【體裁是什麼?】中文常見白話文文體一覽!(初中至DSE適用)

文靜
文靜 2024-3-11 9,381
中文DSE常見體裁有好多種,除議論文、說明文、描寫文、抒情文、記敍文外,亦有論說文等合併文體,或實用文不同格式。AfterSchool帶你一次過學識所有文體,閱讀寫作輕鬆攞分!
「體裁」或者「文體」呢兩個詞語相信大家都唔陌生,乍聽之下可能會聯想起記敍文、說明文等字眼,但實際佢哋究竟代表緊咩意思?喺中學至DSE階段嘅中文科又需要認識幾多種體裁/文體?
AfterSchool為你帶嚟懶人包,列出所有DSE level需要學識嘅白話文文體種類,深入淺出說明唔同文體嘅特點,令你輕鬆掌握寫作閱讀技巧!
喺學習零散嘅新知識之前,有冇諗過需要先建立一個系統性嘅學習模式?我係文靜,多年來透過DSE中文補習幫助學生輕鬆取得大學入場券。想知道我嘅教學理念同往績,即撳:中文補習名師 文靜 | AfterSchool

「體裁」及「文體」定義意思

文章體裁即文體,因此「體裁」和「文體」所表述嘅都係同一事物,並無分別。文章體裁所指嘅係「文學作品分類範疇」,一篇作品所屬文類可以依其內容、風格、技巧以至篇幅來劃分。
喺中文嘅世界裡面,我哋可以先將文體分為「文言文文體」及「白話文文體」,當中白話文又分為「文章體裁」和「文學體裁」。文章體裁包括記敘文、說明文、議論文、實用文等;文學體裁則包括詩歌、小說、戲劇、散文等。
由於我哋呢篇文章係圍繞住DSE level,所以今次先將目標縮窄到「白話文文章體裁」部分!

DSE白話文文章體裁一覽

喺逐個文體仔細分析之前,先為大家整合好一個完整列表,溫書事半功倍!
白話文(文章體裁)
  1. 記敍文
  2. 描寫文
  3. 抒情文
  4. 議論文
  5. 說明文
  6. 論說文
  7. 實用文

文章體裁 與 寫作手法 的關係

由於文體係講緊各式文章嘅分類範疇,佢哋所需嘅元素同技巧都有所不同,所以為咗可以更好整合出唔同體裁嘅「寫作要點」,我哋會將某啲必需嘅特質或者可見嘅特質梳理出嚟,最後就變成大家成日講嘅「寫作手法」。
以下係一個簡單嘅配對表,如果大家想知道更多寫作手法嘅知識,可以撳呢到:【寫作手法完整列表】初中至DSE適用,6大寫作手法原來包括修辭手法?(含例子+技巧!)
白話文文章體裁 與 寫作手法 的關係
記敍文 ←→ 記敍手法
描寫文 ←→ 描寫手法
抒情文 ←→ 抒情手法
議論文 ←→ 議論手法
說明文 ←→ 說明手法
實用文 ←→ 注意:沒有實用手法!
其他:修辭手法

1. 記敍文(記叙文 / 記敘文)

記敘文係指通過事物發展嘅經過及人物言行嚟表達某一特定主題嘅文章。
就好似係攞住一部錄影機錄起一個故事,事後進行剪輯將內容按重要性刪減長短,再加入旁白令內容更完整。
就好似每個人小時候都可能寫過嘅「海洋公園一日遊」,無論係看圖作文定係自己嘅真實經歷,我哋一般會將比較深刻嘅情節如玩機動遊戲、同媽咪走失咗等橋段寫得詳細啲,至於點樣去海洋公園、食咗啲咩可能就只會輕輕帶過。但要注意嘅係,有啲資料雖然未必好「重要」,但卻係「必要」,就例如嗰日係咩日子,事件發生嘅大概時間等,因為呢啲係建築起完整故事世界觀嘅一部分,如果冇咗嘅話文章就會非常難以理解,亦未能帶到讀者投入你嘅文字之中。
如果想知道更多記敍手法技巧,可以即撳:【記敘手法大全】初中至 DSE 適用,必學記敍文叙事 7 要素!(含例子+判斷技巧)

2. 描寫文

描寫文係將描寫對象嘅形狀外貌、神情動態透過文字具體描繪出嚟,令人如聞其聲、如臨其境,增加真實感。
就好似係攞住一部相機對住人或事物影低相片/短片,然後仔細描述當中嘅特徵,令文字變成畫面,栩栩如生。
除咗描寫主體,我哋亦可以嘗試描寫周遭嘅人同物,從而突出主體嘅某啲特點,例如描寫寂靜嘅街道,突出自己沉重嘅背影(正面烘托);或者係熱鬧嘅酒吧(反面烘托)。
如果大家對中一二嘅作文有啲印象,相信都會記得寫過《XX眾生相》類型嘅文章,呢啲就係典型描寫文嘅例子,未必需要有某種中心思想或者心情想帶出,純粹利用文筆及描寫軌跡將觀眾帶入去嗰個場境入面,尤如帶咗VR眼鏡咁!
想知道點用五官描寫、肖像肖寫等高階描寫手法?即撳:【描寫手法大全】初中至 DSE 適用,描寫人/寫物/寫景一文看懂!(含例子+判斷技巧)

3. 抒情文

抒情文係作者將心中嘅主觀感受或思想感情抒發出嚟嘅表達方式,喺一般嘅文學作品同記敘文,甚至喺議論文和說明之中,亦經常將抒情技巧作為重要嘅輔助表達手段,運用佢嚟增強文章嘅感情渲染色彩。
就好比一首歌咁,講緊某個主題嘅故事,但點樣演繹就靠歌手嘅聲音語氣;文章同樣如此,無論描寫敍述緊一個點樣嘅故事,抒情都係最關鍵令情感昇華嘅一步。
《我的媽媽》大家一定有作過,想當初應該大部份人都係直接寫「我愛媽媽,因為......」,呢個表達方法其實完全冇問題,好多出名嘅作者都中意喺文章裡面使用,不過就會混搭住其他含蓄啲嘅方式去豐富成個感情,例如用「事件」、「物件」、「修辭」等,以避免感情流於表面,得個講字。
如果都係唔太明,不妨想像吓當你另一半問你愛唔愛佢嘅時候,如果淨係答「愛呀」分分鐘要跪地板,最起碼都要眼神誠懇、語氣真摯啦!由此可見除咗個中心思想,用唔同方面去營造呢個感情嘅厚度都係非常重要,呢啲先係有效嘅輔助手段,亦即係直接抒情同間接抒情搭配使用嘅好處!
想知道更多點樣利用文字間接地表達情感?可以即撳:【抒情手法大全】初中至 DSE 適用,借事/借物/緣情寫景/觸景生情好處一文看懂!(含例子+判斷技巧)

4. 議論文

議論文(説理文)係一種旨在剖析事理,論述事理,發表意見,提出主張嘅文體。作者通過將自己對事情嘅見解透過「講道理」、「辨是非」、「舉例子」等方式,樹立或否定某種主張。議論文一般要求內容要有明確觀點、充分論據、精煉語言、合理論證及嚴密邏輯性。
就好似辯論比賽咁,如果想以理服人,就需要首先好清楚咁講出自己嘅觀點,搵唔同嘅資料去正反佐證,甚至可以加入一啲情感字眼去加強說服力。
小編建議大家喺落筆之前一定要寫好作文大綱,列出自己會寫嘅論點,事關議論文好重視環環緊扣,以及論點與論點之間嘅過度有冇做到邏輯上嘅連繫,所以切忌心急落筆!如果大家覺得論點好難諗,可以試吓用由內到外嘅嘅框架去思考,由舊到新、小至大或平行方向去整理論點。例如:
  1. 個人、家庭/朋輩、社會、國家、世界
  2. 經濟、社會、環境、文化、政治、科技
  3. 個人內心世界、人與人相處、與大自然共處
  4. 古代/歷史,現代,未來
  5. 童年、學生/青少年、成年、老年
不過無論論點切入點有幾好都好,如果無強而有力嘅論證做支撐都係無用!想知道更多論證手法嘅知識及技巧?可以即撳:【議論論證手法大全】初中至 DSE 適用,必學 8 種論證方法!(含例子+判斷技巧)

5. 說明文

說明文係指以「說明」為主表達方式,通過說明事物嘅特徵、性質、形態、功能、原理、來源、成因、發展,甚至係某種抽象概念,令讀者獲取到清晰明確嘅資訊為主要目的。
因此,撰寫說明文嘅大前提係要做到正確說明事理,做到客觀真實,內容必須要具科學性和知識性,一定要有真憑實據查證,並非胡亂虛構,語調亦要嚴肅得體。
對於初中生嚟講,一般說明嘅對象大致有五種,包括人物、景物、動物、建築物及某個重大事件,例如「青馬大橋」、「愛迪生」、「布偶貓」、「九寨溝」、「香港回歸」等等,大家可以喺呢啲範疇中挑選一個介紹對象,再針對該對象嘅本質及特點,嚟分析出應該使用邊種說明手法先最適合,自然就有更多經驗,熟能生巧啦!
想知道更詳盡嘅說明手法技巧?即撳:【說明手法大全】初中至 DSE 適用,舉例說明、分類說明、比較說明等好處一文看懂!(含例子+判斷技巧)
而對於即將面對DSE嘅學生嚟講,由於說明文唔會單獨出現喺公開試考題之中,所以大家相對無咁重視,但其實說明文偷偷地已經滲咗入第三題裡面,與議論文一齊合併咗成一款叫做「論說文」嘅文體!

6. 論說文(論述文)

論說文真正寫法係論述文,佢同議論文最大分別就係加多咗自由發揮嘅空間,唔一定要有充分嘅論據,就例如娛樂評論、影評等,都屬於論述文嘅一種,主觀性比較重。
議論文:以批評為主要目的(批評可以是褒或貶。「批評」是中性詞,不是貶義詞);

論述文:以發表觀點、勸導讀者為主要目的。
嚴謹性方面,議論文要求更高。議論文必須要有論點、論據、論證三要素;論述文都可以有論點、論據、論證,但論據並非必須。(論點為談論的重點問題,論據是指用什麼去證明,論證是指如何證明)
喺呢個情況之下,說明手法就變得更為重要,由於有時候冇一個絕對嘅證據去立論,就要靠演繹、邏輯等說明方式去推論,以說服到人相信你所講嘅說話。

7. 實用文

實用文顧名思義就係日常溝通會用到嘅文章,通常喺約定知之下唔同嘅文體已經有相應嘅格式要求,就例如通告、書信、便條等等。由於實用文講求嘅係快捷方便,一擊即中,唔需要任何修飾雕琢,所以記得係冇「實用手法」呢一回事㗎!
一般而言,DSE會喺綜合能力到考核大家嘅實用文寫作能力(2024年起呢一部分將會納入去寫作嘅甲部分),常見格式如下:
  1. 致函
  2. 覆函
  3. 報告書
  4. 演講辭
  5. 撰文
  6. 投稿
實用文要寫得好,最緊要係做到語境意識、整合拓展、見解論證、表達組織四個部分,至於點樣做就等我哋下次再同大家分享啦!
--> 個別睇詳細教學:記敍文 | 描寫文 | 抒情文 | 議論文 | 說明文 | 論說文 | 實用文
免費 DSE 電子報
定期為 30,000+ 中學生送上實用 DSE 資訊和資源
文靜

文靜

文學奬得主 作家級補習名師獨創寫作萬能KEY絕技 倒模式背文5**真跡印證 超凡教學威力