷一為例,同樣有白話文同文言文嘅閱讀理解部分,識得做DSE嘅題目相信CE都難唔到你!

註:以上嘅 Past Paper 資源轉載自其他網頁,AfterSchool 並非相關資源嘅持有人。

溫習DSE中文小貼士及操卷攻略

數數手指原來小編同DSE相隔都已經有一段時間,但都希望以一個過來人嘅身份同同學分享吓自己當時溫中文嘅少少心得〜

DSE中文卷一:閱讀能力

做閱讀理解最重要係分配好時間,尤其卷一多咗範文部分,要喺1小時30分鐘之內做哂3 part確實會好趕。小編建議同學用20分鐘做哂範文部分,剩低嘅時間就按白話文同文言文嘅分數而分配。

小編強烈建議同學要溫熟範文部份,因為呢part只要溫熟佢嘅語譯,中心思想,論證手法等等就可以攞到分,呢30分絕對值得大家投放時間同心機落去。另外小編都明白唔少同學都會好驚面對範文同文言文,但要消除對文言文嘅恐懼最緊要係識得克服!小編個陣溫文言文係會用一本簿仔記低經常出現嘅古詞嘅意思同同義字,久而久之小編就會認得某幾個「老是常出現」嘅字,從而慢慢睇得明文言文同get到佢嘅主旨〜

除咗要溫文言文之外,小編建議同學每個星期都做一份閱讀卷,除咗可以幫你做好時間管理,仲可以幫你了解到考評局嘅評分準則。每做完一份試卷透過對答案,你可以捉到你失分嘅位喺邊同埋考評局畀分嘅原因,每次花呢少少嘅時間就可以幫到你提升你嘅答題技巧同得分。

小編建議同學嘅操卷順序應該係:DSE Past Paper中文閱讀卷→CE Past Paper→學校Past Paper→出版社閱讀試卷。DSE卷應該要全部做哂先,因為係考評局嘅官方試題,而CE Past Paper小編建議大家可以先做咗2007-2011年個啲先,因為2007年之前嘅CE閱讀卷同DSE出題模式有啲唔同,所以參考價值相對唔大,同學有多餘時間先再考慮操。

DSE中文卷二:寫作能力

想當年小編最唔鐘意做嘅卷就係寫作,因為平時冇閱讀嘅習慣令到自己文筆較差,但中六嗰年都堅持每個星期作一篇俾中文老師改,希望喺最短時間改善自己嘅文筆同表達能力。小編建議同學平時除咗睇多啲書,得閒都可能寫吓短文去紀錄低日常生活嘅大小事,相信一段時間後你嘅文筆都會有進步!

而喺試卷時間分配上,同學可以用5分鐘去畫吓mind map可以幫你組織文章結構,如果你想寫敍述文,你就要諗下文章嘅「起承轉合」同中心思想;想寫議論文嘅話要諗下文章嘅立場,每一段用咩論據同點樣論證。呢個方法可以幫你喺作文嘅時候冇咁易離題。

操卷嘅話,同學除咗DSE卷之外,CE嘅寫作卷都應該操埋,因為佢同DSE一樣都有議論文同敍情文嘅文章題型,而考評局CE同DSE寫作卷marking scheme嘅評分準則都差唔多,所以絕對做得過!

DSE中文卷三:聆聽及綜合能力

小編覺得綜合卷係一份好值得大家多溫習嘅卷,因為比較容易上到高分。小編溫呢份卷係會做哂Past Paper同其他免費模擬試卷,會對比自己嘅答案同5**作品,睇吓人哋喺作答嘅時候用咩角度切入,點樣用資料去支持自己嘅point。

雖然2016年開始DSE中文卷三同卷五合併,但兩份卷本質上都冇太大分別,所以小編都幾建議同學可以做埋2016年之前嘅Past Paper,可以俾自己練多啲綜合同聆聽技巧。

DSE中文卷四:說話能力

而說話方面,小編相對會放少啲心機落去,因為小編嘅中學每星期都會有兩堂說話堂,可以成日同唔同學一齊練說話。但小編都好建議同學可以去報聯校說話練習,可以從更多其他學校嘅學生身上學到佢哋思考論點嘅角度同說話技巧。正所謂「知己知彼,百戰百勝」,小編認為同人練說話係操說話最直接最有效嘅方法,當然同學日常生活都應該要睇多啲新聞去豐富自己嘅例子庫,喺適當時間拋出嚟用!

 

希望呢篇blog可以幫到大家搵到Past Paper之餘仲可以喺小編身上得到少少溫中文嘅頭緒啦。如果想攞埋其他科嘅Past Paper嘅話可以去【2020最新最齊】歷屆 DSE/CE/AL Past Paper 資源庫下載,另外AfterSchool都有免費嘅DSE資源,除咗Past Paper之外都可以幫大家備戰DSE!搏盡無悔!